អាមេរិក បាញ់សាកល្បងដោយជោគជ័យមីស៊ីលល្បឿនលឿនជាងសំឡេង
សហរដ្ឋអាមេរិក នៅថ្ងៃសុក្រ ទី២០ មីនា បានប្រកាសអំពីជោគជ័យរបស់ខ្លួន ក្នុងការសាកល្បង មីស៊ីលល្បឿនលឿនបំផុតមួយ។ មីស៊ីលទំនើបថ្មីនេះ មានសមត្ថភាពប្រកបដោយសក្តានុពលខ្ពស់ ក្នុងការយកឈ្នះប្រព័ន្ធខែលការពារមីស៊ីលរបស់គូសត្រូវ។ ក្រៅពីអាមេរិក ប្រទេសមហាអំណាចពិភពលោកដ៏ទៃទៀត មានជាអាទិ៍ ចិន និងរុស្ស៊ី ក៏បាននិងកំពុងចំណាយទឹកប្រាក់យ៉ាងច្រើនសន្ធឹកសន្ធាប់ វិនិយោគលើមីស៊ីលល្បឿនលឿនជាងសំឡេងផងដែរ។
ចុះផ្សាយនៅថ្ងៃ៖
ការសាកល្បងខាងលើនេះ គឺជាការធ្វើតេស្តសាកល្បង លើមីស៊ីលមួយដែលអាចហោះបានក្នុងល្បឿនយ៉ាងលឿនជាទីបំផុត ពោលគឺលឿនជាងសំឡេងរហូតដល់ទៅចំនួន ៥ ដង។ នេះបើតាមការបញ្ជាក់អះអាង ពីមន្ទីរបញ្ចកោណអាមេរិក។
ការសាកល្បងខាងលើ បានចាប់ធ្វើឡើងក្រោយពីកងទ័ពជើងគោក និងកងទ័ពជើងទឹកអាមេរិក រួមគ្នាពិសោធលើគំរូមីស៊ីលមួយ កាលពីខែតុលា ឆ្នាំ ២០១៧។ ការពិសោធ កាលណោះ បង្ហាញថា មីស៊ីល អាចមានសមត្ថភាពហោះក្នុងល្បឿនដ៏លឿនខ្លាំងបាន។
លោកចននី វ៉ុហ្វ (Johnny R. Wolfe) នាយកកម្មវិធីអាវុធយុទ្ធសាស្ត្រអាមេរិក បាននិយាយថា មន្ទីរបញ្ចកោណ បានបញ្ចប់ការសិក្សានិងរៀបចំមីស៊ីលរួចរាល់ហើយ។ មួយវិញទៀត នាខណៈនេះ គេបានត្រៀមខ្លួនរួចជាស្រេច ដើម្បីឈានទៅដំណាក់កាលបន្ទាប់ទៀត ពោលគឺធ្វើការអភិវឌ្ឍន៍សមត្ថភាពវាយប្រហាររបស់មីស៊ីល។ លោកចននី វ៉ុហ្វ បន្ថែម។
គួរគូសបញ្ជាក់ជូនថា ក្រៅតែពីអាចយកឈ្នះលើប្រព័ន្ធខែលការពារមីស៊ីល មីស៊ីលល្បឿនលឿន ក៏មានសមត្ថភាពផ្ទុកសព្វាវុធបានក្នុងចំនួនដ៏ច្រើនផងដែរ។ មួយវិញទៀត មិនខុសពីសហរដ្ឋអាមេរិកនោះទេ ប្រទេសមហាអំណាចពិភពលោកដទៃទៀត មានដូចជារុស្ស៊ី និងចិនជាដើម បាននិងកំពុងចំណាយថវិកាជាច្រើន ដើម្បីវិនិយោគលើការផលិតមីស៊ីលល្បឿនលឿននេះ។
ជាក់ស្តែង ប្រទេសរុស្ស៊ី កាលពីខែធ្នូ ឆ្នាំ ២០១៩ បានប្រកាសអំពីការដាក់ឲ្យដំណើរការនូវមីស៊ីលល្បឿនលឿន Avangard របស់ខ្លួន។ ការណ៍នេះ ធ្វើឲ្យរុស្ស៊ី ក្លាយទៅប្រទេសដំបូងគេបង្អស់ ដែលមានបច្ចេកវិទ្យាមីស៊ីលចុងក្រោយគេក្នុងដៃ។ មន្ត្រីរុស្ស៊ី បានអះអាងថា នៅក្នុងពេលសាកល្បង មីស៊ីលរបស់ខ្លួន អាចហោះដល់ល្បឿនរហូតដល់ ៣៣ ០០០ គីឡូម៉ែត្រ ក្នុងរយៈពេលមួយម៉ោង។
បើនិយាយពីចិនវិញ ខណៈពេលេនះ ចិន ក៏កំពុងបោះទុនវិនិយោគមិនចាញ់គេប៉ុន្មានដែរ ក្នុងគម្រោងអភិវឌ្ឍន៍អាវុធយុទ្ធភណ្ឌរបស់ខ្លួន។ កាលពីខែតុលា ឆ្នាំទៅមិញនេះ ចិន បានបង្ហាញនូវមីស៊ីលល្បឿនលឿនរបស់ខ្លួនប្រភេទ DF-17 នៅក្នុងពេលដើរព្យុហយាត្រាកងទ័ពជាតិទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ