កូវីដ១៩ ៖ អាមេរិកជាប់ចោទថាទៅកាត់មុខដណ្តើមទិញម៉ាស់ពីគេ
ប្រឈមនឹងសេចក្តីត្រូវការផ្នែកម៉ាស់ដ៏ទំហំមហិមា នៅលើពិភពលោក ម៉ាស់ ដែលជារបស់មានតម្លៃថោកសោះពីមុន ត្រូវប៉ាន់កាន់តែខ្លាំងឡើងៗ។ ក្រៅអំពីណែនាំឱ្យប្រជាពលរដ្ឋប្រើប្រាស់ជាលក្ខណៈទូទៅ សហរដ្ឋអាមេរិកដែលកំពុងរងគ្រោះដោយកូវីដ១៩យ៉ាងខ្លាំងនាពេលនេះ បានប្រកាសហាមមិនក្រុមហ៊ុនផលិតម៉ាស់ នាំចេញផលិតផលទៅលក់នៅក្រៅស្រុក និងទំនងជាបានទៅកាងដេញថ្លៃដណ្តើមទិញម៉ាស់ពីគេទៀត។
ចុះផ្សាយនៅថ្ងៃ៖
ស្តាប់
ដោយមានយោងច្បាប់ការពារជាតិ “Defense Production Act" ដែលផ្តល់អំណាចពិសេសដល់រដ្ឋាភិបាលក្នុងពេលប្រទេសស្ថិតក្នុងភាពអាសន្ន រដ្ឋបាលលោកដូណាល់ត្រាំ បានចេញសេចក្តីថ្លែងការណ៍ ហាមមិនឱ្យមានការនាំចេញផលិតផល ម៉ាសN៩៥ ចេញទៅលក់នៅក្រៅស្រុកទៀតទេ។ បើតាមសេចក្តីថ្លែងការណ៍របស់លោកប្រធានាធិបតី សេចក្តីសម្រេចនេះ គឺជាវិធានការថ្មីសំដៅទប់ស្កាត់ការដំឡើងថ្លៃម៉ាស់ផង និងទប់ស្កាត់ការនាំចេញបរិក្ខារចាំបាច់ សម្រាប់ប្រយុទ្ធប្រឆាំងនឹងការរីករាលដាលនៃជំងឺកូវីដ១៩ នៅក្នុងបរិបទបច្ចុប្បន្ន។
ហាមមិនឱ្យលក់ចេញហើយ អាមេរិកត្រូវស្វែងរកការនាំចូលម៉ាស់ពីប្រទេសក្រៅទៀត ដើម្បីអាចឆ្លើយតបទៅនឹងសេចក្តីត្រូវការកាន់តែធំធេងៗជាលំដាប់របស់ខ្លួន។ ប៉ុន្តែសហរដ្ឋអាមេរិកបានបដិសេធយ៉ាងដាច់អហង្កាថាមិនបានទៅកាត់មុខដណ្តើមទិញម៉ាស់ចិនពីប្រទេសផ្សេងៗ ដូចយ៉ាងបារាំង ឬអាល្លឺម៉ង់ ទេ។
សូមរំលឹកថា តាំងពីប៉ុន្មានថ្ងៃមកនេះ មានសំឡេងអ្នកនយោបាយបារាំងជាច្រើន បានធ្វើការចោទប្រកាន់សហរដ្ឋអាមេរិក ថាបានពង្វាងយន្តហោះដឹកម៉ាស់ដែលបារាំងបញ្ជាទិញពីចិន ឱ្យតម្រង់ទិសទៅសហរដ្ឋអាមេរិកវិញ។ បើតាមអ្នកទទួលត្រូវបារាំង អាមេរិកបានដំឡើងថ្លៃម៉ាស់និងបង់់់លុយសុទ្ធភាពទិញម៉ាសចិនកាត់មុខបារាំង។ កាលពីប៉ុន្មានសប្តាហ៍មុន នាយករដ្ឋមន្ត្រីកាណាដា បានបង្ហាញភាព សង្ស័យដូចគ្នាថាម៉ាស់ដែលកាណាដាបានបញ្ជាទិញពីចិន មិនបានគ្រប់ចំនួនទេ ដោយទំនងជាត្រូវអាមេរិកកាត់មុខយកខ្លះ។ នៅថ្ងៃសៅរ៍ទី៤មេសានេះទៀត អាល្លឺម៉ង់បានធ្វើការចោទប្រកាន់ដោយចំៗតែម្តងថា រដ្ឋាភិបាលលោកដូណាល់ត្រាំ ជាចោរទំនើបសម័យថ្មី។ កាលពីថ្ងៃសុក្រម្សិលមិញ ម៉ាស់ជាង២០ម៉ឺនដែលអាល្លឺម៉ង់បញ្ជាទិញនិងបង់ថ្លៃរួច ត្រូវបានរិបអូសយកនៅអាកាសយានដ្ឋានអន្តរជាតិក្រុងបាកកក។ ប៊ែរឡាំងមិនបានបញ្ជាក់ថាម៉ាស់នោះធ្វើដំណើរមកពីណាទើបត្រូវចាប់នៅថៃទេ តែបើតាមសារព័ត៌មានអាល្លឺម៉ង់ ម៉ាស់ទាំងនោះទំនងជាផលិតនៅចិន ដោយក្រុមហ៊ុនអាមេរិក។
ម៉ាស់និងបរិក្ខារការពារមេរោគ ជាអាវុធដ៏ចាំបាច់ក្នុងការប្រយុទ្ធប្រឆាំងនឹងជំងឺកូវីដ១៩ ប៉ុន្តែសហរដ្ឋអាមេរិកក៏ដូចបណ្តាប្រទេសជាច្រើននៅអឺរ៉ុប មានម៉ាស់និងសម្ភារៈការពារទល់នឹងមេរោគកូរ៉ូណាថ្មី ក្នុងស្តុកតិចតួចខ្លាំងណាស់ ឬអាចនិយាយបានថាកំពុងខ្វះម៉ាស់ខ្លាំងណាស់។ ហេតុដូច្នេះហើយបានជា ប្រទេសទាំងនេះ នាំគ្នារិះរកគ្រប់មធ្យោបាយដណ្តើមគ្នាទិញម៉ាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ