លោកដូណាល់ត្រាំ ចោទប្រកាន់អង្គការសុខភាពពិភពលោក ថាគ្មានសមត្ថភាពនិងកាន់ជើងចិន
សហរដ្ឋអាេមរិក កំពុងប្រឈមនឹងការឆ្លងរាលដាល និងស្លាប់មនុស្សជាច្រើនពាន់នាក់ ដោយសារមេរោគកូវីដ១៩។ ប្រឈមនឹងវិបត្តិដ៏ធ្ងន់ធ្ងរនេះ លោកប្រធានាធិបតីដូណាល់ ត្រាំ បានសរសេរ នៅលើទំព័រTwitter កាលពីថ្ងៃអង្គារទី៧មេសា ដោយបានចោទប្រកាន់ ប្រើពាក្យធ្ងន់ៗ ទៅលើអង្គការសុខភាពពិភពលោក។ លោកដូណាល់ ត្រាំ បានចោទអង្គការនេះ ថាគ្មានសមត្ថភាពធ្វើការ ផ្តល់អនុសាសន៍ខុស ហើយកាន់ជើងចិន។
ចុះផ្សាយនៅថ្ងៃ៖
ស្តាប់ - ០២:២០
ប្រឈមជាមួយនឹងស្ថានភាពកាន់តែដុនដាប បណ្តាលមកពីការឆ្លងរាលដាល នៃមេរោគកូវីដ១៩ ដែលរដ្ឋាភិបាលអាមេរិក មិនអាចទប់ឈ្នះ លោក ដូណាល់ ត្រាំបានងាកមកនិយាយស្តីបន្ទោស ទៅលើអង្គការសុខភាពភិភពលោក។
ដូចសព្វមួយដង លោកដូណាល់ ត្រាំ បានប្រើទំព័រTwitter របស់លោកសរសេរចោទប្រកាន់អង្គការសុខភាពពិភពលោក។ លោកដូណាល់ ត្រាំ បានសរសេរថា៖ អង្គការសុខភាពពិភពលោក ពិតជាធ្វើការអន់ គ្មានសមត្ថភាពសោះ។ លោកដូណាល់ ត្រាំបន្ថែមថា៖ មិនដឹងជាមានមូលហេតុអ្វីទេ អង្គការនេះ ទទួលប្រាក់វិភាគទានមួយភាគធំ ពីសហរដ្ឋអាេមរិក តែអង្គការនេះ បែរជាកាន់ជើងចិន គិតតែពីប្រយោជន៍ចិនទៅវិញ។ យើង នឹងពិនិត្យមើលឲ្យបានស៊ីជំរៅ ថាហេតុអ្វីបានជាអង្គការសុខភាពពិភពលោកនេះ មានទំនោរទៅខាងចិនដូច្នេះ។
លោកដូណាក់ ត្រាំ បានចោទសួរថា៖ ហេតុអ្វីបានជាអង្គការនេះ ផ្តល់អនុសាសន៍ខុស តាំងតែពីដំបូង ទាក់ទិននឹងការឆ្លងរាលដាលមេរោគកូវីដ១៩? លោកបន្ថែមថា៖ សំណាងល្អហើយ ដែលលោកមិនស្តាប់តាមអង្គការនេះ ហើយបានសម្រេច បិទការធ្វើដំណើរចូលសហរដ្ឋអាមេរិក ពីប្រទេសចិន បានទាន់ពេលវេលា។
ជាការពិតមែន នៅថ្ងៃទី៣១ខែមករា ក្នុងអំឡុងពេលដែលការឆ្លងរាលដាលមេរោគកូវីដ១៩ កំពុងផ្ទុះឡើងខ្លាំងនៅក្រុងវូហាន និងខេត្តហ៊ូពេប្រទេសចិន អង្គការសុខភាពពិភពលោក បានលើកចេញជាអនុសាសន៍ទៅប្រទេសទាំងអស់ថា មិនចាំបាច់ បិទព្រំដែន ការធ្វើដំណើរចេញចូល ជាមួយប្រទេសចិនទេ។ ក៏ប៉ុន្តែ នៅថ្ងៃដដែលនោះ រដ្ឋាភិបាលសហរដ្ឋអាមេរិក បានសម្រេចធ្វើផ្ទុយពីអនុសាសន៍នេះ ដោយបានហាមឃាត់ការធ្វើដំណើរមកពីប្រទេសចិន។
គួរកត់សំគាល់ថា មានមតិមួយចំនួន បានលើកឡើងពីភាពយឺតយ៉ាវ ក្នុងការសម្រេចចេញវិធានការ ឬអនុសាសន៍ របស់អង្គការសុខភាពពិភពលោក ទាក់ទិននឹងការឆ្លងរាលដាលនៃមេរោគកូវីដ១៩នេះ។ កាលពីសប្តាហ៍កន្លងទៅ លោកMarco Rubio សមាជិកព្រឹទ្ធសភាអាមេរិក មកពីគណបក្សសាធារណៈរដ្ឋ បានទាមទារឲ្យលោក Tedros Adhanom Ghebreyesus ចុះចេញពីតំណែង អគ្គនាយកនៃអង្គការសុខភាពពិភពលោក។ តែយ៉ាងណាក៏ដោយ សំណេរចោទប្រកាន់ធ្ងន់ៗ ទៅលើអង្គការសុខភាពពិភពលោក ពីសំណាក់លោកដូណាល់ ត្រាំ នេះគឺមិនខុសពីសម្តីនិយាយជាន់កែងឯងនោះទេ ព្រោះថាតាំងតែពីដំបូង លោកដូណាល់ ត្រាំ ក៏បានមើលស្រាលមេរោគកូវីដ១៩នេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ