ក្រឹត្យថ្មី៖ លោកត្រាំជំរុញឲ្យអាមេរិករុករករ៉ែលើឋានព្រះចន្ទ
លោកប្រធានាធិបតី ដូណាល់ ត្រាំ នៅថ្ងៃចន្ទទី០៦មេសាដើមសប្ដាហ៍នេះ បានចុះហត្ថលេខាលើក្រឹត្យថ្មីមួយ ជំរុញឲ្យសហរដ្ឋអាមេរិករុករករ៉ែនៅលើឋានព្រះចន្ទ។ ព្រះចន្ទដែលមានចម្ងាយជាង៣៨ម៉ឺនគីឡូម៉ែត្រពីភពផែនដី។ តាមរយៈក្រឹត្យថ្មីនេះ សហរដ្ឋអាមេរិកពុំបានចាត់ទុកទីអវកាសជាកម្មសិទ្ធិរួមឡើយ។
ចុះផ្សាយនៅថ្ងៃ៖
មិនត្រឹមតែមិនចាត់ទុកទីអវកាសជាកម្មសិទ្ធិរួមទេ ក្រឹត្យថ្មីរបស់លោកត្រាំថែមទាំងសង្កត់ធ្ងន់ថា អាមេរិកនឹងជំទាស់រាល់ការប៉ុនប៉ងទាំងឡាយណា ដែលចង់ប្រើប្រាស់ច្បាប់អន្ដរជាតិដើម្បីរារាំងបង្អាក់កិច្ចខិតខំប្រឹងប្រែងរបស់ខ្លួនក្នុងការជីករុករករ៉ែលើភពព្រះចន្ទ ភពព្រះអង្គារ និងទីអវកាសផ្សេងទៀត។
ក្រឹត្យដែលត្រូវបានចុះហត្ថលេខានៅថ្ងៃចន្ទទី០៦មេសាលើកឡើងថា អាមេរិកគួរតែមានសិទ្ធិរុករកនិងប្រើប្រាស់ធនធានដែលមាននៅទីអវកាស ដោយសារតែអាមេរិកពុំមែនជាហត្ថលេខីនៃសន្ធិសញ្ញាឆ្នាំ១៩៧៩ស្ដីពីព្រះចន្ទឡើយ។ សន្ធិសញ្ញាស្ដីពីព្រះចន្ទចែងថា រាល់សកម្មភាពនៅទីអវកាស ត្រូវតែអនុលោមទៅតាមច្បាប់អន្ដរជាតិ។ នៅឆ្នាំ២០១៥ សភាអាមេរិកបានអនុម័តច្បាប់មួយដែលអនុញ្ញាតឲ្យក្រុមហ៊ុនអាមេរិកប្រើប្រាស់ធនធានពីព្រះចន្ទនិងអាចម៍ផ្កាយដទៃទៀត។
សូមជម្រាបជូនថា បន្ទាប់ពីបេសកកម្ម Apollo កាលពី៥០ឆ្នាំមុន អាមេរិកកំពុងត្រៀមបេសកកម្មថ្មីមួយទៀតទៅកាន់ឋានព្រះចន្ទនៅឆ្នាំ២០២៤ ក្រោមគម្រោងឈ្មោះ Artemis។ អ្នកវិទ្យាសាស្ត្រជឿថា បេសកកម្ម Artemis នឹងអាចស្វែងរកឃើញនូវរបកគំហើញសំខាន់ៗអំពីធនធានដែលគេអាចប្រើសម្រាប់ផ្គត់ផ្គង់ថាមពល ឬសម្រាប់គោលដៅផ្សេងទៀត។
ជាការកត់សម្គាល់ដែរ លោកប្រធានាធិបតីអាមេរិក ដូណាល់ ត្រាំ មានមហិច្ឆតាចង់ក្លាយជាមហាអំណាចត្រួតត្រាអវកាស ដើម្បីការពារប្រយោជន៍អាមេរិក ក៏ដូចជាទប់ទល់ទៅនឹងការលូតឡើងលើលំហអវកាសរបស់ចិននិងរុស្ស៊ីដែលជាគូប្រជែង។ សម្រាប់ប្រធានាធិបតីអាមេរិករូបនេះ អវកាសបានក្លាយជាសមរភូមិប្រយុទ្ធ ដូចសមរភូមិលើដី លើសមុទ្រ និងលើអាកាសដែរ។ លោកត្រាំបានចុះហត្ថលេខាបង្កើតកងទ័ពអវកាសនៅខែធ្នូឆ្នាំ២០១៩ តាមរយៈច្បាប់ថវិកាការពារជាតិឆ្នាំ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ