កូវីដ-១៩៖ IMF ព្យាករណ៍ពីសេដ្ឋកិច្ចសកលដើរថយក្រោយជាប្រវត្តិសាស្រ្តសម្រាប់ឆ្នាំ ២០២០
នៅថ្ងៃអង្គារ ទី១៤ មេសា អង្គការមូលនិធិរូបិយវត្ថុអន្តរជាតិហៅកាត់ IMF បានផ្សព្វផ្សាយរបាយការណ៍មួយស្តីពីស្ថានភាពសេដ្ឋកិច្ចពិភពលោកសម្រាប់ឆ្នាំ ២០២០នៅក្នុងបរិបទនៃវិបត្តិកូវីដ-១៩។ នៅក្នុងរបាយការណ៍ IMFបានព្យាករណ៍ពីសេដ្ឋកិច្ចសកលដើរថយក្រោយក្នុងឆ្នាំ ២០២០ ជាមួយនឹងកំណើនសេដ្ឋកិច្ចធ្លាក់ចុះប្រមាណជា ៣%។ ផលវិបាកសេដ្ឋកិច្ចសកលជាប្រវត្តិសាស្រ្តនេះ គឺជាលទ្ធផលនៃវិធានការបិទខ្ទប់មនុស្សមិនឲ្យចេញពីផ្ទះដើម្បីទប់ស្កាត់ការឆ្លងរាលដាលនៃមេរោគកូរ៉ូណាថ្មី។ ទន្ទឹមគ្នានេះIMFបានព្រមានទុកជាមុនថា បើវិបត្តិកូវីដ-១៩ នៅបន្តអូសបន្លាយកាន់តែយូរ ស្ថានភាពសេដ្ឋកិច្ចក្នុងលោកនឹងធ្លាក់ដុនដាបកាន់តែខ្លាំង។
ចុះផ្សាយនៅថ្ងៃ៖
ស្តាប់ - ០២:៤១
ការហ៊ានព្យាករណ៍ពីកំណើនសេដ្ឋកិច្ចសកលធ្លាក់ចុះចំនួន ៣% សម្រាប់ឆ្នាំ ២០២០ ដោយIMF ផ្អែកលើសមត្ថកម្មចំនួនពីរ ទី១ ការឆ្លងរាតត្បាតនៃជំងឺកូវីដ-១៩អាចនឹងបិទបញ្ចប់នៅដំណាច់ខែមិថុនានិងទី២ ការលើកចេញវិញនូវការបិទ ខ្ទប់ប្រជាជនមិនឲ្យចេញពីផ្ទះអាចនឹងចាប់ផ្តើមនៅឆមាសទី២។ ផ្ទុយទៅវិញ បើវិបត្តិកូវីដ-១៩ នៅបន្តអូសបន្លាយយូរអង្វែងទៅមុខទៀត ពិភពលោកនឹងស្គាល់ស្ថានភាពសេដ្ឋកិច្ចដុនដាបកាន់តែខ្លាំងក្នុងឆ្នាំ ២០២០ និងអាចបន្តដល់ឆ្នាំ ២០២១ ទៀតផង។នៅត្រង់ចំណុចនេះ មានសេណារីយ៉ូចំនួន ៣ ដែល IMFបានសំឡឹងឃើញ៖
សេណារីយ៉ូទី១ បើគេមិនអាចកំចាត់ជំងឺកូវីដ-១៩ បានជោគជ័យនៅដំណាច់ខែមិថុនា និងបានបង្ខំប្រទេសជាច្រើនឲ្យបន្តចាត់វិធានការដូចយ៉ាងបិទខ្ទប់មនុស្សមិនឲ្យចេញពីផ្ទះ បិទហាងលក់ទំនិញមិនចាំបាច់ កាត់បន្ថយចរាចរណ៍ផ្លូវអាកាស ឬការធ្វើការងារនៅតាមផ្ទះនោះ ពិភពលោកនឹងស្គាល់ផលិតផលសរុបក្នុងស្រុកធ្លាក់ចុះដល់ទៅ ៦% ពោលមិនមែន ៣% ទេ។ សេណារីយ៉ូទី២ បើវិបត្តិជំងឺកូវីដ-១៩ ឆ្លងចូលដល់ឆ្នាំ ២០២១ តែបែរជាមិនសូវខ្លាំងក្លាដូចឆ្នាំ ២០២០ ទេនោះ ពិភពលោកអាចស្គាល់កំណើនសេដ្ឋកិច្ចឡើងវិញប្រមាណ ០,៨% ពោលមិនមែន ៥,៨%ទេ។ ចំណែកសេណារីយ៉ូទី៣ គឺជាការបូកបញ្ចូលគ្នារវាងសេណារីយ៉ូទី១ និងសេណារីយ៉ូទី២ ដែលអាចធ្វើឲ្យសេដ្ឋកិច្ចសកលឆ្នាំ ២០២១ ដើរថយក្រោយក្នុងអត្រា ២,២% ក្រោមសូន្យ។
តាម IMF ក្រុមប្រទេសដែលរងផលប៉ះពាល់សេដ្ឋកិច្ចខ្លាំងជាងគេក្នុងឆ្នាំ ២០២០ គឺក្រុមប្រទេសក្នុងតំបន់អឺរ៉ូដែលផលិតផលសរុបក្នុងស្រុកអាចនឹងធ្លាក់ដល់ទៅ ៧,៥% និងបន្តដោយសហរដ្ឋអាមេរិកដែលអាចនឹងធ្លាក់ចុះចំនួន ៥,៩%។ ចំណែកនៅតំបន់អាមេរិកឡាទីន និងការ៉ាអ៊ីប ផលិតផលសរុបក្នុងស្រុកអាចនឹងធ្លាក់ ៥,២%។ សម្រាប់តំបន់មជ្ឈិមបូព៌ា និងអាស៊ីកណ្តាលត្រូវបាន IMF ព្យាករណ៍ពីការធ្លាក់ចុះផលិតផលសរុបក្នុងស្រុកចំនួន ២,៨%។ ផ្ទុយទៅវិញ ប្រទេសចិន និងឥណ្ឌានឹងអាចបន្តទទួលបានកំណើនសេដ្ឋកិច្ចតិចតួចក្នុងអត្រា ១,២% សម្រាប់ចិន និង ១,៩% សម្រាប់ឥណ្ឌា។ ទាក់ទងនឹងពាណិជ្ជកម្មអន្តរជាតិត្រូវបាន IMF ព្យាករណ៍ថា ទំហំដោះដូរទំនិញ និងសេវានឹងមានការធ្លាក់ចុះចំនួន ១១% ក្នុងឆ្នាំ ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ