FMIផ្តល់ជំនួយបន្ទាន់ដល់ប្រទេសក្រីក្រ ដែលកំពុងប្រឈមនឹងវិបត្តិកូវីដ១៩
៣ថ្ងៃក្រោយប្រកាសផ្តល់ប្រាក់កម្ចី ដល់ប្រទេសទុយនីស៊ី មូលនិធិរូបិយវត្ថុអន្តរជាតិ IMF កាលពីថ្ងៃចន្ទម្សិលមិញបានប្រកាសផ្តល់ជំនួយ បន្ទាន់សម្រាប់ឲ្យប្រទេសក្រីក្រចំនួន ២៥ អាចមានមធ្យោបាយប្រយុទ្ធប្រឆាំងនឹងជំងឺកូវីដ១៩។ រួមគ្នាជាមួយ ធនាគារពិភពលោក មូលនិធិរូបិយវត្ថុអន្តរជាតិ បានអំពាវនាវផងដែរ ដល់ក្រុមប្រទេសអ្នកមានឲ្យឈប់ទារបំណុលពីប្រទេសក្រីក្រ នៅក្នុងអំឡុង កើតមានវិបត្តិកូវីដ ១៩។
ចុះផ្សាយនៅថ្ងៃ៖
ស្តាប់ - ០២:១៦
ចាប់តាំងពីពិភពលោក កើតមានជំងឺរាតត្បាត កូវីដ ១៩ មូលនិធិរូបិយវត្ថុអន្តរជាតិ ដែលមានទីស្នាក់ការនៅទីក្រុងវ៉ាស៊ីនតោន បានទទួលពាក្យសុំជំនួយ ពីប្រទេសដ៏ច្រើនមិនធ្លាប់មាន។ តាមIMF ប្រទេសជាង ៩០បានដាក់ពាក្យជំនួយបន្ទាន់ពីមូលនិធិ រូបិយវត្ថុ អន្តរជាតិ។
ដើម្បីជួយប្រទេសសមាជិក ក្នុងបរិបទនៃជំងឺរាត្បាតកូវីដ ១៩ មូលនិធិរូបិយវត្ថុអន្តរជាតិ តាមរយៈ អគ្គនាយិការបស់ខ្លួន គឺលោកស្រី Kristalina Georgieva បានប្រកាស ផ្តល់ជំនួយ បន្ទាន់សម្រាប់ជួយប្រទេសក្រីក្រជាងគេក្នុងលោក ចំនួន ២៥ ដែលនៅក្នុងនោះ ប្រទេស ចំនួន ១៩ ស្ថិតនៅទ្វីបអាហ្វ្រិក។ តាមអគ្គនាយិការបស់IMF ជាមួយនឹងប្រាក់ជំនួយបន្ទាន់របស់IMF ប្រទេសក្រីក្រនៅតែអាចមានលទ្ធភាព បង់ប្រាក់បំណុលឲ្យIMF ក្នុងរយៈពេល៦ខែខាងមុខ។ សល់ពីនេះ គេនឹងអាចប្រើសម្រាប់ប៉ះប៉ូវ ការខូចខាតសេដ្ឋកិច្ចដោយសារកូវីដ ១៩ ក៏ដូចជាសម្រាប់ពង្រឹងផ្នែកសុខាភិបាល ដើម្បីប្រយុទ្ធប្រឆាំងនឹងជំងឺរាតត្បាតកូវីដ ១៩។
ដើម្បីទ្រទ្រង់ជំនួយបន្ទាន់លើកនេះ IMF នឹងប្រើកញ្ចប់មូលនិធិសម្រាប់ឆ្លើយតបនឹងគ្រោះមហន្តរាយ ដែលIMF ធ្លាប់បានបង្កើតឡើងកាលពីឆ្នាំ ២០១៥ ដើម្បីឆ្លើយតបនឹងជំងឺអេបូឡានៅអាហ្វ្រិក។ នៅក្នុងវិបត្តិកូវីដ ១៩ IMF មានគោលដៅ ប្រមូលឲ្យបានថវិកា ១៤០០លានដុល្លា។ ប៉ុន្តែ បច្ចុប្បន្ននេះ ជាមួយនឹងវិភាគទានសំខាន់ៗពីប្រទេសជប៉ុន អង់គ្លេស និង ចិន ជាដើម កញ្ចប់មូលនិធិសម្រាប់ឆ្លើយតបនឹងគ្រោះមហន្តរាយរបស់IMF មានថវិកា ប្រមាណ តែ៥០០លានដុល្លារ។
នៅក្នុងសេចក្តីថ្លែងការណ៍ កាលពីថ្ងៃចន្ទ អគ្គនាយិការបស់IMF បាន អំពាវនាវឲ្យបណ្តាប្រទេសអ្នកមាន ចូលរួមវិភាគទាន បំពេញកញ្ចប់មូលនិធី ដើម្បីធ្វើយ៉ាងណាឲ្យមូលនិធិរូបិយវត្ថុ អន្តរជាតិអាចជួយសម្រាលបំណុលរបស់បណ្តាប្រទេសក្រីក្រ ក្នុងរយៈពេល ២ឆ្នាំ ទៅមុខ។
ជួយសម្រាលបំណុល ឬលុបចោលបំណុលទាំងស្រុង។ ទាំងនេះ ជាការដង្ហើយស្រែកសុំរបស់បណ្តាប្រទេសក្រីក្រ នៅទ្វីបអាហ្វ្រិក ដែលកំពុងរងគ្រោះ ដោយសារ វិបត្តិកូវីដ ១៩។ ធនាគារពិភពលោក មូលនិធិរូបិយវត្ថុអន្តរជាតិ ធ្លាប់បានអំពាវនាវដល់ក្រុមប្រទេសអ្នកមានឲ្យឈប់ទារបំណុលពីប្រទេសក្រីក្រ ពីខែឧសភា ខែក្រោយនេះ រហូតដល់ខែមិថុនាឆ្នាំក្រោយ។ ប្រធានាធិបតីបារាំងផ្ទាល់ធ្លាប់បានលើកឡើងថា បារាំង ក៏ដូចជាសហភាពអឺរ៉ុប អាចជួយប្រទេសនៅ អាហ្វ្រិក តាមរយៈការលុបចោលបំណុល។ សូមបញ្ជាក់ដែរថា ការអំពាវនាវរបស់ប្រមុខរដ្ឋបារាំង ធ្វើឡើងប៉ុន្មានថ្ងៃមុន កិច្ចប្រជុំ របស់ធនាគារពិភពលោក និង មូលនិធិរូបិយវត្ថុអន្តរជាតិ ដែលត្រូវប្រព្រឹត្តទៅនៅថ្ងៃទី ១៧មេសាខាងមុខ។
ធនាគារពិភពលោក កាលពីសប្តាហ៍មុន បានប្រកាសពីជំនួយបន្ទាន់ ប្រមាណ ១៦០ពាន់លានដុល្លារ សម្រាប់រយៈពេល ១៥ខែ ដើម្បីជួយបណ្តាប្រទេសនៅក្នុងពិភពលោក ដែលរងគ្រោះដោយវិបត្តិកូវីដ ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ