បាញ់រះនៅកាណាដា ស្លាប់មនុស្ស១៦នាក់
នៅប្រទេសកាណាដាឯណោះវិញ ខណៈដែលមានវិធានការឲ្យសំងំក្នុងផ្ទះ ដើម្បីបង្ការការឆ្លងមេរោគកូវីដ១៩ មានបុរសវ័យ៥០ឆ្នាំម្នាក់ បានយកកាំភ្លើងបាញ់រះនៅច្រើនទីតាំង បណ្តាលឲ្យស្លាប់មនុស្សយ៉ាងហោច១៦នាក់។ ហេតុការណ៍បាញ់រះដ៏កម្រ សម្រាប់កាណាដានេះ បានកើតឡើង នៅវេលាយប់ថ្ងៃសៅរ៍ឈានចូលថ្ងៃអាទិត្យម្សិលមិញ នៅភាគខាងកើតបង្អស់របស់កាណាដា។ ជនដៃដល់ ត្រូវបាននគរបាលបាញ់សម្លាប់ នៅព្រឹកថ្ងៃអាទិត្យទី១៩មេសានេះ។
ចុះផ្សាយនៅថ្ងៃ៖
ស្តាប់ - ០២:២២
ហេតុការណ៍បាញ់រះ បានកើតឡើង នៅក្នុងយប់ថ្ងៃសៅរ៍ទី១៨មេសា នៅត្រង់ចំណុចឃុំ Portapique ចំងាយប្រមាណ ១៣០គីឡូម៉ែត្រ ពីក្រុង Halifax ទីរួមខេត្ត Nouvelle-Ecosse ភាគខាងកើតបង្អស់នៃប្រទេសកាណាដា។ បន្ទាប់ពីបានផ្តើមការបាញ់រះ ទៅលើមនុស្ស នៅក្នុងផ្ទះមួយកន្លែង ជនដៃដល់ បានបើករថយន្ត ទីធ្វើការបាញ់រះនៅទីតាំងផ្សេងទៀត។
សមត្ថកិច្ចនគរបាលកាណាដា បានចេញប្រតិបត្តិការតាមចាប់ជនដៃដល់ អស់ពេញមួយយប់ លុះរហូតថ្ងៃអាទិត្យ ជិតថ្ងៃត្រង់ ទើបសមត្ថកិច្ចបានស្ទាក់ចាប់ជនដៃដល់ នឹងបានបាញ់សម្លាប់ជនដៃដល់ នៅមិនឆ្ងាយប៉ុន្មានពីព្រលានយន្តហោះក្រុង Halifax។
មានមនុស្សស្លាប់យ៉ាងហោង១៦នាក់ ដោយការបាញ់រះនេះ ក្នុងនោះមានស្ត្រីជាសមត្ថកិច្ចនគរបាលម្នាក់ផង។ យោងតាមបណ្តាញព័ត៌មានកាណដា បានឲ្យដឹងថា ជនដៃដល់ ឈ្មោះ Gabriel Wortman អាយុ៥១ឆ្នាំ ជាពេទ្យធ្មេញ ដែលមានគ្លីនិកធ្មេញនៅក្រុងDartmouth។
លោកស្រី Brenda Lucki ស្នងការនគរបាលជាតិកាណាដា បានលើកឡើងថា ជនដៃដល់ បានពាក់ឯកសណ្ឋាននគរបាល និងបានប្រើរថយន្តនគរបាល បើកធ្វើសកម្មភាពបាញ់រះ។ ដូច្នេះ អំពើនេះ ពិតជាមានគម្រោងការគិតទុកជាមុន។ តែយ៉ាងណា សមត្ថកិច្ច មិនបានផ្តោតការសង្ស័យ ថាវាអំពើភេរវកម្មនោះឡើយ។ ដោយឡែក បណ្តាញព័ត៌មានវិញ បានលើកឡើងថា សមត្ថកិច្ចកំពុងតែផ្តោតការស៊ើបអង្កេត ទាក់ទិននឹងវិធានការបិទខ្ទប់សកម្មភាពសេដ្ឋកិច្ចទាំងស្រុង ដោយសារតែមេរោគកូវីដ១៩។ ជនដៃដល់ ដែលមានគ្លីនិកធ្មេញនេះ អាចមានការខឹងមួរម៉ៅ ចំពោះវិធានាការបិទខ្ទប់នេះ។
អាជ្ញាធរពិសេស តាមដានការងារសមត្ថកិច្ចនគរបាល ក៏បានបើកការស៊ើបអង្កេតដែរ ទាក់ទិននឹង ឯកសណ្ឋាន ព្រមទាំងរថយន្តនគរបាល ដែលជនដៃដល់ យកទៅប្រើប្រាស់ ក្នុងពេលធ្វើសកម្មភាព។
លោក Justin Trudeau នាយករដ្ឋមន្ត្រីកាណាដា បានផ្ញើសាររំលែកទុក្ខជនរងគ្រោះ និងបានថ្កោលទោសអំពើដ៏ឃោរឃៅនេះ។ គួររំលឹកថា បើប្រៀបធៀបទៅសហរដ្ឋអាមេរិក ដែលមានការបាញ់រះសម្លាប់មនុស្សសឹងតែមិនលោះថ្ងៃនោះ ការបាញ់រះប្រភេទនេះ ជាករណីកម្រនៅកាណាដា។ យោងតាមតួលេខផ្លូវការ មានប្រជាជនកាណាដាប្រមាណ២លាននាក់ ដែលកាន់កាប់អាវុធ។ ប៉ុន្មានឆ្នាំចុងក្រោយនេះ មានមតិជាច្រើនបានទាមទារ រដ្ឋាភិបាលសហព័ន្ធកាណាដា រៀបចំធ្វើកំណែទម្រង់ ដើម្បីរិតបន្តឹងការកាន់កាប់អាវុធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ