កំពុងមានវិបត្តិកូវីដ អគ្គនាយកអង្គការពាណិជ្ជកម្មពិភពលោកប្រកាសលាលែងចេញពីតំណែង
ក្នុងខណៈដែលសេដ្ឋកិច្ចពិភពលោកកំពុងទន់ជង្គង់ដួលស្ទើរដល់ដី ដោយសារវិបត្តិកូរ៉ូណាវីរុស ដំណឹងស្តីពីគម្រោងលាលែងចេញពីតំណែងរបស់លោកអគ្គនាយកអង្គការពាណិជ្ជកម្មពិភពលោកជាតិប្រេស៊ីល លោក រ៉ូប៊ែរតូ អាហ្សេវេដូ Roberto Azevedo លាន់ស្នូរដូចផ្ទុះគ្រាប់បែក។ អង្គការពាណិជ្ជកម្មពិភពលោក OMC ឬWTO ត្រូវប្រកាសជាផ្លូវការ ការសុំបញ្ចប់អាណត្តិត្រឹមតែកញ្ញាឆ្នាំ២០២០ខាងមុខរបស់លោក អាហ្សេវេដូ នៅក្នុងជំនួបប្រជុំនារសៀលថ្ងៃព្រហស្បតិ៍ ទី ១៤ឧសភា។
ចុះផ្សាយនៅថ្ងៃ៖
ស្តាប់ - ០២:២១
ពាណិជ្ជកម្មអន្តរជាតិកំពុងតែរងវិបត្តិដ៏ធ្ងន់ធ្ងរមិនធ្លាប់ប្រទះគិតចាប់តាំងពីឆ្នាំ១៩៣០មកផង ស្រាប់តែមានដំណឹងស្តីពីគម្រោងលាលែងចេញពីតំណែងរបស់លោកអគ្គនាយកអង្គការពាណិជ្ជកម្មពិភពលោកទៀត។ ពិតគ្រោះជាន់លើគ្រោះរបស់ស្ថាប័នមែន។ ជាផ្លូវការ លោក អាហ្សេវេដូ លាលែងដោយមូលហេតុគ្រួសារ និងគ្មានមហិច្ឆតានយោបាយទេ។
តាំងប៉ុន្មានខែមកនេះ អង្គការពាណិជ្ជកម្មពិភពលោកបានធ្លាក់ក្នុងវិបត្តិដ៏ជ្រៅ។ សមាជិកអង្គការមិនអាចរំពឹងលើស្ថាប័នពាណិជ្ជកម្មអន្តរជាតិតែមួយគត់នេះបានទេ នៅពេលមានជម្លោះរវាងគ្នា។ នាមជាអាជ្ញាកណ្តាលដោះស្រាយជម្លោះពាណិជ្ជកម្មអន្តរជាតិ គ្មានចៅក្រម ព្រោះសហរដ្ឋអាមេរិកបានរារាំង។ ប្រព័ន្ធពាណិជ្ជកម្ម លែងមានស្ថិរភាព ស្ថាប័នរងសម្ពាធផងនិងការរិះគន់ឥតឈប់ទៀតពីសំណាក់ប្រធានាធិបតីអាមេរិក កិច្ចព្រមព្រៀងពាណិជ្ជកម្មជាច្រើនត្រូវរងការជាន់ឈ្លី។ ជាអង្គការពាណិជ្ជកម្មពិភពលោកតែបានត្រឹមឈរមើលសង្គ្រាមពាណិជ្ជកម្មរវាងសហរដ្ឋអាមេរិក-ចិន-សហភាពអឺរ៉ុប។ វិបត្តិកូវីដ១៩បានផ្ទុះឡើង អង្គការត្រូវគាំងស្តូកតែម្តង។ ដូច្នេះនេះជាពេលវេលាប្រសើរបំផុត ដែលអង្គការត្រូវស្វែងរកមេដឹកនាំថ្មី។ នេះជាការអះអាងរបស់លោក អាហ្សេវេដូ ប្រាប់ទៅកាសែតValor។
មានប្រវត្តិជាអ្នកការទូត លោក រ៉ូប៊ែរតូ អាហ្សេវេដូ ជាតិប្រេស៊ីល បានក្លាយជាអគ្គនាយកអង្គការពាណិជ្ជកម្មពិភពលោកជាលើកដំបូង នៅឆ្នាំ២០០៨ និងបានជាប់ឆ្នោតជាថ្មី នៅឆ្នាំ២០១៧ ។ តាមធម្មតា លោកត្រូវបញ្ចប់អាណត្តិ ទីពីរនៅថ្ងៃទី ៣១សីហា២០២១។ មុននឹងក្លាយជាប្រមុខអង្គការ លោកបានសាងឈ្មោះជាអ្នកចរចាដ៏ចំណានរហូតនាំប្រេស៊ីលឱ្យឈ្នះជម្លោះពាណិជ្ជកម្មជាមួយនឹងសហរដ្ឋអាមរិក និងសហភាពអឺរ៉ុប។ ភាពប៉ិនប្រសព្វផ្នែកចរចាទម្លាយភាពភាពទ័លច្រកក្នុងសំណុំរឿងកិច្ចព្រមព្រៀងពាណិជ្ជកម្មដែលជាប់គាំងរាប់ឆ្នាំ បានរុញច្រានលោកឱ្យក្លាយជាប្រមុខដឹកនាំអង្គការពាណិជ្ជកម្មពិភពលោកនេះ។ ប៉ុន្តែតាំងពីលោកដូណាល់ ត្រាំ ឡើងកាន់អំណាច សហរដ្ឋអាមេរិកដាក់សម្ពាធលើអង្គការកាន់តែខ្លាំងឡើងៗ។ ទោះបីជាលោកអាហ្សេវេដូ ព្យាយាមចរចាយ៉ាងណាក៏មិនអាចទប់ស្កាត់អាមេរិកមិនឱ្យលូកដៃកាច់ច្បាប់ពាណិជ្ជកម្មអន្តរជាតិបាន។
ចុះតើនរណានឹងក្លាយជាអគ្គនាយកថ្មី ? គ្រប់ចក្ខុកំពុងបង្វែរទៅអាហ្វ្រិក។ ព្រោះដើម្បីកុំឱ្យតំណែងធ្លាក់លើប្រទេសមហាអំណាចសេដ្ឋកិច្ច ហើយមិនត្រូវធ្លាក់ទៅអាមេរិកឬចិន ដែលកំពុងមានជម្លោះនឹងគ្នាស្រាប់ទេ។ នេះបើតាមប្រភពការទូតជាច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ