លោកដូណាល់ ត្រាំ ចេញក្រឹត្យ សំដៅដកអភ័យឯកសិទ្ធិដែលការពារក្រុមហ៊ុនបណ្តាញសង្គម
ខឹងក្រោធនឹងក្រុមហ៊ុនបណ្តាញសង្គមTwitter នៅក្នុងរឿងលូកដៃផ្ទៀងផ្ទាត់ សំណេរTwitterរបស់លោក កាលពីថ្ងៃពុធ លោកប្រធានាធិបតីអាមេរិក ដូណាល់ ត្រាំ នៅថ្ងៃព្រហស្បតិ៍ម្សិលមិញ បានចុះហត្ថលេខាលើក្រឹត្យ មួយ ដែលទាមទារឲ្យក្រុមហ៊ុនបណ្តាញសង្គមទទួលខុសត្រូវផ្នែកច្បាប់ លើខ្លឹមសារសរសេររបស់អ្នកប្រើប្រាស់។ ក្រឹត្យប្រធានាធិបតីសំដៅ ចង់ដកអភ័យឯកសិទ្ធិ ដែលធ្លាប់ការពារ ក្រុមហ៊ុនបណ្តាញសង្គម ដូចជាFacebook Twitter Youtube ជាដើមពីការទទួលផ្លូវផ្នែកច្បាប់លើការសរសេរចុះផ្សាយ របស់អ្នកប្រើប្រាស់។
ចុះផ្សាយនៅថ្ងៃ៖
ស្តាប់ - ០២:៣០
តាមការប្រកាសរបស់ប្រធានាធិបតីអាមេរិក ក្រឹត្យដែលលោកបានចុះហត្ថលេខា កាលពីថ្ងៃម្សិលមិញ មានន័យថា ក្រុមហ៊ុនបណ្តាញសង្គមនឹងលែងទទួលបានការការពារផ្នែកច្បាប់ នៅចំពោះមុខការទទួលខុសត្រូវរបស់ខ្លួន ដូចមុនទៀតហើយ។ តាមសេតវិមាន ក្រឹត្យប្រធានាធិបតី គោលដៅ សើរើឡើងវិញ ចំណុចទី២៣០នៃច្បាប់ស្តីពីការផ្សព្វផ្សាយនៃភាពថ្លៃថ្នូរ ដែលផ្តល់អភ័យឯកសិទ្ធិ ការពារក្រុមហ៊ុនបណ្តាញសង្គម ដូចជា Twitter Facebook Youtube និង Google ពីការប្តឹងផ្តល់ផ្នែកច្បាប់ និងការទទួលខុសត្រូវ លើខ្លឹមសារសរសេររបស់អ្នកប្រើប្រាស់។ ចំណុចទី២៣០ ចែងផងដែរពីការផ្តល់សេរីភាព ដល់ក្រុមហ៊ុន ដើម្បីអន្តរាគមន៍ គ្រប់គ្រងបណ្តាញសង្គមរបស់ខ្លួន ទៅតាមគោលនយោបាយរបស់ក្រុមហ៊ុន។
ប៉ុន្តែ តាមលោកដូណាល់ ត្រាំ គេចាំបាច់ត្រូវសើរើ ឡើងវិញ ច្បាប់ដែលផ្តល់សិទ្ធិពិសេសដល់ក្រុមហ៊ុនបណ្តាញសង្គម នៅពេលណាដែល ក្រុមហ៊ុនបណ្តាញសង្គមលូកដៃ ហ៊ានចូលទៅកែប្រែ ត្រួតពិនិត្យខ្លឹមសារសរសេររបស់អ្នកប្រើប្រាស់។ ដោយបានលូកដៃផ្ទៀងផ្ទាត់សំណេររបស់លោក នៅលើបណ្តាញTwitter កាលពីថ្ងៃពុធ លោកដូណាល់ ត្រាំបានចោទក្រុមហ៊ុនបណ្តាញសង្គមTwitter ថា មាននិន្នាការលំអៀង និងធ្វើសកម្មភាពនយោបាយ។ សម្រាប់ប្រធានាធិបតីអាមេរិកក្រុមហ៊ុនបណ្តាញសង្គម មានអំណាចច្រើនជ្រុល ដើម្បីត្រួតពិនិត្យ លាក់ ឬកែប្រែខ្លឹមសារផ្សព្វផ្សាយ របស់បុគ្គលទៅកាន់សាធារណជន។ សម្រាប់លោកដូណាល់ ត្រាំ វាជារឿងអយុត្តិធម៌ ដែលគេមិនអាចបន្តឲ្យអនុវត្តតទៅទៀតបានទេ។
លោកប្រធានាធិបតីអាមេរិក អះអាងរួចហើយថា រដ្ឋបាលរបស់លោកត្រៀមរួចហើយ សម្រាប់ការប្តឹងផ្តល់នៅតុលាការ នៅក្រោយ ការចេញក្រឹត្យសំដៅរៀបចំច្បាប់គ្រប់គ្រង ក្រុមហ៊ុនបណ្តាញសង្គមលើកនេះ។
ក្រុមហ៊ុនTwitter វិញ នៅមិនទាន់មានប្រតិកម្មអ្វីទៅនឹងការបង្កើតក្រឹត្យប្រធានាធិបតី ដែលសំដៅរឹតបន្តឹង ក្រុមហ៊ុនបណ្តាញសង្គមនៅឡើយទេ។ ដើរផ្ទុយពីការបន្ថយភាពតានតឹងជាមួយប្រធានាធិបតីអាមេរិក ក្រុមហ៊ុនTwitter បានដុតកំហឹងម្តង ដោយបានបិទបាំង សារមួយទៀត របស់លោកត្រាំ នៅលើបណ្តាញ Twitterកាលពីថ្ងៃព្រហស្បតិ៍។ ដោយធ្វើដូច្នេះ គេមិនអាចចុច Like ឬចែកចាយបន្ត សារ Twitter របស់លោកដូណាល់ ត្រាំបានទេ។
តាមTwitter សាររបស់លោកដូណាល់ ត្រាំ ដែលនិយាយពីអំពើហិង្សា ដុត ទីស្នាក់ការប៉ូលិស Minneapolis នៅរដ្ឋ Minnesota នៅក្រោយមរណភាពរបស់ជនជាតិអាមេរិកាំងស្បែកខ្មៅ បានរំលោភច្បាប់របស់Twitter ដោយសារវាមានលក្ខណៈ ញុះញង់ឲ្យមានការប្រព្រឹត្តអំពើហិង្សា។
ប៉ុន្តែ ជាជាងលុបចោល ឬព្យួរគណនី ដូចដែលក្រុមហ៊ុនTwitter តែងធ្វើទៅលើអ្នកប្រើប្រាស់ដទៃផ្សេងទៀត ក្រុមហ៊ុនTwitter បានត្រឹមតែ បិទបាំង មិនបង្ហាញ សារTwitter របស់លោកដូណាល់ ត្រាំ និងបានព្រមានពីខ្លឹមសារ បើសិនគេចង់ចុចទៅចូលមើលសាររបស់លោកដូណាល់ត្រាំ។
ក្រឹត្យប្រធានាធិបតី សំដៅសើរើឡើងវិញច្បាប់ពិសេសមួយ ដែលផ្តល់អភ័យឯកសិទ្ធិ និងការពារក្រុមហ៊ុនបណ្តាញសង្គម ដូចជាFacebook Twitter ពី ការចោទប្រកាន់ផ្លូវច្បាប់ និងការទទួលខុសត្រូវទាំងឡាយ លើខ្លឹមសារសររសេររបស់អ្នកប្រើប្រាស់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ