អូស្ត្រាលីបើកការស៊ើបអង្កេត លើករណីនគរបាលអាមេរិក ប្រើហិង្សាលើអ្នកកាសែតអូស្ត្រាលី២នាក់
បាតុកម្មហិង្សានៅទីក្រុងវ៉ាស៊ីនតោន កាលពីថ្ងៃចន្ទ ទី១មិថុនា មានអ្នកកាសែតជនជាតិអូស្ត្រាលី២នាក់ ត្រូវបាននគរបាលអាមេរិក ប្រើប្រាស់អំពើហិង្សា។ សកម្មភាពនេះត្រូវបានថតដោយវីដេអូ ហើយផ្សព្វផ្សាយយ៉ាងព្រោងព្រាត នៅតាមបណ្តាញព័ត៌មានអូស្ត្រាលី។ ប្រឈមនឹងបញ្ហានេះ កាលពីថ្ងៃអង្គារម្សិលមិញ រដ្ឋាភិបាលអូស្ត្រាលី បានសម្រេចបើកការស៊ើបអង្កេត ដើម្បីស្វែងរកការពិត ជុំវិញហេតុការណ៍ប្រើអំពើហិង្សាលើអ្នកកាសែតអូស្ត្រាលី ក្នុងពេលដែលពួកគេកំពុងបំពេញការងារ។
ចុះផ្សាយនៅថ្ងៃ៖
ស្តាប់ - ០២:៣២
លោកស្រី Marise Payne រដ្ឋមន្ត្រីការបរទេសអូស្ត្រាលី បានបញ្ជាក់ឲ្យដឹងថា ក្រសួងលោកស្រីបានប្រាប់ទៅស្ថានទូតអូស្ត្រាលីប្រចាំក្រុងវ៉ាស៊ីនតោន អោយបើកការស៊ើបអង្កេត ស្វែងរកការពិតទាក់ទិននឹងករណី ដែលកងសមត្ថកិច្ចអាមេរិក បានប្រើអំពើហិង្សាមកលើអ្នកកាសែតអូស្ត្រាលី២នាក់ ក្នុងពេលបំបែកបាតុកម្មកាលពីរសៀលថ្ងៃចន្ទទី១មិថុនា។ លោកស្រីបន្ថែមថា លទ្ធផលនៃការស៊ើបអង្កេតយ៉ាងណា លោកស្រីតាងនាមឲ្យរដ្ឋាភិបាលអូស្ត្រាលី និងអាចសម្រេចថាត្រូវធ្វើអ្វីបន្តទៀត ជាមួយនឹងអាជ្ញាធរមានសមត្ថកិច្ចសហរដ្ឋអាមេរិក ជុំវិញរឿងនគរបាលប្រើអំពើហិង្សានេះ។
សូមបញ្ជាក់ថា អ្នកកាសែតអូស្ត្រាលី២នាក់ធ្វើការឲ្យបណ្តាញព័ត៌មាន 7NEWS ដែលកំពុងយកការណ៍ និងថតផ្សាយសកម្មភាពបាតុកម្ម នៅសួនឡាហ្វាយែត ក្បែរសេតវិមានកាលពីថ្ងៃចន្ទ ទី១មិថុនា បានរងនូវការប្រើអំពើហិង្សា ពីសំណាក់កងសមត្ថកិច្ចអាមេរិក។ នៅក្នុងវីដេអូ ដែលគេថតបាន គេឃើញនគរបាល បានយកខែការពារខ្លួន រុញបុកពោះអ្នកកាសែតដែលជាអ្នកកាន់កាមេរ៉ាថត ហើយបានដាល់ចំមុខមួយដៃ។ នរគបានម្នាក់ទៀត បានយកដំបងឆក់ វាលើខ្នងស្ត្រីអ្នកកាសែតម្នាក់ទៀត។ អ្នកកាសែតអូស្ត្រាលីទាំង២នាក់ បានអះអាងថា បានរងនូងគ្រាប់បាញ់កាំភ្លើងកៅស៊ូ ព្រមទាំងឧស្ម័នបង្ហូរទឹកភ្នែកផងដែរ។
គួរបញ្ជាក់ដែរថា ហេតុការណ៍នេះ បានកើតឡើង នៅក្នុងពេលដែលសមត្ថកិច្ច កំពុងព្យាយាមបំបែកហ្វូងបាតុករ ឲ្យចេញឆ្ងាយពីសេតវិមាន ដើម្បីបើកផ្លូវឲ្យលោកដូណាល់ ត្រាំ ធ្វើដំណើរចេញពីសេតវិមាន ឆ្ពោះទៅកាន់ ព្រះវិហារ Saint John។ វីដេអូដែលគេថតបាននូវហេតុការណ៍នេះ ត្រូវបានគេផ្សព្វផ្សាយ វិលចុះវិលឡើង នៅតាមបណ្តាញព័ត៌មានអូស្ត្រាលី។ លោកអគ្គរដ្ឋទូតសហរដ្ឋអាមេរិក ប្រចាំទីក្រុងកង់បេរ៉ា បានសរសេរនៅតាមទំព័រ Twitter ថា ប្រទេសលោកមិនអាចលេងសើច ជាមួយសកម្មភាពហិង្សារបស់នគរបាល មកលើអ្នកកាសែតបរទេសបែបនេះ បានទេ។
គួរកត់សំគាល់ថា អូស្រ្តាលី គឺជាប្រទេសដៃគូដ៏ស្និទស្នាលជាមួយនឹងសហរដ្ឋអាមេរិក។ ថ្លែងនៅតាមវិទ្យុ ABC លោកស្រី Marise Payne រដ្ឋមន្ត្រីការបរទេសអូស្ត្រាលី បានប្រយ័ត្នមាត់ប្រយ័ត្នក មិនហ៊ាននិយាយរិះគន់ដោយចំពោះ ទៅលើលោកដូណាល់ ត្រាំទេ។ លោកស្រី គ្រាន់តែបានលើកឡើងថា កាលៈទេសៈនេះ អាមេរិកកំពុងឆ្លងកាត់ការលំបាកខ្លាំង។ អូស្ត្រាលីគាំទ្រចំពោះសិទ្ធិធ្វើបាតុកម្មដោយសន្តិវិធី ហើយអូស្ត្រាលី សូមអំពាវនាវ ឲ្យគ្រប់ភាគីពាក់ព័ន្ធ រក្សាការអត់ធ្មត់ ចៀសឲ្យបាននូវការប្រើអំពើហិង្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ