បារាំងបដិសេធការចោទរបស់វ៉េណេស៊ុយអេឡា ដែលថាលោករ្ហាន់ ហ្កៃដូ ពួនសំងំក្នុងស្ថានទូត
នៅវ៉េណេស៊ុយអេឡា រដ្ឋាភិបាលលោកម៉ាឌូរ៉ូ កំពុងតាមចាប់ខ្លួន លោក រ្ហាន់ ហ្កៃដូ មេចលនាប្រឆាំង ដែលជាប់ចោទ ពីបទឃុបឃិតជាមួយបរទេស ធ្វើរដ្ឋប្រហាររំលំរដ្ឋាភិបាលវ៉េណេស៊ុយអេឡា។ រដ្ឋមន្ត្រីការបរទេសវ៉េណេស៊ុយអេឡា បានអះអាងថា លោក រ្ហាន់ ហ្កៃដូ កំពុងតែពួនសំងំលាក់ខ្លួន នៅក្នុងអាគារស្ថានទូតបារាំង ក្នុងរដ្ឋធានីការ៉ាកាស។ ការលើកឡើងនេះ ត្រូវបានក្រសួងការបរទេសបារាំង ឆ្លើយបដិសេធ នៅសុក្រទី៥មិថុនា។
ចុះផ្សាយនៅថ្ងៃ៖
ស្តាប់ - ០២:៤៥
« ទេ លោករ្ហ័ន ហ្កៃដូ មិនមានវត្តមានលាក់ខ្លួន សំងំនៅក្នុងអាគារស្ថានទូតបារាំង ក្នុងទីក្រុងការ៉ាកាស ដូចអ្វីដែលរដ្ឋមន្ត្រីក្រសួងការបរទេសវ៉េណេស៊ុយអេឡា លើកឡើងនោះទេ »។ នេះគឺជាការឆ្លើយតប របស់អ្នកនាំពាក្យក្រសួងការបរទេសបារាំង។ ឆ្លើយទៅកាន់អ្នកកាសែត AFP អ្នកនាំពាក្យក្រសួងការបរទេសបារាំង អះអាងថា ស្ថានទូតបារាំងប្រចាំនៅក្រុងការ៉ាកាស បានបដិសេធ និងឆ្លើយប្រាប់ទៅអាជ្ញាធរវ៉េណាស៊ុយអេឡា ជាច្រើនលើកច្រើនសារហើយ ថាលោក រ្ហាន់ ហ្កៃដូ មិនស្ថិតនៅក្នុងបរិវេណនៃស្ថានទូតបារាំងទេ។
សូមរំលឹកថា កាលពីថ្ងៃព្រហស្បតិ៍ទី ៤ មិថុនា លោករដ្ឋមន្ត្រីការបរទេសវ៉េណេស៊ុយអេឡា Jorge Arreaza បានអះអាងថា លោករ្ហ័ន ហ្កៃដូ មេចលនាប្រឆាំងនឹងរដ្ឋាភិបាលលោកម៉ាឌូរ៉ូ កំពុងលាក់ខ្លួនក្នុងស្ថានទូតបារាំង។ ចំណែកមេក្រុមប្រឆាំងម្នាក់ទៀត ឈ្មោះ Leopoldo Lopez កំពុងសំងំលាក់ខ្លួន នៅក្នុងនិវេសនដ្ឋានរបស់លោកអគ្គរាជទូតអេស្ប៉ាញ។ រដ្ឋមន្ត្រីការបរទេសវ៉េណេស៊ុយអេឡា លើកឡើងថា វាជារឿងអាម៉ាសបំផុតសម្រាប់បារាំង និងអេស្ប៉ាញ ដែលយកស្ថានទូតជាខែល លាក់ជនក្បត់ជាតិទាំងនោះ។
គួរបញ្ជាក់ផងដែរថា លោក រ្ហាន់ ហ្កៃដូ អតីតប្រធានសភា និងជាមេដឹកនាំចលនាប្រឆាំង ត្រូវបានរដ្ឋអាជ្ញាវេណេស៊ុយអេឡា ចោទពីបទឃុបឃិត និង ធ្វើសកម្មភាពនាំកម្លាំងមកពីបរទេស ចូលមកក្នុងទឹកដីវ៉េណេស៊ុយអេឡា ដើម្បីធ្វើរដ្ឋប្រហារ និងចាប់ខ្លួនលោកនីកូឡា ម៉ាឌូរ៉ូ។ រដ្ឋាភិបាលវ៉េណេស៊ុយអេឡា អះអាងថា « តែជាសំណាងល្អ ផែនការនេះ បានរលាយក្លាយជាផេះ ដោយសារកងទ័ពវ៉េណេស៊ុយអេឡា បានដឹងមុន និងចាំស្ទាក់ចាប់នៅឆ្នេរសមុទ្រ កាលពីថ្ងៃទី៣ឧសភា »។ យ៉ាងហោចណាស់ មានមនុស្ស៤៥នាក់ ដែលត្រូវចាប់ខ្លួន ក្នុងនោះ មាន២នាក់ ដែលគេអះអាងថា ជាអតីតទាហានអាមេរិក។ កាលពីថ្ងៃចន្ទដើមសប្តាហ៍នេះ លោកនីកូឡា ម៉ាឌូរ៉ូ បាននិយាយជាសាធារណៈ ថាលោក រ្ហាន់ ហ្កៃដូ ប្រហែលជាកំពុងសំងំលាក់ខ្លួន នៅតាមស្ថានទូរបរទេសណាមួយ។
គួរកត់សំគាល់ដែរថា បារាំង ក៏ដូចជាអេស្ប៉ាញ គឺជាប្រទេសធំៗ ក្នុងចំណោមប្រទេសជាង៥០ប្រទែស ដែលបានប្រកាសទទួលស្គាល់ លោក រ្ហាន់ ហ្កៃដូ ជាប្រធានាធិបតីបណ្តោះអាសន្នវ៉េណេស៊ុយអេឡា។ សម្រាប់ប្រទេសទាំងនេះ លទ្ធផលបោះឆ្នោត កាលពីខែឧសភា ឆ្នាំ២០១៨ ដែលបានផ្តល់ជ័យជំនះភ្លូកទឹកភ្លូកដី ទៅឲ្យលោកនីកូឡាម៉ាឌូរ៉ូនោះ គឺមិនអាចយកជាការបានទេ ព្រោះវាពោរពេញទៅដោយភាពមិនប្រក្រតីក្លែងបន្លំសន្លឹកឆ្នោត។
ថ្មីៗនេះ ក្រសួងការបរទេសបារាំង បានអះអាងថា អាជ្ញាធរវ៉េណេស៊ុយអេឡា បានធ្វើសកម្មភាពកៀបសង្កត់ ដាក់សំពាធមកលើលោក Romain Nadal អគ្គរដ្ឋទូតបារាំងប្រចាំក្រុងការ៉ាកាស។ តាំងតែពីថ្ងៃទី២ឧសភាមក និវេសនដ្ឋានរបស់លោកអគ្គរដ្ឋទូតបារាំង ត្រូវគេផ្តាច់ភ្លើងអគ្គីសនី និងចរន្តទឹក ហើយនៅលើដងផ្លូវ គឺមានទាហានវ៉េណេស៊ុយអេឡា ចាំយាមតាមដានជាប្រចាំ។ កាលពីថ្ងៃទី១៤ ឧសភា ក្រសួងការបរទេសបារាំង បានកោះអញ្ជើញអគ្គរដ្ឋទូតវ៉េណេស៊ុយអេឡា ប្រចាំក្រុងប៉ារីស មកសាកសួរ ពីបញ្ហាមិនគប្បី ដែលរំលោភលើអភ័យឯកសិទ្ធិការទូតនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ