អាមេរិករំលឹកថ្ងៃបិទបញ្ចប់ទាសភាព ក្នុងបរិបទបាតុកម្មប្រឆាំងការរើសអើងពូជសាសន៍
ពិធីរំលឹកខួប១៥៥ឆ្នាំនៃថ្ងៃបិទបញ្ចប់របបទាសភាពនៅអាមេរិក បានប្រព្រឹត្តទៅក្នុងបរិបទមួយដែលសង្គមអាមេរិកកំពុងរងរញ្ជួយដោយចលនាបាតុកម្មប្រឆាំងនឹងការរើសអើងប្រកាន់ពូជសាសន៍ និងអំពើហិង្សារបស់ប៉ូលិសស្បែកស លើជនជាតិអាមេរិកាំងស្បែកខ្មៅ។
ចុះផ្សាយនៅថ្ងៃ៖
ស្តាប់ - ០២:៣០
នៅគ្រប់ទីក្រុងក្នុងសហរដ្ឋអាមេរិក ពីញូវយ៉ក រហូតដល់ទីក្រុង ឡូសអង់ជេឡេស ក្នុងរដ្ឋកាលីហ្វនីញ៉ា ប្រជាជនអាមេរិកាំង រាប់ម៉ឺននាក់ ចូលរួមក្នុងក្បួនដង្ហែរ ដើម្បីរំលឹកខួប១៥៥ឆ្នាំ នៃការបិទបញ្ចប់ទាំងស្រុង របបទាសភាព នៅសហរដ្ឋអាមេរិក។
កាលពី១៥៥ឆ្នាំមុន នៅថ្ងៃទី ១៩មិថុនា ១៨៦៥ ទាសករស្បែកខ្មៅ នៅរដ្ឋតិចសាស់ ជាក្រុមទាសករចុងក្រោយគេ នៅអាមេរិក ដែលបានទទួលដំណឹងថា ពួកគេអាចមានសេរីភាព លែងធ្វើជាខ្ញុំទាសករឲ្យប្រជាជនស្បែកស តទៅទៀត។
នៅឆ្នាំនេះ ថ្ងៃបុណ្យរំលឹកខួប១៥៥ឆ្នាំ នៃការបិទបញ្ចប់ទាសភាព នៅអាមេរិករៀបចំឡើង នៅក្នុងបរិបទពិសេស ដែលសង្គមអាមេរិករងអង្រួនដោយមហាបាតុកម្ម ប្រឆាំងការរើសអើង ពូជសាសន៍ នៅពេញទឹកដីអាមេរិក នៅក្រោយ បុរសអាមេរិកាំងស្បែកខ្មៅ George Floyds ស្លាប់នៅក្នុងពេលឃាត់ខ្លួនរបស់ប៉ូលិសស្បែកស។
ចាប់តាំងពីព្រឹកថ្ងៃសុក្រ ប៉ូលិសត្រូវបានដាក់ពង្រាយ យ៉ាងក្រាសក្រែល នៅជុំវិញ សេតវិមាន ចំណែក ផ្លូវជាច្រើន ក្នុងរដ្ឋធានីវ៉ាស៊ីនតោន រួមទាំងទីលានPlaza ដែលធ្លាប់មានមហាបាតុកម្ម ដើម្បី ប្រឆាំង នឹងអំពើហិង្សា របស់ប៉ូលិស ត្រូវបានបិទខ្ទប់មិនឲ្យមានចរាចរណ៍ចេញចូល។
រងការចោទប្រកាន់ថា ជាប្រធានាធិបតីដែលបំបែកបំបាក់ប្រជាជនអាមេរិកាំង លោកដូណាល់ ត្រាំមិនដែលលើកនិយាយពីវិបត្តិរើសអើងពូជសាសន៍ ម្តងណាទេ ចាប់តាំងពីមានផ្ទុះបាតុកម្មប្រឆាំងអំពើហិង្សា របស់ប៉ូលិស និងការរើសអើងប្រកាន់ពូជសាសន៍ នៅអាមេរិក។ លោកដូណាល់ ត្រាំ ថែមទាំងចាក់សាំងលើភ្លើង នៅពេលលោកប្រកាសផ្តើមថ្ងៃយុទ្ធនាការឃោសនាបោះឆ្នោត របស់លោក នៅថ្ងៃទី ១៩មិថុនា ចំថ្ងៃ ដែលអាមេរិក រំលឹកខួប១៥៥ឆ្នាំនៃ ការបិទបញ្ចប់ទាសភាព។ យុទ្ធនាការឃោសនាឆ្នោតដំបូងរបស់លោកដូណាល់ត្រាំ នឹងត្រូវចាប់ផ្តើមដំបូង នៅទីក្រុង Tulsa ក្នុងរដ្ឋអូក្លាហាម៉ា ជាទី ដែលប្រជាជនអាមេរិកាំងស្បែកខ្មៅ ប្រមាណ ៣០០នាក់ ត្រូវបានជនជាតិស្បែកស សម្លាប់រង្គាល កាលពី៩៩ឆ្នាំមុន។
ទោះមានចលនាទាមទារសិទ្ធិពលរដ្ឋ នៅទសវត្សរ៍ ឆ្នាំ ១៩៦០ ប្រជាជនអាមេរិកាំងស្បែកខ្មៅ ដែលមានចំនួន១៣ភាគរយ នៅអាមេរិក ត្រូវបានគេបំភ្លេចចោល ក្នុងសង្គមដ៏រីកចម្រើនរបស់អាមេរិក។ មានជីវភាពក្រីក្រ គ្មានអ្នកតំណាងរបស់ខ្លួន នៅក្នុងថ្នាក់ដឹកនាំនយោបាយ ប្រជាជនអាមេរិកាំងស្បែកខ្មៅ ភាគច្រើន រងគ្រោះនឹងការរើសអើង និងត្រូវប្រឈមនឹងការចាប់ឃុំខ្លួន ជាងប្រជាជនទូទៅ។ វិបត្តិកូវីដបានធ្វើឲ្យប្រជាជនស្បែកខ្មៅ រងគ្រោះមួយជាន់បន្ថែមទៀត។ វិធានការបិទខ្ទប់ សេដ្ឋកិច្ច និងប្រទេស ធ្វើឲ្យពួកគេឈរជួរមុខគេ នៅក្នុងចំណោមអ្នករងគ្រោះ បាត់បង់ការងារធ្វើ ឬត្រូវរងគ្រោះឆ្លងជំងឺកូវីដ ដោយសារការងារដែលប្រឈមខ្លាំងនឹងជំងឺរាតត្បាតមួយនេះ។
តាំងពីថ្ងៃសុក្រ អាជ្ញាធរនៅទីក្រុង Tulsa ក្នុងរដ្ឋអូក្លាហាម៉ា បានប្រកាសបម្រាមគោចរណ៍ ដើម្បីត្រៀមថ្ងៃប្រមូលផ្តុំ យុទ្ធនាការឃោសនាបោះឆ្នោត របស់លោកដូណាល់ ត្រាំ ដែលត្រូវលើកមកធ្វើនៅថ្ងៃសៅរ៍នេះវិញ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ