NGO-អ.ស.ប.

NGO ស្នើអគ្គលេខាធិការអ.ស.ប.កុំឲ្យដកអារ៉ាប៊ីសាអូឌីត និងភូមាចេញពីក្រុមប្រទេសដែលរំលោភបំពានសិទ្ធិកុមារ

នៅថ្ងៃចន្ទ ទី២២ មិថុនា ក្រុមអង្គការក្រៅរដ្ឋាភិបាលបានទាមទារឲ្យអគ្គលេខាធិការអង្គការសហប្រជាជាតិលោក Antonio Guterres ពិនិត្យឡើងវិញលើសេចក្តីសម្រេចរបស់លោកដែលបានសម្រេចដកប្រទេសអារ៉ាប៊ីសាអូឌីត និងប្រទេសភូមាចេញពីបញ្ជីខ្មៅនៃបណ្តាប្រទេស និងក្រុមដែលរំលោភបំពានលើសិទ្ធិកុមារ។ គួររម្លឹកថា ការសម្រេចរបស់លោក Guterres បានធ្វើឡើងនៅក្នុងរបាយការណ៍ប្រចាំឆ្នាំស្តីពីស្ថានភាពកុមារនៅក្នុងតំបន់ជម្លោះដែលបានផ្សព្វផ្សាយកាលពីពាក់កណ្តាលខែមិថុនា។ អ្វីជាការកត់សម្គាល់ ការទាមទាររបស់ក្រុមអង្គការក្រៅរដ្ឋាភិបាលពេលនេះបានធ្វើឡើង ១ថ្ងៃមុនក្រុមប្រឹក្សាសន្តិសុខបើកកិច្ចប្រជុំតាម visioconference ដើម្បីជជែកលើរបាយការណ៍នោះ។

ចុះផ្សាយនៅថ្ងៃ៖ 23/06/2020 - 15:00កែប្រែថ្ងៃទី៖ 23/06/2020 - 21:22

លោក Kenneth Roth នាយកប្រតិបត្តិនៃអង្គការ Human Rights Watch ពេលធ្វើបទបង្ហាញរបាយការណ៍ នៅីញូយ៉ក ថ្ងៃទី១៤មករា ២០២០ REUTERS/Carlo Allegri

ដោយ៖ គួច គន្ធារ៉ា

ផ្សាយពាណិជ្ជកម្ម

នៅក្នុងលិខិតចំហមួយផ្ញើជូនអគ្គលេខាធិការអង្គការសហប្រជាជាតិលោក Antonio Guterres ក្រុមអង្គការក្រៅរដ្ឋាភិបាលចំនួន ២៤អង្គការ ក្នុងនោះមាន Human Rights Watch និង Amnesty International បានស្នើលោក Guterres ឲ្យលុបចោលវិញនូវការសម្រេចរបស់លោកដែលពួកគេចាត់ទុកជាការសម្រេចគួរឲ្យអាម៉ាស់។ គឺជាការសម្រេចដែលលោក Antonio Guterres បានដកអារ៉ាប៊ីសាអូឌីត និងភូមាចេញពីក្រុមប្រទេសដែលរំលោភបំពានលើសិទ្ធិកុមារ។ ទាក់ទងនឹងអារ៉ាប៊ីសាអូឌីត ក្រុម NGO ចង់និយាយពីការសម្លាប់ និងការកាត់អវយវៈកូនក្មេងពីកម្លាំងសម្ព័ន្ធអារ៉ាប់ដឹកនាំដោយអារ៉ាប៊ីសាអូឌីតនៅក្នុងប្រទេសយេម៉ែន។ សម្រាប់ភូមា ក្រុម NGO ចង់ផ្តោតលើការជ្រើសរើស និងប្រើកូនក្មេងពីសំណាក់កងទ័ពភូមា។

ក្រុម NGO យល់ឃើញថា ការសម្រេចរបស់លោក Antonio Guterres បានផ្ទុយនឹងតួលេខនៅក្នុងរបាយការណ៍ឆ្នាំ ២០១៩ ស្តីពីការរំលោភបំពាននៅយេម៉ែន និងភូមាដែលលោក Antonio Guterres បានផ្សព្វផ្សាយកាលពីពាក់កណ្តាលខែមិថុនាកន្លងទៅ។ លោក Antonio Guterres បានពន្យល់នៅក្នុងរបាយការណ៍កាលណោះថា ការសម្រេចដកអារ៉ាប៊ីសាអូឌីតចេញក៏ដោយសារតែលោកសម្គាល់ឃើញពីការធ្លាក់ចុះអំពើឃាតកម្ម និងអំពើកាត់អវយវៈដែលប្រព្រឹត្តិដោយកម្លាំងសម្ព័ន្ធអារ៉ាប់នៅយេម៉ែន។ គួររម្លឹកថា អារ៉ាប៊ីសាអូឌីតបានបង្កើតកម្លាំងសម្ព័ន្ធមិត្តអារ៉ាប់ក្នុងឆ្នាំ ២០១៥ ដើម្បីវាយប្រហារលើពួកឧទ្ទាមហ៊ូទីនៅយេម៉ែន។

ក្នុងឆ្នាំ ២០១៦ អង្គការសហប្រជាជាតិបានដាក់កម្លាំងសម្ព័ន្ធមិត្តអារ៉ាប់មួយនេះទៅក្នុងបញ្ជីខ្មៅនៃក្រុមប្រទេស និងអង្គការដែលរំលោភបំពានលើកូនក្មេង។ តែត្រូវបានដកចេញវិញក្នុងឆ្នាំ ២០១៧ ពោលនៅពេលលោក Antonio Guterres ចូលកាន់តំណែងជាអគ្គលេខាធិការ។ កាលណោះមានការលើកឡើងថា អារ៉ាប៊ីសាអូឌីតបានដាក់គំនាបដោយគំរាមផ្តាច់វិភាគទានឲ្យអង្គការសហប្រជាជាតិ។ តែលោក Antonio Guterres បានបញ្ជាក់ពីការគ្មានទទួលគំនាបពីអារ៉ាប៊ីសាអូឌីតទេ។ ទាក់ទងនឹងភូមាត្រូវបានលោក Antonio Guterres ពន្យល់នៅក្នុងរបាយការណ៍ថា លោកបានសម្គាល់ឃើញពីការធ្លាក់ចុះជាលំដាប់នៃការជ្រើសរើសកូនក្មេងពីកងទ័ព និងការបន្តអនុវត្តលើកិច្ចព្រមព្រៀងដើម្បីដោះលែងកូនក្មេងដែលបានជ្រើសរើសក្នុងឆ្នាំកន្លងមក។ តែកងកម្លាំងប្រដាប់អាវុធភូមានៅបន្តស្ថិតក្នុងបញ្ជីខ្មៅពីការស្លាប់ ការកាត់អវយវៈ និងការរំលោភផ្លូវភេទលើកុមារ។

យ៉ាងណាក៏ដោយ អង្គការ Save the Children បានស្នើឲ្យលោក Antonio Guterres ពិនិត្យមើលឡើងវិញលើសេចក្តីសម្រេចរបស់ខ្លួនទាក់ទងនឹងប្រទេសភូមា និងស្នើឲ្យប្រទេសសមាជិកអង្គការសហប្រជាជាតិធ្វើការវាយតម្លៃឯករាជ្យមួយស្តីពីរបៀបវាយតម្លៃ និងការសម្រេចចិត្តរបស់លោក Antonio Guterres៕