មូលនិធិរូបិយវត្ថុថាសេដ្ឋកិច្ចពិភពលោកដើរថយខ្លាំងហួសការស្មាន និងពិបាកព្យាករឱ្យប្រាកដ
ដោយហេតុកូវីដ១៩ ពិភពលោកត្រូវខាតបង់សេដ្ឋកិច្ចអស់ជាង ១២០០០លានដុល្លារអាមេរិកនៅឆ្នាំ២០២០ និងឆ្នាំ២០២១។ ជាវិបត្តិដ៏ធ្ងន់ធ្ងរមិនដូចវិបត្តិដទៃ អាក្រក់ជាងការគិត និងអាចងើបឡើងវិញយ៉ាងយឺតជាទីបំផុត។ នេះបើតាមការអះអាងរបស់មូលនិធិរូបិយវត្ថុអន្តរជាតិ ដោយបានព្យាករ ទៀតថា សេដ្ឋកិច្ចពិភពលោកនឹងដើរថយក្រោយខ្លាំង ដល់ទៅ៤,៩%មិនមែនត្រឹម3%ដូចការព្យាករកាលពីខែមេសា២០២០ឡើង។
ចុះផ្សាយនៅថ្ងៃ៖
ស្តាប់ - ០២:៤៦
នៅក្នុងរបាយការណ៍ចុងក្រោយស្តីពីទស្សនៈវិស័យសេដ្ឋកិច្ចពិភពលោក ចេញផ្សាយនៅថ្ងៃពុធទី ២៤មិថុនា ២០២០ មូលនិធិរូបិយវត្ថុអន្តរជាតិបានព្យាករថា បើយោលទៅលើស្ថានភាពវិវឌ្ឍន៍របស់កូវីដ១៩នាពេលបច្ចុប្បន្ន និងស្ថានភាពសេដ្ឋកិច្ចចាប់ដំណើរឡើងវិញជាបណ្តើរៗនៅឆមាសទីពីរ សេដ្ឋកិច្ចពិភពលោកនឹងដើរថយក្រោយខ្លាំង ដល់ទៅ៤,៩% ប៉ុន្តែការព្យាករនេះ មិនជាក់លាក់យកតែមែនទែន។ ហេតុដូច្នេះហើយបានជាក្រុមអ្នកជំនាញសេដ្ឋកិច្ចផ្តោតលើសម្មតិកម្មពីរ ៖ ទីមួយ អ្នកជំនាញឧបមាថា ពិភពលោកនឹងមានរលករាតត្បាតកូវីដ១៩ជាលើកទីពីរ នៅដើមឆ្នាំ២០២១។ សេណារីយោទីពីរ គឺសេដ្ឋកិច្ចចាប់កំរើកឡើងវិញ និងលឿនជាងការគិតនាពេលនេះ។
ប្រសិនបើពិភពលោកពិតជារងការរាតត្បាតកូវីដ១៩ជាលើកទីពីរ នៅដើមឆ្នាំក្រោយមែន នោះនឹងមានការបិទខ្ទប់បង្ឃាំងប្រជាពលរដ្ឋជាថ្មី ដើម្បីទប់ស្កាត់ការចម្លង ប៉ុន្តែផលប៉ះពាល់សេដ្ឋកិច្ចនឹងមិនធ្ងន់ធ្ងរខ្លាំងដូចការវិធានការបិទខ្ទប់ដំបូងទេ។ ដោយធ្លាប់បានឆ្លងកាត់បទពិសោធន៍ម្តងហើយ ប្រទេសនីមួយៗទំនងជាអាចនឹងជ្រើសរើសធ្វើចត្តាឡីស័កដោយផ្នែកៗ បិទបង្ឃាំងតែពលរដ្ឋងាយរងគ្រោះឬប្រជាជនមួយក្រុមណាមួយច្បាស់លាស់ ជាជាងសម្រេចបិទបង្ឃាំងប្រជាជនទាំងស្រុង។ ក្នុងសេណារីយោបែបនេះ សកម្មភាពសេដ្ឋកិច្ចឆ្នាំ២០២១នឹងមានកំណើនទាបខ្លាំង ត្រឹមតែប្រមាណ០,៥% ប៉ុណ្ណោះ ទល់នឹង៥,៤%បើប្រៀបទៅនឹងការព្យាករស្ថានភាពដូចបច្ចុប្បន្ន។
ផ្ទុយទៅវិញ បើសេដ្ឋកិច្ចអាចចាប់ដំណើរការឡើងវិញ នៅឆមាសទីពីរ លឿនលើសពីគ្រោងទុក ព្រោះប្រទេសលើកការបិទខ្ទប់មានប្រសិទ្ធភាព (ប្រជាពលរដ្ឋគោរពគម្លាតសុវត្ថិភាពសុខភាព ធ្វើតេស្តវិភាគរកអ្នកកូវីដបានច្រើន ដាក់អ្នកមានកូវីដ១៩ឱ្យនៅដាច់ដោយឡែក...) ដែលជំរុញឱ្យប្រជាជនឆាប់មានទំនុកចិត្ត ក្រុមហ៊ុនឆាប់ត្រលប់មកដំណើរជាធម្មតាឡើងវិញ។ ក្នុងសម្មតិកម្ម មូលនិធិរូបិយវត្ថុប៉ាន់ស្មានថា ដំណើរសេដ្ឋកិច្ចដើរថយក្រោយនឹងត្រូវកាត់បន្ថយបានកន្លះពិន្ទុ ពោលគឺថយតែ៤,៥% ហើយនឹងហក់ស្ទុះឡើងវិញនៅឆ្នាំ២០២១ ក្នុងកំរិតលើសពី៣%។
ប៉ុន្តែមូលនិធិរូបិយវត្ថុបានសន្និដ្ឋានបញ្ចប់ថា ការព្យាករនេះគ្មានលក្ខណៈប្រាកដប្រជាទេ ជាពិសេសការព្យាករក្នុងសម្មតិកម្មទីមួយ ព្រោះរលកទីពីរអាចកើតឡើងបានគ្រប់ពេលវេលា ឬអាចនៅមុនដំណាច់ឆ្នាំ២០២០ផង។ បើការរាតត្បាតកូវីដ១៩រលកទីពីរ ផ្ទុះឡើងនៅរដូវស្លឹកឈើជ្រុះឆ្នាំនេះ និងមិនមែននៅដើមឆ្នាំ២០២១ នោះផលអវិជ្ជមាននៃសេដ្ឋកិច្ចឆ្នាំ២០២០នឹងអាក្រក់ខ្លាំង។ ខ្លាំងជាងតួលេខនៃការព្យាករពេលនេះឆ្ងាយណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ