ក្រុមហ៊ុនច្រើនធ្វើពហិការមិនផ្សាយពាណិជ្ជកម្មតាមហ្វេសប៊ុក ដើម្បីប្រឆាំងនឹងការរើសអើងពូជសាសន៍
ក្រុមហ៊ុនម៉ាកល្បីៗ ជិត២០០ ដូចជាក្រុមហ៊ុនកូកាកូឡា ឡឺវីស ឬស្តារបឺក ឬហ្វដ Coca-Cola, Levis, Starbucks … បានធ្វើពិហិការនៅពេលនេះ មិនផ្សាយពាណិជ្ជកម្ម នៅលើបណ្តាញសង្គមហ្វេសប៊ុកទេ។ ជាការធ្វើពហិការដើម្បីដាក់គំនាបលើក្រុមហ៊ុនហ្វេសប៊ុកដែលមិនចាត់វិធានការប្រយុទ្ធប្រឆាំងនឹងស្អប់ខ្ពើមរើសអើងពូជសាសន៍នៅលើបណ្តាញ។ ចលនានេះបានធ្វើតម្លៃភាគហ៊ុនហ្វេសប៊ុកដាំក្បាលចុះជាខ្លាំង ប៉ុន្តែទំនងជាមានឥទ្ធិពលតិចតួចណាស់ក្នុងជំរុញឱ្យក្រុមហ៊ុនប្តូរផ្លាស់ជំហរ។
ចុះផ្សាយនៅថ្ងៃ៖
អង្គការក្រៅរដ្ឋាភិបាល និងសមាគមការពារសិទ្ធិពលរដ្ឋអាមេរិកស្បែកខ្មៅជាច្រើន ព្រមទាំងអង្គការប្រយុទ្ធប្រឆាំងនឹងការស្អប់ខ្ពើមអ៊ីស្រាអែល បានអំពាវនាវហៅក្រុមហ៊ុនទាំងឡាយឱ្យបង្ហួតប្រាក់ចំណូលពេញមួយខែកក្កដារបស់ក្រុមហ៊ុនហ្វេសប៊ុក តាមរយៈការធ្វើពហិការមិនផ្សាយពាណិជ្ជកម្មលើទំព័រហ្វេសប៊ុក។ គឺជាការធ្វើពហិការ គឺដើម្បីដាក់សម្ពាធលើក្រុមហ៊ុនហ្វេសប៊ុកដែលធ្វើគថ្លង់ឬបដិសេធមិនព្រមសើរើវិធានផ្ទៃក្នុងនៃការប្រើប្រាស់បណ្តាញសង្គម ឬចេញវិធានការថ្មីទប់ស្កាត់ការផ្សព្វផ្សាយបង្ហោះពាក្យសំដីបែបញុះញង់ស្អប់ខ្ពើមគ្នានិងបែបប្រកាន់ពូជសាសន៍។
ឆ្លើយតបនឹងការអំពាវនាវនេះ ក្រុមហ៊ុនកាន់តែច្រើន ខ្លះទាមទារឱ្យបន្តធ្វើយុទ្ធនាការ ខ្លះប្រកាសផ្អាកឈប់ផ្សាយពាណិជ្ជកម្មតាមបណ្តាញហ្វេសប៊ុកតែម្តង។ គ្រាន់តែក្រុមហ៊ុនម៉ាកល្បីៗបានមកចូលរួមធ្វើពហិការភ្លាម ភាគហ៊ុនរបស់ក្រុមហ៊ុនហ្វេសប៊ុកបានដាំក្បាលធ្លាក់ខាតបង់អស់ ៥០ពាន់លានដុល្លារនៅថ្ងៃសុក្រទី ២៦មិថុនា ២០២០ និងងើបឡើងវិញបាន១០ពាន់លានដុល្លារវិញនៅថ្ងៃចន្ទទី ២៩មិថុនាម្សិលមិញ។
សូមបញ្ជាក់ថា ម្ចាស់ក្រុមហ៊ុនហ្វេសប៊ុក ធ្លាប់ចេញមុខការពារខ្លួនចំពោះភាពធូររលុងជ្រុល បណ្តោយឱ្យពាក្យសំដីបែបស្អប់ខ្ពើមនិងរើងអើងពូជសាសន៍បង្ហោះពេញប្រព័ន្ធពីសំណាក់អ្នកប្រើប្រាស់សាមញ្ញផង អ្នកនយោបាយផង ក្រោមហេតុផលនៃគោលការណ៍ការពារសេរីភាពនៃការបញ្ចេញមតិ។ ប៉ុន្តែនៅចំពោះមុខគំនាបកាន់តែខ្លាំង និងការធ្វើពហិការប៉ះពាល់ដល់ចំណូល ដែលគេមិនអាចវាស់វែងអំពីផលវិបាកបាន ហ្វេសប៊ុកបានប្រកាសធ្វើសម្បទានខ្លះ កាលពីថ្ងៃសុក្រ ដោយសន្យាថានឹងដកចេញនូវរាល់គ្រប់ទម្រង់នៃការផ្សាយពាណិជ្ជកម្មដែលញុះញង់ឱ្យមានការស្អប់ខ្ពើមគ្នា ហើយចំពោះសារនយោបាយបង្កប់អត្ថន័យរើសអើងពូជសាសន៍ឬស្អប់ខ្ពើមគ្នាអាចនឹងត្រូវបិទ ដូចអ្វីដែលទ្វីតទ័រធ្វើ។
ក្រុមអង្គការសមាគម មិនស្កប់ចិត្តនឹងចំណាត់ការថ្មីរបស់ហ្វេសប៊ុកទេ និងសន្យាបន្តដាក់សម្ពាធលើក្រុមហ៊ុននេះទៀត។ តែ ហ្វេសប៊ុកមានអ្នកប្រើប្រាស់ដល់ទៅជាងពីរពាន់៦រយលាននាក់ តើក្រុមហ៊ុនម៉ាកធំៗ ទ្រាំមិនទិញពាណិជ្ជកម្មដែលអាចទាក់ទាញអតិថិជនដ៏ច្រើនបំផុតនេះបានយូរប៉ុនណាទៅ ?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ