អ៊ីរ៉ង់ប្តឹងកងទ័ពអាមេរិកដែលបើកយន្តហោះចម្បាំងបៀតបៀនយន្តហោះដឹកអ្នកដំណើរអ៊ីរ៉ង់
អាជ្ញាធរអ៊ីរ៉ង់ កាលពី ថ្ងៃសៅរ៍ម្សិលមិញ បានប្រាប់អ្នកដំណើរនៅលើយន្តហោះអ៊ីរ៉ង់ Mahan Air ថា ពួកគេអាចប្តឹងមេបញ្ជាការកងទ័ពអាមេរិក ទៅតុលាការអ៊ីរ៉ង់ នៅបន្ទាប់ពី យន្តហោះចម្បាំងអាមេរិក ហោះចូលមកកៀក យ៉ាងគ្រោះថ្នាក់ យន្តហោះដឹកអ្នកដំណើរអ៊ីរ៉ង់ នៅថ្ងៃព្រហស្បតិ៍សប្តាហ៍នេះ។ បញ្ជាការដ្ឋានកណ្តាលអាមេរិកដែលគ្រប់គ្រងប្រតិបត្តិការអាមេរិកនៅតំបន់ដើមបូព៌ា អះអាងទៅវិញថា យន្តហោះចម្បាំងអាមេរិកបើកប្រតិបត្តិការតាមទម្លាប់ នៅក្នុងដែនអាកាសស៊ីរី ជាទីដែលអាមេរិករក្សាវត្តមានទ័ពរបស់ខ្លួន។
ចុះផ្សាយនៅថ្ងៃ៖
ស្តាប់ - ០១:៥៩
តាមអាជ្ញាធរអ៊ីរ៉ង់ យន្តហោះចម្បាំងរបស់អាមេរិកពីរគ្រឿងបានហោះចូលទៅយ៉ាងជិតយន្តហោះដឹកអ្នកដំណើរ អ៊ីរ៉ង់ កាលពីថ្ងៃព្រហស្បតិ៍។ ការណ៍នេះបានតម្រូវឲ្យអ្នកបើកបរយន្តហោះអ៊ីរ៉ង់ ត្រូវផ្លាស់ប្តូរ ដោយប្រថុចញ៉ុច ដោយបញ្ចុះរយៈកំពស់ហោះហើរ ដើម្បី ជៀសវាង ការបើកបុកជល់នឹងយន្តហោះចម្បាំងអាមេរិក។
នៅថ្ងៃយប់ថ្ងៃព្រហស្បតិ៍ ទូរទស្សន៍អ៊ីរ៉ង់បានបង្ហាញវីដេអូ ថតបាន នៅក្នុងយន្តហោះ ដែល នៅក្នុងនោះ គេឃើញ អ្នកដំណើរបែករបួសក្បាល ដួលក្រាបទៅលើដី និងសំឡេងស្រែកពេញយន្តហោះ។ នៅក្រោយហេតុការណ៍ យន្តហោះMahan Air របស់អ៊ីរ៉ង់ដែលចាកចេញពីទីក្រុងតេហេរ៉ង់ បានទៅចុះចតដោយសុវត្ថិភាព នៅទីក្រុងបីរូត ប្រទេសលីបង់។ ប៉ុន្តែ សម្រាប់អាជ្ញាធរអ៊ីរ៉ង់ រាល់អ្នកដំណើរ នៅលើយន្តហោះ អាចប្តឹង មេបញ្ជាការបែបភេរវនិយមនៃកងទ័ពអាមេរិក ទៅតុលាការអ៊ីរ៉ង់ ពីបទ ប្រមាថ បង្កគ្រោះថ្នាក់ដល់អាយុជីវិតរបស់ពួកគេ។
នៅថ្ងៃសុក្រ អាជ្ញាធរអ៊ីរ៉ង់ បានដាក់ពាក្យប្តឹងអាមេរិករួចហើយ ទៅអង្គការអាកាសចរណ៍ស៊ីវិលអន្តរជាតិ និងតុលាការយុត្តិធម៌អន្តរជាតិ។ អ៊ីរ៉ង់បានអះអាងដែរថា បន្ទាប់ពីនេះ ខ្លួននឹងដាក់លិខិតប្តឹងអាមេរិកបន្ថែមទៀត ទៅក្រុមប្រឹក្សាសន្តិសុខ និងអគ្គលេខាធិការអង្គការសហប្រជាជាតិ។
នៅក្នុងសេចក្តីថ្លែងការណ៍ កាលពីថ្ងៃសុក្រ បញ្ជាការដ្ឋានកណ្តាលរបស់អាមេរិក ដែលគ្រប់គ្រងប្រតិបត្តិការអាមេរិកនៅតំបន់ដើមបូព៌ា បានពន្យល់វិញថា យន្តហោះអាមេរិកមួយគ្រឿងដែលបើកប្រតិបត្តិការទៅតាមទម្លាប់ នៅក្នុងលំហអាកាសស៊ីរី បានហោះ នៅចម្ងាយ ១០០០ម៉ែត្រពីយន្តហោះដឹកអ្នកដំណើរអ៊ីរ៉ង់ ពោលគឺទៅតាមបទដ្ឋានអន្តរជាតិ។ បន្ទាប់ពីកំណត់បានថា យន្តហោះអ៊ីរ៉ង់ជាយន្តហោះដឹកអ្នកដំណើរ អ្នកបើកយន្តហោះចម្បាំងអាមេរិក បានដកឃ្លាថយ ដោយមិនបង្កគ្រោះថ្នាក់អ្វីសោះ ដល់យន្តហោះអ៊ីរ៉ង់Mahan Air។
សម្រាប់អនុរដ្ឋមន្រ្តីយុត្តិធម៌អ៊ីរ៉ង់ វត្តមានរបស់យន្តហោះចម្បាំងអាមេរិក នៅក្នុងគន្លងហោះហើររបស់យន្តហោះស៊ីវិល ស្តែងយ៉ាងច្បាស់ពីការរំលោភដ៏គឃ្លើនទៅលើច្បាប់អន្តរជាតិ ពីសំណាក់កងទ័ពអាមេរិក។ ការប្រមាថរបស់អាមេរិក គឺជាគ្រោះថ្នាក់គំរាមកំហែង ជីវិតរបស់មនុស្សនៅលើយន្តហោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ