លោកចូ បៃដិន ជ្រើសរើសស្ត្រីអាមេរិកស្បែកខ្មៅជាបេក្ខនារីអនុប្រធានាធិបតី
បេក្ខជនប្រធានាធិបតីបក្សប្រជាធិបតេយ្យអាមេរិក លោកចូ បៃដិន បានសម្រេចតែងតាំងសមាជិកព្រឹទ្ធសភាអ្នកស្រី ខាម៉ាឡា ហារីស (Kamala Harris) ជាបេក្ខនារីអនុប្រធានាធិបតី កាលពីថ្ងៃអង្គារម្សិលមិញ។ ការសម្រេចនេះ បានដៅកណត់សម្គាល់ជាប្រវត្តិសាស្ត្រលើកដំបូងបង្អស់មួយ សម្រាប់ស្ត្រីស្បែកខ្មៅ និងស្ត្រីអាមេរិកាំងដើមកំណើតអាស៊ី នៅក្នុងសហរដ្ឋអាមេរិក។ តើអ្នកស្រីខាម៉ាឡា ហារីស ជាអ្នកណា?
ចុះផ្សាយនៅថ្ងៃ៖
ស្តាប់ - ០២:២៥
ការប្រកាសរបស់លោកចូ បៃដិន ខាងលើ ធ្វើឡើងក្រោយការស្វែងរកបេក្ខជនអនុប្រធានាធិបតីយ៉ាងស្វិតស្វាញរយៈពេលជាច្រើនខែ ដើម្បីអាចជ្រើសរើសបានដៃគូដ៏ល្អស័ក្តិសម និងដើម្បីអាចប្រកួតប្រជែងយកឈ្នះលោកដូណាល់ ត្រាំ ក្នុងការបោះឆ្នោតនាខែវិច្ឆិកាខាងមុខ។
សេចក្តីសម្រេចនេះ មិនត្រឹមតែមានឥទ្ធិពលខ្លាំងក្នុងការធ្វើយុទ្ធនាការបោះឆ្នោតប្រធានាធិបតីអាមេរិកនាពេលខាងមុខឆាប់ៗនេះប៉ុណ្ណោះទេ តែវាក៏មានសារៈសំខាន់ខ្លាំងណាស់ផងដែរសម្រាប់អនាគតគណបក្សប្រជាធិបតេយ្យ។
អ្នកស្រីខាម៉ាឡា ហារីស ដែលអាចនឹងក្លាយជាអនុប្រធានាធិបតីស្ត្រីដំបូងគេរបស់អាមេរិក ប្រសិនបើជាប់ឆ្នោត គឺជាមនុស្សស្រីម្នាក់ដែលក្លាហាន មិនខ្លាចនឹងប្រកួតប្រជែងតតាំងជាមួយដៃគូជាបុរស និងជាមន្ត្រីបម្រើប្រជាជនដ៏ឆ្នើមម្នាក់របស់ប្រទេស។ នេះ គឺជាប្រសាសន៍របស់លោកចូ បៃដិន។ ទន្ទឹមគ្នានេះ លោកបៃដិន ថាលោកពិតជាមានមោទនភាពដែលទទួលបានអ្នកស្រីហារីស ជាដៃគូសម្រាប់ធ្វើយុទ្ធនាការបោះឆ្នោត។
មានវ័យ ៥៥ ឆ្នាំ អ្នកស្រីហារីស ដែលធ្លាប់បានឈរឈ្មោះប្រកួតប្រជែងយកតំណែងបេក្ខជនប្រធានាធិបតីបក្សប្រជាធិបតេយ្យនៅឆ្នាំ ២០២០ តទល់នឹងលោកបៃដិន បាននិយាយថា អ្នកស្រីពិតជាមានកិត្តិយសណាស់ ដែលត្រូវបានជ្រើសរើសឲ្យក្លាយជាបេក្ខនារីអនុប្រធានាធិបតី។ បន្ថែមលើនេះ អ្នកស្រីថានឹងខិតខំធ្វើអ្វីៗគ្រប់យ៉ាងទាំងអស់ឲ្យតែអាចជួយលោកចូ បៃដិន ឲ្យឈ្នះការបោះឆ្នោតប្រធានាធិបតីអាមេរិកបាន។
គួរគូសបញ្ជាក់ជូនថា អ្នកស្រីខាម៉ាឡា ហារីស ដែលជាអតីតមេធាវីរដ្ឋកាលីហ្វ័រញ៉ា គឺជាស្ត្រីស្បែកខ្មៅ និងស្ត្រីអាមេរិកាំងមានជាប់ឈាមជ័រឥណ្ឌាដំបូងគេ ដែលត្រូវបានជ្រើសរើសជាបេក្ខនារីអនុប្រធានាធិបតីរបស់អាមេរិក។
រហូតមកដល់ពេលនេះដែរ អ្នកស្រី គឺជាបេក្ខនារីអនុប្រធានាធិបតីស្ត្រីអាមេរិកទីបីហើយបន្ទាប់ពីឥស្សរជននយោបាយស្ត្រីកំពូលៗអាមេរិកពីររូបគឺអ្នកស្រីហ្សឺរ៉លឌីន ហ្វ្រឺរ៉ារ៉ូ Geraldine Ferraro ដែលបានជាប់ឈ្មោះជាបេក្ខនារីអនុប្រធានាធិបតីបក្សប្រជាធិបតេយ្យនៅឆ្នាំ ១៩៨៤ និងអ្នកស្រី សារ៉ា ផាលីន (Sarah Palin) បេក្ខនារី អនុប្រធានាធិបតីមកពីគណបក្សសាធារណរដ្ឋក្នុងឆ្នាំ ២០០៨។ ដោយឡែក អ្នកស្រីហ៊ីលឡារី គ្លីនតុន គឺជាបេក្ខនារីប្រធានាធិបតីស្ត្រីអាមេរិកដំបូងគេ និងដែលបានចាញ់ការបោះឆ្នោតនៅក្រោមដៃលោកដូណាល់ ត្រាំ កាលពីឆ្នាំ ២០១៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ