រដ្ឋមន្រ្តីការបរទេសអាមេរិក៖ លោកដូណាល់ ត្រាំ សរសេរសំបុត្រផ្ទាល់ខ្លួន ទៅប្រធានាធិបតីស៊ីរី
លោកប្រធានាធិបតី អាមេរិក ដូណាល់ ត្រាំ បានសរសេរសំបុត្រ ផ្ទាល់ខ្លួន មួយច្បាប់ ផ្ញើទៅប្រធានាធិបតីស៊ីរី ដើម្បីនិយាយពីករណីអ្នកកាសែតជនជាតិ អាមេរិកាំង Austin Tice ដែលបានបាត់ខ្លួន ក្នុងទឹកដីស៊ីរី កាលពីឆ្នាំ ២០១២។ ដំណឹងនេះ ត្រូវបានប្រមុខការបរទេសអាមេរិក លោកMike Pompeo ប្រកាសឲ្យដឹងជាសាធារណៈ នៅថ្ងៃសុក្រម្សិលមិញ នៅក្នុងឱកាសខួប ៨ឆ្នាំនៃការបាត់ខ្លួន របស់អ្នកកាសែតAustin Tice។
ចុះផ្សាយនៅថ្ងៃ៖
ស្តាប់ - ០២:០៩
តាមរដ្ឋមន្រ្តីការបរទេសអាមេរិក លោកដូណាល់ ត្រាំ បានសរសេរផ្ញើសំបុត្រមួយច្បាប់ ទៅប្រធានាធិបតី ស៊ីរី លោកបាស្ហា អាល់អាសាដ កាលពីខែមីនា ដើម្បីស្នើឲ្យមានការពិភាក្សា ផ្ទាល់ជាមួយ មេដឹកនាំស៊ីរី ពីរឿងអ្នកកាសែត Austin Tice ដែលបានបាត់ខ្លួន នៅទឹកដីស៊ីរី កាលពី ៨ឆ្នាំ មុន។
មានអាយុ ៣១ឆ្នាំ នៅក្នុងពេលបាត់ខ្លួន Austin Tice ធ្លាប់ធ្វើការជាអ្នកកាសែត ថតរូប ឲ្យទីភ្នាក់ងារព័ត៌មានបារាំង AFP កាសែត The Washington Post និងអង្គការព័ត៌មានអន្តរជាតិផ្សេងទៀត នៅមុនពេលបាត់ខ្លួន នៅច្រកត្រួតពិនិត្យ ក្បែរទីក្រុងដាម៉ាស នៅថ្ងៃទី១៤ សីហា ឆ្នាំ ២០១២។ មួយខែក្រោយ មានរូបភាពវីដេអូ ដែលបង្ហាញAustin Tice ចាប់ ចងបិទបិទមុខដោយក្រុមប្រដាប់អាវុធ មិនស្គាល់មុខ។ ចាប់តាំងពីពេលនោះ មក គេមិនដឹងថា តើអ្នកកាសែត អាមេរិកាំង Austin Tice ស្លាប់ ឬក៏រស់នោះទេ។
នៅខែមីនា លោកដូណាល់ ត្រាំ បាននិយាយថា អាមេរិក បានផ្ញើសំបុត្រ ទៅអាជ្ញាធរស៊ីរី ដើម្បីនិយាយពីការបាត់ខ្លួនរបស់អ្នកកាសែត Austin Tice ប៉ុន្តែ លោកមិនបានបញ្ជាក់ទេ គឺលោកផ្ទាល់ ដែលសរសេរនោះ ទៅកាន់ប្រមុខដឹកនាំស៊ីរី លោកបាសា្ហ អាល់អាសាធ ដែលអាមេរិកបានទាមទារ ចង់ឲ្យចុះចេញពីតំណែង។ នៅពេលនោះដែរ លោកដូណាល់ ត្រាំ បាននិយាយថា លោកមិនបានដឹងទេថា តើអ្នកកាសែត Tice នៅមានជីវិតដែរឬទេ។
នៅក្នុងសេចក្តីថ្លែងការណ៍ កាលពីថ្ងៃសុក្រ ទាក់ទងនឹងករណីបាត់ខ្លួនរបស់Justin Tice រដ្ឋមន្រ្តីការបរទេសអាមេរិកបាននិយាយថា គេមិនត្រូវសង្ស័យពីការប្តេជ្ញាចិត្តរបស់លោកប្រធានាធិបតីដូណាល់ ត្រាំនោះទេ។ លោកដូណាល់ ត្រាំ ដែលចង់ឲ្យរាល់ជនជាតិអាមេរិកាំង ដែលត្រូវគេចាប់ជំរិត ដោយខុសច្បាប់នៅបរទេស ជាពិសេស អ្នកJustin Tice អាចត្រលប់ចូលប្រទេសវិញ។ សម្រាប់ប្រមុខការបរទេសអាមេរិក រដ្ឋបាលរបស់លោកដូណាល់ ត្រាំ នឹងព្យាយាម ជំរុញ ឲ្យមានការដោះលែង និងនាំយកអ្នកកាសែត Tice ត្រលប់មកអាមេរិកវិញ។
នៅឆ្នាំមុន រដ្ឋាភិបាលអាមេរិកជឿថា Austin Tice នៅមានជីវិតនៅឡើយ។ នៅឆ្នាំ ២០១៨ អាជ្ញាធរអាមេរិកបានប្រកាសផ្តល់រង្វាន់ ១លានដុល្លារ សម្រាប់អ្នកដែលជួយឲ្យគេអាចទៅរកឃើញ អ្នកកាសែតអាមេរិកាំង។ ម្តាយរបស់Justin Tice វិញធ្លាប់អះអាងកាលពីខែមករា កន្លងទៅថា គាត់បានទទួលព័ត៌មានគួរឲ្យជឿជាក់ថា កូនប្រុសរបស់គាត់ កំពុងនៅរស់ មានជីវិតនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ