ធនាគារពិភពលោក៖កូវីដ-១៩ អាចបង្កឲ្យមានអ្នកក្រីក្រខ្លាំងបន្ថែមចំនួន ១០០លាននាក់
នៅថ្ងៃព្រហស្បតិ៍ ទី២០ សីហា ធនាគារពិភពលោកបានព្រមានពីការអាចមានអ្នកក្រីក្រខ្លាំងចំនួន ១០០លាននាក់បន្ថែមទៀតដែលបង្កឡើងដោយជំងឺកូវីដ-១៩។ ការព្រមាននេះបានធ្វើឡើងដោយប្រធានធនាគារពិភពលោក លោកដេវីដ ម៉ាល់ផាស់នៅក្នុងបទសម្ភាសន៍ជាមួយ AFP។ តាមលោកម៉ាល់ផាស់ តួលេខ ១០០លាននាក់នេះអាចនឹងមានការកើនឡើងបន្ថែមទៀត ប្រសិនបើវិបត្តិកូវីដ-១៩ កាន់តែធ្ងន់ធ្ងរ ឬអូសបន្លាយពេលយូរ។ គួររម្លឹកថានៅក្នុងព្យាករលើកមុន ធនាគារពិភពលោកបានតួលេខត្រឹមតែ ៦០លាននាក់ប៉ុណ្ណោះ។ ទន្ទឹមនឹងព្រមានពីកំណើនអ្នកក្រីក្រខ្លាំង ធនាគារពិភពលោកក៏បានអំពាវនាវឲ្យក្រុមប្រទេសម្ចាស់បំណុលកាត់បន្ថយប្រាក់បំណុលពីក្រុមប្រទេសក្រីក្រខ្លាំងជាជាងពន្យារពេលសងប្រាក់បំណុល។
ចុះផ្សាយនៅថ្ងៃ៖
ស្តាប់ - ០២:២៤
អ្វីដែលធនាគារពិភពលោកចង់ឃើញ និងចង់បាន គឺការកាត់បន្ថយប្រាក់បំណុលជាជាងលើកពេលសងប្រាក់បំណុល ព្រោះភាពងាយរងគ្រោះដែលជាប់ពាក់ព័ន្ធនឹងប្រាក់បំណុលមានកម្រិតខ្ពស់។ គួររម្លឹកថាក្នុងខែមេសាកន្លងទៅ ក្រុមប្រទេស G២០ បានសម្រេចព្យួរការសងបំណុលរបស់ក្រុមប្រទេសក្រីក្រខ្លាំងចំនួន ៧៦ប្រទេសរហូតដល់ដំណាច់ឆ្នាំ ២០២០។ តែក្រុមអង្គការក្រៅរដ្ឋាភិបាលក៏ដូចជាធនាគារពិភលោកបានអំពាវនាវឲ្យពន្យារពេលរហូតដល់ឆ្នាំ ២០២១។ G២០ នឹងផ្តល់ចម្លើយពីពេលនេះទៅខែតុលាខាងមុខដែលជាខែបើកកិច្ចប្រជុំថ្មី។ ទោះជាយ៉ាងនេះក្តី ប្រធានធនាគារពិភពលោក លោកដេវីដ ម៉ាល់ផាស់បានយល់ឃើញថា វានៅមិនទាន់គ្រប់គ្រាន់ទេ។
មិនទាន់គ្រប់គ្រាន់ ព្រោះខណៈដែលសេដ្ឋកិច្ចសកលធ្លាក់ចុះ និងក្នុងពេលដែលក្រុមប្រទេសក្រីក្រខ្លាំងគ្មានលទ្ធភាពគ្រប់គ្រាន់ដើម្បីជួយពលរដ្ឋខ្លួនឯងផង ក្រុមប្រទេសទាំងនេះនឹងរឹតតែពិបាករកលុយដើម្បីសងបំណុលគេ។ ដូច្នេះសម្រាប់លោកម៉ាល់ផាស់ ការកាត់បន្ថយប្រាក់បំណុលពីប្រទេសក្រីក្រខ្លាំងជារឿងចាំបាច់នៅក្នុងកាលៈទេសៈបច្ចុប្បន្ន តែចំនួនទឹកប្រាក់នៃការកាត់បន្ថយបំណុលនេះនឹងត្រូវពិនិត្យមើលលើស្ថានភាពជាក់ស្តែងរបស់ប្រទេសនីមួយៗ។ គួរបញ្ជាក់ថាកន្លងមក ធនាគារពិភពលោកធ្លាប់បានទម្លាក់លុយចំនួន ១៦០ ០០០លានដុល្លារដើម្បីជួយបន្ទាន់ប្រមាណជា ១០០ប្រទេស ក្នុងនោះមាន ២១ ០០០លានដុល្លារនៅដំណាច់ខែមិថុនាកន្លងទៅ។
ក្រៅពីអំពាវនាវឲ្យក្រុមប្រទេសម្ចាស់បំណុលពន្យារពេលសងបំណុលរបស់ក្រុមប្រទេសក្រីក្រខ្លាំង លោកម៉ាល់ផាស់ក៏បានធ្វើការអំពាវនាវដូចគ្នានេះចំពោះម្ចាស់បំណុលដែលជាស្ថាប័ន និងក្រុមហ៊ុនឯកជន។ ធនាគារពិភពលោកយល់ឃើញថា មានតែការកាត់បន្ថយ និងការពន្យារពេលសងបំណុលរបស់ក្រុមប្រទេសក្រីក្រខ្លាំងទេទើបគេអាចជួយប្រទេសទាំងនេះឲ្យងើបឡើងនៅក្នុងសម័យកូវីដ-១៩។ កូវីដ-១៩ ដែលបាន និងកំពុងបង្កឲ្យមានអ្នកក្រក្រីខ្លាំងរស់ជាមួយនឹងចំណូលតិចជាង ១,៩ដុល្លារក្នុងមួយថ្ងៃកើនឡើងជាលំដាប់។ ធនាគារពិភពលោកបានប៉ាន់ប្រមាណថាក្នុងឆ្នាំ ២០១៥ មានមនុស្សប្រមាណ ៧៣៤លាននាក់ ឬស្មើនឹង ១០% នៃពលរដ្ឋសរុបក្នុងលោកមានស្ថានភាពក្រីក្រីខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ