លោកដូណាល់ត្រាំ នៅតែថា ភ្លើងឆេះព្រៃ គ្មានជាប់ទាក់ទងនឹងការប្រែប្រួលអាកាសធាតុ
ប្រធានាធិបតីអាមេរិក លោកដូណាល់ ត្រាំ បានច្រានចោលការបារម្ភដែលថា ភ្លើងឆេះព្រៃ នៅរដ្ឋភាគខាងលិចអាមេរិកជាកើតឡើង ដោយសារការប្រែប្រួលអាកាសធាតុ។ កាលពីថ្ងៃចន្ទ នៅក្នុងដំណើរទស្សនកិច្ចប៉ុន្មានម៉ោង នៅទីក្រុងSacramento ក្នុងរដ្ឋកាលីហ្វ័ញ៉ា ដែលរងឆេះបំផ្លាញខូចខាត ដោយសារភ្លើងឆេះព្រៃ លោកដូណាល់ ត្រាំ បានអះអាង សាជាថ្មីថា ការគ្រប់គ្រងព្រៃឈើ មិនល្អ ជាដើមហេតុធ្វើឲ្យមានភ្លើងឆេះព្រៃ នៅភាគខាងលិចអាមេរិក។
ចុះផ្សាយនៅថ្ងៃ៖
រងការរិះគន់ដែលថា លោកនៅស្ងៀម នៅក្នុងពេលរដ្ឋភាគខាងលិចចំនួន ៣កំពុងរងឆេះបំផ្លាញ ដោយសារភ្លើងឆេះព្រៃ លោកប្រធានាធិបតី ដូណាល់ ត្រាំ បានឆ្លៀតពេលប៉ុន្មានម៉ោង នៃពេលវេលាធ្វើយុទ្ធនាការបោះឆ្នោត ដើម្បីទៅធ្វើទស្សនកិច្ចនៅរដ្ឋកាលីហ្វ័រញ៉ា ដែលរងគ្រោះខ្លាំងជាងគេ ទាំងខាងបាត់បង់ជីវិតមនុស្ស ព្រៃឈើ និងសំណង់ អគារ។
ភ្លើងឆេះព្រៃ ដែលនៅតែសកម្មខ្លាំង នៅតាមបណ្តារដ្ឋឆ្នេរអាមេរិក បានបំផ្លាញដីព្រៃសរុប ប្រមាណ២លានហិចតា ក្នុងរដ្ឋកាលីហ្វ័ញ៉ា អូរីហ្កិន និងវ៉ាស៊ីនតោន និងបានសម្លាប់មនុស្សយ៉ាងតិច ៣៥នាក់។ ប្រជាជនអាមេរិកាំង រាប់សែននាក់ ត្រូវជម្លៀសចេញជាបន្ទាន់ពីផ្ទះសម្បែង។ នៅរដ្ឋកាលីហ្វ័រញ៉ា អគ្គិភ័យលេបត្របាក់បំផ្លាញ ដីព្រៃឈើ ជាង ៣លានអារ ដែលជាចំនួនដ៏ច្រើនមិនធ្លាប់មានពីមុនមក ចំណែក សំណង់អគារជាង ៤ម៉ឺនត្រូវឆេះបំផ្លាញក្លាយជាផេះ។
នៅថ្ងៃចន្ទ លោកដូណាល់ ត្រាំ មិនបានធ្វើដំណើរផ្ទាល់ ទៅដល់កន្លែងត្រូវភ្លើងឆេះ ដូចកាលឆ្នាំមុននោះទេ។ ឆ្លើយនឹងសំណួររបស់អ្នកកាសែតស្តីពីតួនាទីរបស់ការប្រែប្រួលអាកាសធាតុ ក្នុងរឿងភ្លើងឆេះព្រៃលើកនេះ លោកដូណាល់ ត្រាំ បានបញ្ជាក់ការអះអាងរបស់លោកសាជាថ្មីថា គឺការគ្រប់គ្រងព្រៃឈើមិនល្អ ដែលធ្វើឲ្យមានភ្លើងឆេះព្រៃ។
“នៅពេលដើមឈើដួលរលំ លើដី ប្រហែល ១៨ខែ ដើមឈើនឹងស្ងួត ដូចជាឈើគូសអីចឹង។ វាអាចផ្ទុះឆេះឡើង” នេះជាប្រសាសន៍របស់លោកដូណាល់ ត្រាំ។
នៅក្នុងជំនួបជាមួយប្រធានាធិបតីអាមេរិក អភិបាលរដ្ឋកាលីហ្វ័រញ៉ា មកពីគណបក្សប្រឆាំង បានទទួលស្គាល់ថា លោកពិតជាបានធ្វើការងារតិចតួច នៅក្នុងរឿងគ្រប់គ្រងព្រៃឈើ ប៉ុន្តែ លោកបានរំលឹកថា ៥៧%នៃព្រៃឈើ នៅរដ្ឋកាលីហ្វ័រញ៉ា ត្រូវគ្រប់គ្រងដោយរដ្ឋសហព័ន្ធ ពោលគឺរដ្ឋបាលលោកដូណាល់ ត្រាំតែម្តង។
យ៉ាងណាក៏ដោយ អភិបាលរដ្ឋកាលីហ្វ័រញ៉ា លោក Gavin Newsom នៅតែបញ្ជាក់ថា គេមានភស្តុតាងដែលថា ភ្លើងឆេះព្រៃកើតឡើង ដោយសារ ការប្រែប្រួលអាកាសធាតុ។ “អាកាសធាតុកាន់តែក្តៅខ្លាំង ចំណែកស្ងួត គឺកាន់តែស្ងួតខ្លាំង។ លោកដូណាល់ ត្រាំ ដែលមិនសូវជឿលើការអះអាងរបស់អ្នកវិទ្យាសាស្រ្ត ទាក់ទងនឹងផលវិបាកនៃការប្រែប្រួលអាកាសធាតុ បាននិយាយប្រាប់អ្នកកាសែត ឲ្យរង់ចាំមើលថា “អាកាសធាតុនឹងចុះត្រជាក់ជាងមុន”។
នៅក្នុងកាលៈទេសៈដែលភ្លើងឆេះព្រៃ ដែលខ្លាំងក្លាដូចជាភ្លើងឆេះកាល ការប្រែប្រួលអាកាសធាតុបានក្លាយជាប្រធានបទសំខាន់នៅក្នុងយុទ្ធនាការឃោសនាបោះឆ្នោតប្រធានាធិបតីអាមេរិក។ នៅថ្ងៃចន្ទ លោកចូ បៃដិន បេក្ខជនប្រធានាធិបតីដែលជាគូប្រជែងរបស់លោកដូណាល់ ត្រាំ បានអំពាវនាវប្រជាជនឲ្យបោះឆ្នោតឲ្យប្រធានាធិបតីដែលគិតគូរ ខ្វល់ពីបញ្ហាប្រែប្រួលអាកាសធាតុ។ លោកបានព្រមានថា បើសិនអាមេរិកមានប្រធានាធិបតីដែលបដិសេធមិនទទួលស្គាល់ ផលវិបាកនៃការប្រែប្រួលអាកាសធាតុ ក្នុងរយៈពេល ៤ឆ្នាំទៅមុខទៀត នោះ ថា “តើផ្ទះសម្បែងប៉ុន្មានខ្នងទៀត ដែលត្រូវដុតបំផ្លាញ ដោយសារភ្លើងឆេះព្រៃនោះ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ