លោកដូណាល់ ត្រាំ និងលោកចូ បៃដិន តឹងសរសៃកដាក់គ្នានៅក្នុងការជជែកដេញដោលលើកទី១
ការជជែកដេញដោលលើកទី១ សម្រាប់ការបោះឆ្នោតប្រធានាធិបតីអាមេរិក បានចាប់ផ្ដើមហើយនៅម៉ោង៩យប់ថ្ងៃទី២៩កញ្ញាម៉ោងនៅសហរដ្ឋអាមេរិក ដែលត្រូវនឹងម៉ោង៨ព្រឹកថ្ងៃទី៣០កញ្ញាម៉ោងនៅកម្ពុជា។ នៅក្នុងការជជែកដេញដោលនេះ វាគ្មិនទាំងពីចាប់ផ្ដើមតឹងសរសៃកដាក់គ្នាតាំងពីបើកក្បាលដំបូង ដែលជាហេតុធ្វើអ្នកសម្របសម្រួលការជជែកដេញដោលត្រូវប្រឹងប្រែងទប់ភាគីទាំងពីរកុំឲ្យដណ្ដើមគ្នានិយាយ និងត្រូវស្ដាប់អ្នកសម្របសម្រួល។
ចុះផ្សាយនៅថ្ងៃ៖ កែប្រែថ្ងៃទី៖
រៀបចំឡើងនៅក្នុងសាលដ៏ធំមួយក្នុងរដ្ឋអូហៃយ៉ូ ការជជែកដេញដោលលើកទី១សម្រាប់ការបោះឆ្នោតប្រធានាធិបតីអាមេរិក ចាប់ផ្ដើមដោយប្រធានរឿងថ្មីបំផុត នោះគឺការតែងតាំងលោកស្រី អេមី ខូនី បារ៉េត ឲ្យធ្វើជាចៅក្រមតុលាការកំពូលដោយរដ្ឋបាលលោកត្រាំ តាមពីក្រោយដោយការគ្រប់គ្រងជំងឺរាតត្បាតកូវីដ១៩ បញ្ហាសេដ្ឋកិច្ចនិងការបង្កើតការងារ បញ្ហារើសអើងពូជសាសន៍នៅសហរដ្ឋអាមេរិក ក៏ដូចជាបញ្ហាប្រែប្រួលអាកាសធាតុជាដើម។
ចាប់តាំងពីក្បាលដំបូងនៃការជជែកដេញដោល វាគ្មិនទាំងពីររូប គឺលោកប្រធានាធិបតី ដូណាល់ ត្រាំ បេក្ខភាពនៃគណបក្សសាធារណរដ្ឋ និងលោក ចូ បៃដិន បេក្ខភាពនៃគណបក្សប្រជាធិបតេយ្យ បានតម្លើងសរសៃកដាក់គ្នាជារយៈៗ។
ក្នុងនោះ គេសង្កេតឃើញថា លោកត្រាំរមែងនិយាយកាត់សម្ដីលោកបៃដិន ដោយមិនផ្ដល់ឱកាសឲ្យគូបដិបក្ខរបស់ខ្លួននិយាយឲ្យចប់សេចក្ដីនោះឡើយ។ លោកត្រាំ បានហៅលោកបៃដិន ថាជាមនុស្សមិនសូវឆ្លាត និងមិនបានធ្វើអ្វីសោះក្នុងរយៈពេល៤៧ឆ្នាំ ពោលគឺចាប់តាំងពីពេលដែលលោកបៃដិនចូលប្រឡូកក្នុងវិស័យនយោបាយនៅឆ្នាំ១៩៧៣។ រីឯ លោក បៃដិន ដែលត្រូវបានលោកត្រាំនិយាយកាត់សម្ដីជាញឹកញាប់នោះ បានហៅលោកត្រាំ ថាជាត្លុកកំប្លែង និយាយកុហក និងថែមទាំងប្រាប់ឲ្យលោកត្រាំបិទមាត់ឈប់និយាយថែមទៀត។
សម្រាប់ការជជែកដេញដោលលើកទី១នេះ លោក គ្រីស វ៉ាឡេស ជាអ្នកសម្របសម្រួលនិងជាអ្នកកាសែតដ៏ល្បីផងនោះ ត្រូវជួបប្រទះការប្រឈមខ្លាំងក្នុងការទប់ភាគីទាំងពីរ ជាពិសេសគឺលោកត្រាំតែម្ដង កុំឲ្យចេះតែដណ្ដើមលោកបៃដិននិយាយ ហើយត្រូវស្ដាប់អ្នកសម្របសម្រួល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ