ស្លាប់២នាក់របួស៥នាក់ ដោយឃាតករប្រើដាវ នៅក្រុងកេបិកប្រទេសកាណាដា យប់ថ្ងៃបុណ្យហាឡូវីន
នៅទីក្រុងកេបិក ប្រទេសកាណាដា មានហេតុការណ៍សម្លាប់មនុស្សដោយប្រើដាវ នៅយប់ថ្ងៃសៅរ៍ ឈានចូលថ្ងៃអាទិត្យទី១វិច្ឆិកា ដែលជាថ្ងៃបុណ្យហាឡូវីន។ យ៉ាងហោចណាស់ មនុស្ស២នាក់ បានសម្លាប់ និង៥នាក់ទៀតរបួសធ្ងន់។ ជនដៃដល់ ភេទប្រុសអាយុជាង២០ឆ្នាំ ត្រូវបានសមត្ថកិច្ចកាណាដា ចាប់ឃាត់ខ្លួន ប៉ុន្មានម៉ោង ក្រោយអំពើព្រៃផ្សៃនេះ។ រហូតមកទល់ពេលនេះ សមត្ថកិច្ចកាណាដា មិនបានបញ្ជាក់ទេ ថាឃាតករធ្វើអំពើនេះ ក្រោមហេតុផលអ្វី ហើយថាតើវាមានសណ្ឋានជាអំពើភេរវកម្មដែរឬទេ។
ចុះផ្សាយនៅថ្ងៃ៖
ស្តាប់ - ០១:៤៩
នៅវេលាម៉ោងប្រមាណ ១០និង២៨នាទី យប់ថ្ងៃសៅរ៍ទី៣១តុលា សមត្ថកិច្ចនគរបាលក្រុងកេបិក បានទទួលដំណឹងអាសន្នមួយ ថាមានមនុស្សច្រើននាក់ បានរងរបួសដោយអាវុធមុខស្រួច បង្កឡើងដោយជនម្នាក់ នៅក្នុងសង្កាត់បុរាណ ក្បែរប្រាសាទFrontenac និងមិនឆ្ងាយប៉ុន្មានពីកំពង់ផែចាស់។ យោងតាមសមត្ថកិច្ចនគរបាលក្រុងកេបិក មានមនុស្ស២នាក់បានស្លាប់ និង៥នាក់រងរបួស។ ឃាតករ គឺជាមនុស្សប្រុស អាយុជាង២០ ស្លៀកពាក់ឈុតបុរាណ « យុគកណ្តាល » និងបានប្រើដាវជាអាវុធ។
លោកEtienne Doyon នាយនគរបាលក្រុងកេបិក បានធ្វើសន្និសីទកាសែត ដោយបានបញ្ជាក់ថា ឃាតករ ត្រូវបានឃាត់ខ្លួន នៅក្បែរកំពង់ផែចាស់ នៅវេលាម៉ោង១រំលងអាធ្រាត្រ ដោយជននេះ បានប្រគល់ខ្លួនតាមសម្រួល។ បច្ចុប្បន្ន ឃាតករកំពុងស្ថិតនៅមន្ទីរពេទ្យ ដើម្បីទទួលការពិនិត្យសុខភាព។ នគរបាលកេបិកអះអាងថា អត្តសញ្ញាណរបស់ឃាតករ ត្រូវបានគេដឹងច្បាស់ហើយ តែសមត្ថកិច្ច សុំមិនបញ្ចេញជាសាធារណៈទេ។
ដោយឡែក កាសែតកេបិក Le Soleil បានចុះផ្សាយថា ផ្អែកតាមសាក្សី៣នាក់ គឺឃាតករ បានសម្លាប់ជនរងគ្រោះទីមួយដោយអារក នៅក្បែរប្រាសាទFrontenac មុននឹងបន្តដំណើរទៅសម្លាប់ជនរងគ្រោះទី២ និងធ្វើឲ្យរបួសមនុស្សផ្សេងទៀត នៅក្បែរកំពង់ផែ។ កាសែតដដែលនេះ ចុះផ្សាយថា ឃាតករកើតនៅឆ្នាំ១៩៩៦ ហើយទំនងជាបាន គ្រោងរៀបចំអំពើនេះ ប្រមាណជាង១ឆ្នាំមកហើយ។
នគរបាលក្រុងកេបិក បានអំពាវនាវ ឲ្យប្រជាជនសំងំនៅក្នុងផ្ទះ។ ជាសំណាងល្អ នៅយប់កើតហេតុ សង្កាត់ក្បែរប្រាសាទ Frontenac និងក្បែរកំពង់ផែ ពុំសូវមានមនុស្សអ៊ូរអច្រើន ដូចសព្វមួយដងទេ ដោយសារ តែមានវិធានការ ទប់ស្កាត់ការឆ្លងរាលដាលជំងឺកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ