អាហ្សង់ទីន កាន់ទុក្ខជាតិ ចំពោះមរណភាពរបស់ស្តេចបាល់ទាត់ ម៉ារ៉ាដូណា
កំពូលតារាបាល់ទាត់ ម៉ារ៉ាដូណា បានចូលមរណភាព ដោយរោគគាំងបេះដូង នៅថ្ងៃទី ២៥វិច្ឆិកា ២០២០ ក្នុងវ័យ៦០ឆ្នាំ។ សាកសពរបស់លោក ត្រូវបានបញ្ជូនទៅតម្កល់នៅវិមានប្រធានាធិបតី នាក្រុង Buenos Aires។ ពលរដ្ឋអាហ្សង់ទីនជាច្រើនម៉ឺននាក់បាននាំគ្នាគោរពវិញ្ញាណក្ខន្ធកំពូលតារាបាល់ទាត់ នៅតាមផ្លូវ ទីសាធារណៈផ្សេងនៃរដ្ឋធានី។ ពិភពលោកក៏បានចូលរួមសោកស្តាយនិងកាន់ទុក្ខជាមួយអាហ្សង់ទីនដែរ ចំពោះការបាត់បង់រូបកីឡាករដ៏ប៉ិនប្រសព្វគ្មានពីរនេះ។
ចុះផ្សាយនៅថ្ងៃ៖
ស្តាប់ - ០២:៤៣
ប្រធានាធិបតីអាហ្សង់ទីនបានចេញក្រិត្យកាន់ទុក្ខជាតិ រយៈពេលបីថ្ងៃ និងរៀបចំពិធីគោរពវិញ្ញាណក្ខន្ធជាតិសពលោក ម៉ារ៉ាដូណា កំពូលតារាបាល់ទាត់ ដែលអាហ្សង់ទីនខ្លះចាត់ទុកជាព្រះនោះ នៅវិមានប្រធានាធិបតីតែម្តង នាថ្ងៃព្រហស្បតិ៍ទី ២៦ វិច្ឆិកា២០២០នេះ។
គ្រាន់តែបានទទួលដំណឹងមរណភាពភ្លាម អ្នកសេ្នហាបាល់ទាត់អាហ្សង់ទីន ស្រីប្រុស ក្មេងចាស់ ពាក់អាវយឺតលេខ១០របស់ម៉ារ៉ាដូណា រាប់ពាន់ ឬដល់ម៉ឺននាក់ផងបាននាំគ្នាទៅជួបជុំនៅស្តាត Bombonera ស្តាតដែលជាតំណាងព្រលឹងបាល់ទាត់របស់យុវជនអាហ្សង់ទីន គាំទ្រដោយម៉ារ៉ាដូណា។ រថភ្លើងដែលបើកកាត់នោះ ក៏សម្តែងការគោរពវិញ្ញាណក្ខន្ធតាមរបៀបរទេះភ្លើងដែរ។ សាររំលែកទុក្ខនិងសោកស្តាយ បានធ្លាក់មកពីគ្រប់ទិសទី មិនមែនតែក្នុងរង្វង់ពិភពអ្នកកីឡាបាល់ទាត់ដូចគ្នាទេ និងត្រឹមប្រទេសអាហ្សង់ទីនមួយឡើយ។
នៅអឺរ៉ុប ជាពិសេសនៅក្រុង Naples ប្រទេសអ៊ីតាលី មានការរៀបចំប្រកួត Ligue Europa ដើម្បីជាកិច្ចឧទ្ធិសដល់វិញ្ញាណក្ខន្ធ ព្រោះគឺទីនេះហើយដែលម៉ារ៉ាដូណា បន្ទាប់ពីបានចេញពីក្លឹបបាសឺឡោន បានមកចូលលេងនៅក្លឹប Naples និងដែលនាំក្លឹបអ៊ីតាលីឱ្យឡើងល្បី ព្រមទាំងនាំរូបម៉ារ៉ាដូណាខ្លួនឯងឱ្យឡើងល្បីល្បាញដល់កំពូលនៅរវាងពីឆ្នាំ១៩៨៤-១៩៩១។
កើតនៅ១៩៦០ ក្នុងសង្កាត់ក្រីក្រ គ្រួសារក្រីក្រ ម៉ារ៉ាដូណា មានក្តីស្រមៃតាំងពីអាយុ៨ឆ្នាំចង់ក្លាយជាជើងឯកបាល់ទាត់ពិភពលោក។ ដោយសារអំណោយទានពីកំណើតខាងពូកែខាងលេងបាល់ ម៉ារ៉ាដូណា បាននាំគ្រួសារដែលមានបងប្អូនច្រើននាក់ ចេញពីភាពក្រីក្រ បានយ៉ាងឆាប់រហ័ស។
លោកបានចូលក្នុងក្លឹបបាល់ទាត់ជាតិ ពាក់អាវលេខ១០ ប្រកួតបានចំនួន ៩១លើក និងទាត់បាន៣៤គ្រាប់ ព្រមទាំងបាននាំអាហ្សង់ទីនឱ្យបានក្លាយជាជើងឯកពិភពលោកឆ្នាំ១៩៨៤។ រូបភាពដ៏ល្អដក់ជាប់ក្នុងប្រវត្តិបាល់ទាត់ខ្លាំងជាងគេ គឺការទាត់បញ្ចូលទីដោយ ដៃ ក្នុងការប្រកួតវគ្គមួយភាគបួនផ្តាច់ព្រ័ត្រជាមួយអង់គ្លេសនិងការត្រេះបាល់បញ្ជូលទីគ្រាប់ទីពីរនៃប្រកួតបាល់ទាត់ពិភពលោកនៅម៉ិចស៊ិក។ ក្រោយបរាជ័យនៃការប្រកួតបាល់ទាត់ពិភពលោកឆ្នាំ១៩៩០ ជាមួយអាល្លឺម៉ង់ លោកម៉ារ៉ាដូណា ត្រូវបានគេបណ្តេញពីបាល់ទាត់នៅឆ្នាំ១៩៩៤ ដោយវិជ្ជមានគ្រឿងញៀន។
ពូកែ ត្រេះ បណ្តើរ ទាត់និងបញ្ជាបាល់យ៉ាងប៉ិនប្រសព្វគ្មានគូប្រៀប ម៉ារ៉ាដូណា មិនត្រឹមតែជាកីឡាករបាល់ទាត់ដ៏អស្ចារ្យទេ តែថែមទាំងមានទេពកោសកល្យអាចទាក់ទាញប្រជាប្រិយភាព ចែករំលែកជំនក់ចិត្តផ្នែកបាល់ទាត់ និងទំនាក់ទំនងល្អជាមួយមេដឹកនាំបែបកុម្មុយនិស្តជាច្រើនទៀតមានជាអាទិ៍ជាមួយមេដឹកនាំគុយបា ហ្វីដែល កាស្ត្រូ ឬប្រធានាធិបតីវ៉េណេស៊ុយអេឡា អ៊ុយហ្គោ ឆាវេស តែក៏មានរឿងអាស្រូវច្រើនជាពិសេសទាក់ទងនឹងការប្រើថ្នាំញៀន។
សុខភាពរបស់លោកម៉ារ៉ាដូណា បានធ្លាក់ដុនដាបតាំងពីប៉ុន្មានថ្ងៃមកហើយដោយត្រូវឆ្លងកាត់ការវះកាត់ខួរក្បាល ប៉ុន្តែនៅទីបំផុត លោក ម៉ារ៉ាដូណា បានស្លាប់ដោយរោគគាំងបេះដូងនិងហើមសួត នៅវេលាម៉ោង ១២ថ្ងៃត្រង់ ត្រូវនឹងម៉ោងបីម៉ោងសកល ថ្ងៃទី ២៥វិច្ឆិកា ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ