សភាអាហ្សង់ទីន អនុម័តច្បាប់អនុញ្ញាតឲ្យស្ត្រីមានសិទ្ធិរំលូតកូន
បើទោះបីជាមានការពុះចែកខ្លាំង ក្នុងចំណោមមតិសាធារណៈ ទីបំផុតសភាខុសហ្ក្រេសអាហ្សង់ទីន បានបោះឆ្នោតយល់ព្រម កាលពីថ្ងៃទី ២៩ធ្នូលើច្បាប់អនុញ្ញាតឲ្យស្រ្តី អាចរំលូតកូនបាន ក្នុងករណីដែលពរពោះមិនទាន់លើសពី១៤សប្តាហ៍។ សម្រាប់សកម្មជនការពារសិទ្ធិស្ត្រី នេះគឺជាជ័យជំនះមួយដ៏សំខាន់ ព្រមទាំងជាការបោះជំហានទៅមុខ និងជាគំរូល្អ សម្រាប់ប្រទេសផ្សេងទៀតនៅក្នុងតំបន់។
ចុះផ្សាយនៅថ្ងៃ៖
អាហ្សង់ទីន បានក្លាយជាប្រទេសមួយដ៏កម្របំផុត នៅតំបន់អាេមរិកខាងត្បូង ដែលបានអនុម័តច្បាប់ អនុញ្ញាតឲ្យស្ត្រី មានសិទ្ធិរំលូតកូន។ ការជជែកដេញដោល នៅក្នុងសភារវាងតំណាងរាស្ត្រ បានប្រព្រឹត្តិធ្វើទៅ យ៉ាងក្តៅគកុក ប៉ុន្មានសប្តាហ៍កន្លងមកនេះ។ នៅសភាជាន់ទាប ច្បាប់អនុញ្ញាតការរំលូតកូន ត្រូវបានបោះឆ្នោតយល់ព្រម ១៣១សម្លេង ទល់នឹង ១១៧សម្លេង។ ចំណែកនៅព្រឹទ្ធសភាវិញ សម្លេងឆ្នោតយល់ព្រម មាន៣៨ ទល់នឹងសម្លេងប្រឆាំង ២៩។
សូមរំលឹកថា កាលពីឆ្នាំ២០១៨ គម្រោងច្បាប់នេះ ត្រូវបានសភាទាំង២របស់អាហ្សង់ទីន បោះឆ្នោតបដិសេធ។ ការបោះឆ្នោតយល់ព្រមនៅពេលនេះ បានបង្ហាញអំពីការវិវឌ្ឍន៍ផ្លាស់ប្តូរផ្នត់គំនិតជឿនលឿន របស់អ្នកនយោបាយអាហ្សង់ទីន។ លោកស្រី Sandra Lujan ពេទ្យចិត្តសាស្ត្រ និងជាសកម្មជនគាំទ្រច្បាប់នេះ បានថ្លែងអបអរ ថានេះគឺជាជោគជ័យ នៃការតស៊ូអស់រយៈពេលជាច្រើនឆ្នាំ ដើម្បីឲ្យស្ត្រីអាចមានសិទ្ធិសម្រេចក្នុងការរក្សា មិនរក្សាទុកទារក។
គួរកត់សំគាល់ថា ប្រទេសទាំងអស់នៅតំបន់អាមេរិកខាងត្បូង គឺជាប្រទេសគោរពសាសនាកាតូលិក ដ៏តឹងតែងបំផុត ហើយដែលករណីរំលូតកូន គឺរឿងមួយត្រូវហាមឃាត់ទោះក្នុងករណីណាក៏ដោយ។ នៅអាហ្សង់ទីន កន្លងមកដោយយោងតាមច្បាប់ឆ្នាំ ១៩២១ ស្ត្រីអាចរំលូតកូនបាន តែក្នុងករណីពរពោះ បង្កឡើងដោយការរំលោភសេពសន្ទវៈ ឬក្នុងករណីដែលជីវិតម្តាយប្រឈមគ្រោះថ្នាក់ប៉ុណ្ណោះ។
ក្រុមសកម្មជនគាំទ្រសិទ្ធិស្ត្រីនៅអាហ្សង់ទីន បានធ្វើសកម្មភាពតវ៉ា ជាច្រើនឆ្នាំមកហើយ ដើម្បីឲ្យស្ត្រីមានសិទ្ធិរំលូតកូនដោយស្របច្បាប់ ដោយឥតគិតថ្លៃ និងដោយសុវត្ថិភាពបំផុត។ អ្នកគាំទ្រច្បាប់នេះអះអាងថា ច្បាប់នេះ មិនមែនជាច្បាប់ដែលនឹងទៅជំរុញ ឲ្យស្ត្រីនាំគ្នារំលូតកូននោះទេ តែជាច្បាប់ដែលនឹងការពារស្ត្រី ឲ្យទទួលបានសេវារំលូតកូនដោយត្រឹមត្រូវតាមច្បាប់ មិនលួចលាក់ ប្រឈមគ្រោះថ្នាក់ដល់ជីវិត។ ការសម្រេចចិត្តរំលូតកូន គឺជាការសម្រេចចិត្តដ៏លំបាក ដែលម្តាយគ្រប់រូប មិនមែនចេះតែធ្វើបាននោះទេ បើសិនជាពួកគេពុំមានជំរើសទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ