ក្រុមហ៊ុនប៊ូអ៊ីងស្នើឲ្យផ្អាកការហោះហើរយន្តហោះប៊ូអ៊ីង៧៧៧ ក្រោយយន្តហោះមួយគ្រឿងជួបបញ្ហាម៉ាស៊ីន
ប៊ូអ៊ីងដែលជាក្រុមហ៊ុនផលិតយន្តហោះរបស់អាមេរិក បានផ្តល់អនុសាសន៍ឲ្យផ្អាកការហោះហើរយន្តហោះប្រភេទ ៧៧៧ របស់ខ្លួនចំនួនរាប់សិបគ្រឿងនៅទូទាំងពិភពលោកកាលពីថ្ងៃអាទិត្យ ២១ កុម្ភៈម្សិលមិញ។ វិធានការរបស់ក្រុមហ៊ុនប៊ូអ៊ីងនេះធ្វើឡើង បន្ទាប់ពីយន្តហោះប្រភេទដូចគ្នាមួយគ្រឿងបានជួបបញ្ហាម៉ាស៊ីនក្នុងពេលកំពុងប្រតិបត្តិការនាពេលថ្មីៗនេះ។
ចុះផ្សាយនៅថ្ងៃ៖
ស្តាប់ - ០២:០៦
យន្តហោះមួយគ្រឿងដែលបានជួបបញ្ហានោះ គឺជាយន្តហោះប៊ូអ៊ីង ៧៧៧ របស់ក្រុមហ៊ុនអាកាសចរណ៍ United Airlines ដែលម៉ាស៊ីនរបស់វាត្រូវបានឆាបឆេះ និងបន្ទាប់មកធ្លាក់ទៅលើសហគមន៍ជាយក្រុងមួយកន្លែងរបស់អាមេរិក។ យន្ដហោះនេះ មានដឹកអ្នកដំណើរចំនួន ២៣១ នាក់ និងត្រូវបង្ខំចិត្តហោះត្រឡប់ទៅអាកាសយានដ្ឋានក្រុង Denver វិញ កាលពីថ្ងៃសៅរ៍ ដោយគ្មានអ្នកដំណើរណាម្នាក់ត្រូវបានគេរាយការណ៍ថារងរបួសនោះទេ។
ក្រុមហ៊ុនអាកាសចរណ៍ United Airlines និងក្រុមហ៊ុនអាកាសចរណ៍ធំ ៗពីរផ្សេងទៀតរបស់ជប៉ុន បានប្រកាសផ្អាកប្រតិបត្តិការយន្តហោះចំនួន ៦២ គ្រឿង។ ចំណែក ក្រុមហ៊ុនអាកាសចរណ៍ Korean Air និយាយថានឹងហាមឃាត់ការហោះហើររបស់ប្រភេទយន្តហោះដូចគ្នានេះ ចំនួន ៦ គ្រឿង។
សរុបមកនៅទូទាំងពិភពលោក យន្តហោះចំនួន ១២៨ គ្រឿងត្រូវបានក្រុមហ៊ុនប៊ូអ៊ីង ផ្តល់អនុសាសន៍ឲ្យផ្អាកប្រតិបត្តិការ រហូតដល់ក្រុមអ្នកស៊ើបអង្កេតរបស់ទីភ្នាក់ងារអាកាសចរណ៍សហព័ន្ធអាមេរិក (FAA) អាចកំណត់រកឃើញពីមូលហេតុនៅពីក្រោយបញ្ហានេះបាន។
គួរជ្រាបថា យន្តហោះដែលក្រុមហ៊ុនប៊ូអ៊ីង ប្រកាសអំពាវនាវឲ្យផ្អាកប្រតិបត្តិការគឺជាប្រភេទយន្តហោះប៊ូអ៊ីង ៧៧៧ ដែលបំពាក់ដោយម៉ាស៊ីនប្រភេទ (៤០០០-១១២) ផលិតពីក្រុមហ៊ុន Pratt & Whitney ។ ភ្លាមៗបន្ទាប់ពីមានកើតរឿងហេតុខាងលើ ខាងក្រុមហ៊ុន Pratt & Whitney បាននិយាយថាខ្លួនបានបញ្ជូនក្រុមការងារមួយក្រុមហើយ ឲ្យទៅធ្វើការជាមួយនឹងអ្នកស៊ើបអង្កេត។
គួរជ្រាបដែរថា ក្រោយយន្តហោះប៊ូអ៊ីង ៧៧៧ មួយគ្រឿងរបស់ក្រុមហ៊ុនអាកាសចរណ៍ United Airlines ជួបបញ្ហាម៉ាស៊ីន ក្រុមប្រឹក្សាសុវត្ថិភាពដឹកជញ្ជូនជាតិរបស់អាមេរិក (NTSB) បានបើកការស៊ើបអង្កេតមួយភ្លាមភ្លែត។ ការរកឃើញដំបូងរបស់ ក្រុមប្រឹក្សាសុវត្ថិភាពដឹកជញ្ជូនជាតិអាមេរិក បង្ហាញថាការខូចខាតភាគច្រើនបានកើតឡើងផ្តុំនៅត្រង់តែម៉ាស៊ីនយន្តហោះផ្នែកខាងស្តាំ។ ចំណែកតួយន្តហោះវិញ រងការខូចខាតបន្តិចបន្តួចប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ