ប៉ូលិសម្នាក់ស្លាប់ នៅក្នុងហេតុការណ៍ចាក់សម្លាប់ នៅមុខវិមានកាពីតូល
៣ខែក្រោយ ការសម្រុកចូលលុកលុយ របស់ក្រុមគាំទ្រ លោកដូណាល់ ត្រាំ វិមានកាពីតូលអាមេរិក បានរងការវាយប្រហារសាជាថ្មី។ នៅថ្ងៃសុក្រម្សិលមិញ បុរសជាតិអាមេរិកាំងម្នាក់បានបើករថយន្ត បុក និងចាក់សម្លាប់ មន្រ្តីប៉ូលិស ដែលយាមច្រកចូលវិមានកាពីតូល។ តាមប្រធានប៉ូលិសកាពីតូល ប៉ូលិសម្នាក់ស្លាប់ និងម្នាក់ទៀតរបួសធ្ងន់ ចំណែក ជនដៃដល់ត្រូវប៉ូលិសបាញ់សម្លាប់ ភ្លាមៗ នៅកន្លែងកើតហេតុ។
ចុះផ្សាយនៅថ្ងៃ៖
ស្តាប់ - ០២:៤៥
ក្នុងរយៈពេលតែ៣ខែ វិមានកាពីតូលរងការវាយប្រហារដល់ទៅ២ដង។ កាលពីដើមខែមករាកន្លងទៅ វិមានកាពីតូល ធ្លាប់ត្រូវក្រុមគាំទ្រលោកដូណាល់ ត្រាំ ភាគច្រើនជាក្រុមស្តាំនិយមជ្រុល និងក្រុមគាំទ្រ សាសន៍ស្បែកស សម្រុកចូលលុកលុយ ពេញអគារ។ ប៉ុន្តែ ការវាយប្រហារនៅថ្ងៃសុក្រ ហាក់មិនជាប់ពាក់ព័ន្ធនឹងក្រុមជ្រុលនិយម គាំទ្រ សាសន៍ស្បែកសនោះទេ។
នៅថ្ងៃសុក្រ ប៉ូលិសមិនបានបង្ហាញ អត្តសញ្ញាណជនដៃដល់ដែលបានបើកឡានបុក និងចាក់សម្លាប់ប៉ូលិសយាមវិមានកាពីតូល ប៉ុន្តែ ប្រព័ន្ធផ្សព្វផ្សាយអាមេរិកាំងបានសរសេរថា ឧក្រិដ្ឋជន ជា ជនជាតិអាមេរិកាំងស្បែកខ្មៅ អាយុ ២៥ឆ្នាំ ដែលធ្លាប់ប្រើថ្នាំញៀន ហើយនិងធ្លាប់ មានសមានចិត្តគាំទ្រ មេដឹកនាំចលនា ជាតិអ៊ីស្លាម នៅអាមេរិក ដែលឧស្សាហ៍រងការរិះគន់ថា មានជំហរ ប្រឆាំងជនជាតិជ្វីហ្វ។
តាមប្រធានប៉ូលិស វ៉ាស៊ីនតោន ការវាយប្រហារលើកនេះ អាចមិនមែន ជាការវាយប្រហារភេរវកម្ម ប៉ុន្តែ ប៉ូលិសនៅតែបន្ត ការស៊ើបអង្កេតតទៅទៀត។
ការវាយប្រហារ ដោយបើកឡានបុក និងចាក់សម្លាប់ប៉ូលិសយាមវិមានកាពីតូល កើតឡើងនៅពេលដែល សមាជិកសភា អាមេរិក សម្រាកវិស្សមកាល ប៉ុន្តែ វិមានកាពីតូល នៅតែមានបុគ្គលិក និងអ្នកកាសែត បន្តធ្វើការ នៅរសៀលថ្ងៃ វាយប្រហាររបស់ ឃាតករ កាលពីថ្ងៃសុក្រ។ សម្រាប់ប្រធានប៉ូលិសកាពីតូល លោកស្រី Yogananda Pittman ប៉ូលិសកាពីតូលឆ្លងកាត់ពេលវេលាដ៏លំបាក ចាប់តាំងពី មានព្រឹត្តិការណ៍ សម្រុកចូលវិមានកាពីតូល កាលពីថ្ងៃទី ៦មករា។ ព្រឹត្តិការណ៍ដែលធ្វើឲ្យដែលអ្នកជួបផ្ទាល់ នៅរន្ធត់ចិត្ត ខ្លាំងនៅឡើយ។
នៅក្នុងសេចក្តីថ្លែងការណ៍ លោកប្រធានាធិបតី ចូ បៃដិន បាននិយាយថា លោកស្លុតចិត្ត ដោយសារហេតុការណ៍ កាលពីថ្ងៃសុក្រ។ ប្រធានាធិបតី អាមេរិកបានបន្ថែមថា វិមានកាពីតូលកំពុងជួបការលំបាក មិនថា សម្រាប់អ្នកដែលធ្វើការ និងអ្នកដែលមាននាទីយាមវិមានកាពីតូល។ ប្រធានាធិបតី អាមេរិកបានបញ្ជាឲ្យគេទម្លាក់ទង់ជាតិមកនៅពាក់កណ្តាលដង នៅសេតវិមាន ចំណែក លោកស្រីណាន់ស៊ី ប៉េឡូស៊ី បានបញ្ជាឲ្យគេដូចគ្នានេះដែរ នៅវិមានកាពីតូល ដើម្បី រំលឹកគុណដល់មន្រ្តីប៉ូលិស ដែលបានពលីជីវិត ក្នុងបុព្វហេតុការពារ វិមានកាពីតូល នៅថ្ងៃម្សិលមិញ។
នៅក្រោយ ការសម្រុកចូល លុកលុយរបស់ក្រុមគាំទ្រលោកដូណាល់ ត្រាំ ដែលបានសម្លាប់មនុស្ស ៥នាក់ និងចាប់ខ្លួន មនុស្ស ជាង ៣០០នាក់ សន្តិសុខ នៅ វិមានកាពីតូល ត្រូវបានពង្រឹង បន្ថែម ជាមួយ លួសបន្លា ជញ្ជាំងថ្ម ខ្ពស់ៗ និងវត្តមានរបស់ឆ្មាំការពារជាតិ នៅជុំវិញអគារកាពីតូល។ ប៉ុន្តែការវាយប្រហារ នៅថ្ងៃម្សិលមិញ សបង្ហាញឲ្យឃើញថា ទោះស្ថិតក្រោមការយាម ពង្រឹង សន្តិសុខ ជាងមុខ កាពីតូល ដែលជាស្ថាប័ន ច្បាប់ កំពូលរបស់អាមេរិក នៅតែអាចរងការវាយប្រហារ គ្រប់ពេលវេលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ