មហោស្រពភាពយន្ត ៖ សមិទ្ធិករជាតិអាស៊ីបានទទួលពានរង្វាន់កំពូលអូស្ការជាលើកទីមួយ
រងការរិះគន់ខ្លាំងថាផ្តល់រង្វាន់ភាគច្រើនឱ្យបុរសនិងជនជាតិស្បែកស នៅថ្ងៃអាទិត្យទី ២៥មេសា ២០២១ មហោស្រពភាពអូស្ការលើកទី ៩៣ មានលក្ខណៈចម្រុះជាតិសាសន៍ខុសប្រក្រតី។ គណៈកម្មការអូស្ការបានសម្រេចផ្តល់ពានរង្វាន់កំពូលទៅឱ្យសមិទ្ធករភាពយន្តជនជាតិចិន ភេទស្រី លោកស្រី ក្លូអេ ចាវ (Chloé Zhao) ចំពោះស្នាដៃផលិតភាពយន្តខ្នាតវែងរឿង Nomadland។ លោកស្រីគឺជាស្ត្រីជនជាតិអាស៊ីដំបូងគេបង្អស់ដែលបានទទួលរង្វាន់កំពូលអូស្ការនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ដោយហេតុកូវីដ១៩ មហោស្រពភាពយន្តអូស្ការ ២០២១ ប្រព្រឹត្តទៅដោយខុសទម្លាប់ ជាមួយនឹងការអញ្ជើញតែតារាភាពយន្តជាប់ជម្រើសមកចូលរួមតែប៉ុណ្ណោះ។ ហើយកាន់តែភ្ញាក់ផ្អើលខ្លាំងទៀត ពិភពអូស្ការដែលល្បីខាងមានសមាសភាព និងផ្តល់រង្វាន់ភាគច្រើនដល់ជនជាតិស្បែកស និងតារាភេទប្រុស បានប្រកាសផ្តល់ជ័យលាភី ឆ្នាំ២០២១ រង្វាន់អូស្ការដល់តារានិងសមិទ្ធិករជនមានពណ៌ និងភេទស្រី ច្រើន។
ពានរង្វាន់កំពូលអូស្ការ ជាសមិទ្ធិករឆ្នើម ភាពយន្តឆ្នើមប្រចាំឆ្នាំ២០២១ ត្រូវបានប្រគល់ទៅជូនអ្នកស្រីសមិទ្ធិករជនជាតិចិន ក្លូអេ ចាវ ចំពោះស្នាដៃផលិត ភាពយន្តរឿង Nomadland ដែលរៀបរាប់អំពីជីវិតរបស់ស្ត្រីអាមេរិកត្រដររស់ក្នុងសតវត្សរ៍ទី២១។
កើតនៅឆ្នាំ១៩៨២ សមិទ្ធិករ ក្លូអេ ចាវ ជាអ្នកមានសម្បុរពណ៌ស្បែកមិនស ទីមួយ ជាជនជាតិអាស៊ី ដំបូងគេបង្អស់ និងជា សមិទ្ធិករ ភេទស្រីទីពីរប៉ុណ្ណោះដែលបានទទួលពានរង្វាន់កំពូលអូស្ការនេះ។ ជាភាពយន្តឆ្នើម ផលិតដោយសមិទ្ធិករឆ្នើមហើយ តួអង្គស្រីសម្តែងដោយ អ្នកស្រី Frances McDormand ក៏បានទទួលពានរង្វាន់អូស្ការ ជាតារាសម្តែងឆ្នើមទៀត។ ភាពយន្តរបស់ក្លូអេ ចាវ ធ្លាប់បានទទួលពានរង្វាន់Lion D’or កាលពីឆ្នាំ២០២០នៅក្នុងមហាស្រពភាពយន្តក្រុងវឺនី។ ប៉ុន្តែនៅប្រទេសចិន គ្មានសារព័ត៌មានធំៗមួយចុះផ្សាយមួយម៉ាត់សោះ។
ជ័យលាភីអូស្ការដ៏គួរឱ្យកត់សម្គាល់ពីរទៀត គឺតារាសម្តែង កូរ៉េខាងត្បូង អាយុខ្ទង់៧០ឆ្នាំ Youn Yuh-jungបានទទួលពានរង្វាន់អូស្ការ ជាតួអង្គរងស្រ្តី ដ៏ឆ្នើម ក្នុងរឿង Minari ។ អ្នកស្រីជាជនជាតិកូរ៉េខាងត្បូងដំបូង និងស្ត្រីអាស៊ីទីពីរ ដែលបានទទួលពានរង្វាន់នេះ គិតចាប់តាំងពីឆ្នាំ ១៩៥៧មក។
ទំនងជាខកចិត្តបន្តិចដោយមិនបានទទួលពានរង្វាន់សំខាន់ៗមែន ប៉ុន្តែអូស្ការឆ្នាំនេះ មិនភ្លេចភាពយន្តជាច្រើនផ្សេងទៀតដែលឧទ្ទិសដល់សហគមន៍អាមេរិកស្បែកខ្មៅទេ។ លោក Daniel Kaluuya ជនជាតិអង់គ្លេសស្បែកខ្មៅ អាយុ៣២ឆ្នាំ បានទទួលពានរង្វាន់អូស្ការក្នុងនាមជាតួអង្គរងឆ្នើម ក្នុងរឿងJudas and the Black Messiah ដែលក៏ជាប់ឈ្មោះជាភាពយន្តមានភ្លេងពិរោះជាងគេ។ សមិទ្ធិករផលិតករសិល្បករភាពយន្ត ស្បែកខ្មៅលោក Tyler Perry បានទទួលពានរង្វាន់កិត្តិយសអូស្ការចំពោះសកម្មភាពមនុស្សធម៌របស់លោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ