ពហុជាតិនិយម ៖ រុស្ស៊ីនិងសហរដ្ឋអាមេរិក បញ្ចេញទស្សនៈវិស័យខុសគ្នាស្រលះ
នៅល្ងាចថ្ងៃសុក្រទី ៧ឧសភាម្សិលមិញ វេទិកាក្រុមប្រឹក្សាសន្តិសុខអង្គការសហប្រជាជាតិ បានក្លាយជាវេទិកា នៃការលាតត្រដាងទស្សនៈវិស័យផ្ទុយគ្នាស្រលះជុំវិញគោលការណ៍ពហុជាតិនិយម ។ ប្រមុខការទូតរុស្ស៊ី លោក ស៊ែរហ្គៃ ឡាវ្រូវ បានបរិហារនយោបាយពហុជាតិនិយមរបស់សហរដ្ឋអាមេរិកនិងសហភាពអឺរ៉ុប ថាមានហានិភ័យបង្កបង្កើតឱ្យមានការបែកបាក់ថ្មី។ ចំណែកប្រមុខការទូតអាមេរិកវិញ បានអំពាវនាវឱ្យមានការប្រយុទ្ធប្រឆាំងនឹងប្រទេសណាដែលរំខានសណ្តាប់ធ្នាប់អន្តរជាតិ តាមរយៈការរំលោភបំពានច្បាប់អន្តរជាតិ។
ចុះផ្សាយនៅថ្ងៃ៖
ស្តាប់ - ០២:១៩
នៅក្នុងជំនួបប្រជុំក្រុមប្រឹក្សាសន្តិសុខអង្គការសហប្រជាជាតិតាមអនឡាញរៀបចំឡើងដោយចិន រដ្ឋមន្ត្រីការបរទេសរុស្ស៊ី បានវាយប្រហារសហរដ្ឋអាមេរិកដោយចំៗថា ពហុជាតិនិយម គឺជាការងារដែលត្រូវធ្វើរួមគ្នាជាសមូហភាព។ ប៉ុន្តែមួយរយៈចុងក្រោយនេះ យើងឃើញមានការប៉ុនប៉ងដាក់រៀបចំសណ្តាប់ធ្នាប់អន្តរជាតិ ដោយដាក់បង្ខំនូវច្បាប់ថ្មីមិនរួមបញ្ចូលគ្នាទៅវិញ។ សហរដ្ឋអាមេរិកចង់បើក “ជំនួបកំពូលប្រជាធិបតេយ្យ” និងជាអ្នករៀបចំបញ្ជីឈ្មោះប្រទេសដែលត្រូវមកចូលរួម។ បើតាមលោក ស៊ែរហ្គៃ ឡាវ្រូវ ក្នុងខណៈដែលពិភពលោកត្រូវមានកម្មវត្ថុរួមតែមួយ ស្រាប់តែមានស្នាមប្រេះឆាលេចឡើង។ នេះជាហានិភ័យបង្ហាញឱ្យឃើញថា ទំនាក់ទំនងអន្តរជាតិតានតឹងខ្លាំង។
ចំណែកលោក អង់តូនី ប្លីងកិន រដ្ឋមន្ត្រីការបរទេសអាមេរិកវិញ បានលើកឡើងដោយមិនដៅឈ្មោះរុស្ស៊ីនិងចិនថា វ៉ាស៊ីនតោនបន្តប្រឆាំងដាច់ខាតនឹងប្រទេសណាដែលធ្វើឱ្យខូចសណ្តាប់ធ្នាប់អន្តរជាតិ ដោយការរំលោភបំពានឥតលាក់លៀម ឬដោយសំអាងថាគ្មានច្បាប់រួមក៏ដោយ។ អ្នកខ្លះគិតថា រដ្ឋាភិបាលអាចធ្វើអ្វីស្រេចតែខ្លួនចង់នៅក្នុងប្រទេសខ្លួន ហើយសិទ្ធិមនុស្សគ្មានតម្លៃពិតប្រាកដដោយអាចប្រែប្រួលពីសង្គមមួយទៅសង្គមមួយ ប៉ុន្តែគ្មានរដ្ឋណាអាចយកច្បាប់ជាតិមកបំរើប្រយោជន៍ ធ្វើទុក្ខ ទារុណកម្ម លុបបំបាត់ កម្ចាត់ជាតិពន្ធុ ជនជាតិណាមួយជាពលរដ្ឋឯង ឬរំលោភសិទ្ធិមនុស្សបានឡើយ។ នេះជាកំណត់សម្គាល់របស់ប្រមុខការទូតអាមេរិកដែលជាពាក្យវាយប្រហារដោយប្រយោលលើចិន។ ដោយសំដៅលើរុស្ស៊ី និងការក្រសោបយកដែនដីគ្រីមេរបស់អ៊ុយក្រែន លោក ប្លីនគីន បន្ទោសថាមានរដ្ឋខ្លះចង់គូសបន្ទាត់ព្រំដែនឱ្យប្រទេសមួយផ្សេងទៀត។
ទាក់ទងនឹងសំណើរបស់បារាំងនិងអាល្លឺម៉ង់វិញ លោកប្រមុខការទូតអាមរិកយល់ថាការបង្កើតសម្ព័ន្ធដើម្បីពហុជាតិនិយមជាគំនិតល្អ តែសម្រាប់រុស្ស៊ី ដែលបានការគាំទ្របន្ថែមពីចិន យកសហភាពអឺរ៉ុបធ្វើគ្រឹះពហុជាតិនិយម ជាការម៉ាក់ងាយសមភាពនៃរដ្ឋនីមួយៗ និងកំពុងយកគោលការណ៍ពហុជាតិនិយមមកធ្វើលេសសម្រាប់ដាក់បង្ខំឱ្យគេគោរពច្បាប់របស់ខ្លួន។ ប្រមុខការទូតចិនលោក វ៉ង់ យី បានចាត់ទុកការបែងចែកពិភពលោក តាមទ្រឹស្តីមនោគមវិជ្ជា ផ្ទុយទាំងស្រុងពីគោលការណ៍ពហុជាតិនិយម និងបានស្នើសុំឱ្យសមាជិកអង្គការសហប្រជាជាតិទាំងអស់ ស្វែងរកសមភាពនិងយុត្តិធម៌ ព្រមទាំងប្រព័ន្ធគ្រប់គ្រងពិភពលោក ត្រឹមត្រូវនិងស្មើភាពជាងមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ