អាមេរិក៖ពលរដ្ឋចាក់វ៉ាក់សាំងគ្រប់ចំនួនដូសមិនចាំបាច់ពាក់ម៉ាសនៅកន្លែងបិទជិតទៀតទេ
នៅអាមេរិក ពលរដ្ឋដែលបានចាក់វ៉ាក់សាំងគ្រប់ចំនួនដូសមិនចាំបាច់ពាក់ម៉ាសទៀតទេនៅកន្លែងបិទជិត។ នេះជាសេចក្តីសម្រេចរបស់រដ្ឋអំណាចសុខាភិបាលនាថ្ងៃព្រហស្បតិ៍ ទី១៣ ឧសភា។ ប្រធានាធិបតីលោកចូ បៃដិនបានសាទរចំពោះដំណឹងល្អនេះដោយលោកចាត់ទុកជាថ្ងៃដ៏អស្ចារ្យរបស់អាមេរិក។ តែទន្ទឹមគ្នានេះ លោកបៃដិនបានអំពាវនាវឲ្យបង្កើនយុទ្ធនាការចាក់វ៉ាក់សាំងដោយលោកសង្ឃឹមថា វិធានការបន្ធូរបន្ធយការពាក់ម៉ាសសម្រាប់អ្នកចាក់វ៉ាក់សាំងគ្រប់ចំនួនដូសនេះនឹងជួយជំនះអ្នកដែលនៅបន្តរារែក អល់អែកមិនចង់ចាក់វ៉ាក់សាំង។
ចុះផ្សាយនៅថ្ងៃ៖
ស្តាប់ - ០២:២៩
« មនុស្សគ្រប់រូបដែលបានចាក់វ៉ាក់សាំងគ្រប់ចំនួនដូសអាចចូលរួមនៅក្នុងកម្មវិធីផ្សេងៗធំ ឬតូច រៀបចំនៅខាងក្នុង ឬខាងក្រៅដោយមិនចាំបាច់ពាក់ម៉ាស ឬរក្សាគម្លាតសុវត្ថិភាពទៀតឡើយ » នេះជាការថ្លែងរបស់លោកស្រី Rochelle Walensky នាយិកានៃមជ្ឈមណ្ឌលបង្ការ និងប្រយុទ្ធប្រឆាំងជំងឺ។ តែទន្ទឹមគ្នានេះ លោកស្រី Walensky បានផ្តល់អនុសាសន៍ឲ្យបន្តពាក់ម៉ាសសម្រាប់ការធ្វើដំណើរតាមយន្តហោះ រថយន្តក្រុង រទេះភ្លើង រួមទាំងនៅតាមអាកាសយាន្តដ្ឋាន និងស្ថានីយ៍រថភ្លើង។ តាមលោកស្រី Rochelle Walensky ការសម្រេចរបស់មជ្ឈមណ្ឌលបង្ការ និងប្រយុទ្ធប្រឆាំងជំងឺបានធ្វើឡើងដោយសំអាងលើការសិក្សារបស់ក្រុមអ្នកវិទ្យាសាស្រ្តដែលថា វ៉ាក់សាំងមានប្រសិទ្ធិភាពប្រឆាំងនឹងការឆ្លងដែលគ្មានរោគសញ្ញា និងការធ្វើចរាចររបស់វីរុសបំប្លែងខ្លួនថ្មី។
តែលោកស្រី Rochelle Walensky មិនភ្លេចព្រមានថា បើស្ថានការណ៍នៃការឆ្លងកូវីដ១៩ បែរជាបានធ្លាក់ដុនដាបឡើងវិញ វិធានការគ្រវែងម៉ាសចោលសម្រាប់អ្នកចាក់វ៉ាក់សាំងគ្រប់ចំនួនដូសក៏នឹងត្រូវលុបចោលវិញដែរ។ ក្រោយការប្រកាសរបស់លោកស្រី Rochelle Walensky ក្រុមសមាជិកសភា និងព្រឹទ្ធសភាបានដកម៉ាសចេញវិញនៅពេលប្រជុំ។ « ទីបំផុត សេរីភាព » នេះជាចំណាប់អារម្មណ៍របស់ប្រធានក្រុមសំឡេងភាគតិចនៃគណបក្សសាធារណរដ្ឋនៅព្រឹទ្ធសភា។ ចំណែកប្រធានាធិបតីលោកចូ បៃដិនបានសាទរចំពោះដំណឹងថ្មីនេះដោយចាត់ទុកជាថ្ងៃអស្ចារ្យរបស់អាមេរិកនៃយុទ្ធនាការដ៏យូរក្នុងការប្រឆាំងនឹងកូវីដ១៩។
តែលោកបៃដិនមិនភ្លេចរម្លឹកឲ្យបង្កើនយុទ្ធនាការចាក់វ៉ាក់សាំងជាបន្តទៀតទេ និងសង្ឃឹមថា ការបន្ធូរបន្ធយរឿងពាក់ម៉ាសសម្រាប់អ្នកចាក់វ៉ាក់សាំងគ្រប់ចំនួនដូសនឹងជួយជំនះអ្នកដែលបន្តរារែក អល់អែកក្នុងការចាក់វ៉ាក់សាំង។ គួរបញ្ជាក់ថាគិតត្រឹមថ្ងៃទី១៣ ឧសភា មានពលរដ្ឋអាមេរិកជាង ១៥៣លាននាក់បានចាក់វ៉ាក់សាំងដូសទី១ ក្នុងនោះ មានជាង ១១៧លាននាក់បានចាក់គ្រប់ចំនួនដូសដែលចាក់ពីរដូសសម្រាប់វ៉ាក់សាំង Pfizer ឬ Moderna និងតែមួយដូសសម្រាប់វ៉ាក់សាំង Johnson & Johnson។ ដោយឡែកចាប់ពីថ្ងៃព្រហស្បតិ៍ ទី១៣ ឧសភា អាមេរិកចាប់ផ្តើមចាក់វ៉ាក់សាំងលើកូនក្មេងមានអាយុចន្លោះ ១២ និង ១៥ឆ្នាំដោយប្រើវ៉ាក់សាំង Pfizer៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ