លោកបៃដិន និងលោកពូទីន នឹងមានជំនួបមួយទល់នឹងមួយ លើកដំបូង នៅហ្សឺណែវ
ប្រធានាធិបតីអាមេរិក លោក ចូ បៃដិន នឹងជួបសមភាគីរុស្ស៊ី លោក វ្លាដេមៀ ពូទីន មួយទល់នឹងមួយ នៅថ្ងៃទី ១៦មិថុនា ២០២១ នៅទីក្រុងហ្សឺណែវប្រទេសស្វីស។ ជំនួបទ្វេភាគីនេះ ប្រព្រឹត្តទៅក្នុងខណៈដែលប្រទេសទាំងពីរកំពុងតានតឹងដាក់គ្នាខ្លាំង ក្នុងសំណុំរឿងជាច្រើនផង និងក្នុងខណៈដែលក្រុមប្រទេសមហាឧស្សាហកម្មហៅកាត់ថា G៧ និងក្រុមអូតង់ត្រូវជួបប្រជុំគ្នា ដើម្បីផ្តុំកម្លាំងរួមប្រឈមនឹងរុស្ស៊ីផង។
ចុះផ្សាយនៅថ្ងៃ៖
ស្តាប់ - ០២:០៤
បើតាមក្រេមឡាំង នៅក្នុងជំនួបទល់មុខគ្នាមួយទល់នឹងមួយ លោកបៃដិននិងពូទីន នឹងជជែកគ្នាអំពីការប្រយុទ្ធប្រឆាំងនឹងជំងឺរាតត្បាតសកលកូវីដ១៩ និងអំពីការដោះស្រាយវិវាទនៅក្នុងតំបន់។
ចំណែកសេតវិមានវិញ បានអះអាងថាមិនរង់ចាំលទ្ធផលជាដុំកំភួនទេ។ កម្មវត្ថុនៃជំនួបគឺធ្វើយ៉ាងស្តារទំនាក់ទំនងរវាងប្រទេសទាំងពីរឱ្យមានស្ថិរភាព និងគ្រាន់បើឡើងវិញ ដោយមានការជជែកអំពីប្រធានបទជាច្រើន មានអាទិ៍ នយោបាយដឹកនាំប្រទេសរបស់លោក ឡូកាឆេនកូនៅបេឡារុស្ស៊ីដែលម៉ូស្គូជាបង្អែកបង្គោល- អុយក្រែន ឬកម្មវិធីនុយក្លេអ៊ែរអ៊ីរ៉ង់ កូរ៉េខាងជើង តំបន់អាកទិក ការប្រែប្រួលអាកាសធាតុ ឬវិបត្តិស៊ីរីជាដើម។ល។ ការគ្រប់គ្រងអាវុធនុយក្លេអ៊ែរ ក៏មានចំណែកសំខាន់មួយនៅក្នុងជំនួបទ្វេភាគីនេះដែរ។
ចូលកាន់តំណែងជាប្រធានាធិបតីអាមេរិកនៅថ្ងៃទី ២០មករា ២០២១ លោកបៃដិន បានប្រកាសជំហរតឹងតែងដាក់រុស្ស៊ី ខុសស្រលះពីប្រធានាធិបតីអាមេរិកផុតអាណត្តិ ដោយធានាថាដាក់ទណ្ឌកម្មរុស្ស៊ីក្នុងករណីម៉ូស្គូចូលមករំខានលទ្ធិប្រជាធិបតេយ្យអាមេរិក តែលោកបៃដិនក៏ផ្តល់តម្លៃដល់ការចរចា និងមិនចង់បង្កជម្លោះតានតឹងថ្មីដែរ។
ជំនួបមួយទល់នឹងមួយ ត្រូវបានប្រកាសឡើងចំថ្ងៃដែលមេបក្សប្រឆាំងរុស្ស៊ី ណាវ៉ាល់នី រងការអង្កេតព្រហ្មទណ្ឌបីករណី។ តែបើតាមប្រភពអាមេរិក ជំនួបបៃដិន-ពូទីន មិនមែនជាអំណោយដល់រុស្ស៊ីទាក់ទងករណីណាល់វ៉ានីទេ។ ជំនួបបៃដិន-ពូទីន ជាមធ្យោបាយដ៏មានប្រសិទ្ធភាពក្នុងស្តារទំនាក់ទំនងដ៏តានតឹងរវាងប្រទេសទាំងពីរ។ កាលពីសប្តាហ៍មុន រដ្ឋមន្ត្រីការបរទេសអាមេរិកនិងរុស្ស៊ីបានបង្ហាញឆន្ទៈបន្ទូរបន្ថយសម្ពាធគ្នា ដោយបានជួបជជែកគ្នាប្រកបលក្ខណៈស្ថាបនា ស្មោះត្រង់និងគោរពគ្នា។
ប្រធានាធិបតីស្វីសបានសម្តែងភាពរីករាយដែលបានធ្វើម្ចាស់ផ្ទះរៀបចំជំនួបកំពូលទ្វេភាគីនេះ។ កាលពីឆ្នាំ១៩៨៥ ហ្សឺណែវធ្លាប់ទទួលឱ្យប្រធានាធិបតីអាមេរិក រ៉ូណាល់ រីហ្គែន ជួបជាមួយប្រមុខដឹកនាំសហភាពសូវៀត ហ្កូបាឆេវ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ