កូឡុំប៊ីបញ្ចេញទាហានដើម្បីស្តារសណ្តាប់ធ្នាប់ នៅទីក្រុង ដែលរញ្ជួយដោយបាតុកម្មប្រឆាំងរដ្ឋាភិបាល
ទៅតាមក្រឹត្យ ប្រធានាធិបតី កងទ័ពកូឡុំប៊ី ជាង១០០០នាក់ត្រូវបានដាក់ពង្រាយ នៅទីក្រុងCali ចាប់ពីថ្ងៃសៅរ៍ម្សិលមិញ ជាទី ដែលការប៉ះទង្គិច ដ៏ហិង្សា រវាង បាតុករ និងប៉ូលិស បានសម្លាប់មនុស្ស យ៉ាងតិច ១៣នាក់ កាលពីថ្ងៃសុក្រ។ ជាង១ខែមកហើយ កូឡុំប៊ី បានធ្លាក់ចូលក្នុងវិបត្តិសង្គមដ៏សែនជ្រៅ ដែលមួយចំណែក បណ្តាលមកពី ជំងឺរាតត្បាតកូវីដ។ សឹងជារៀងរាល់ថ្ងៃ ប្រជាជនកូឡុំប៊ី ជាពិសេស យុវជនបានធ្វើបាតុកម្មប្រឆាំងរដ្ឋាភិបាល ដើម្បីបរិហារអំពើពុករលួយ និងការអត់ការងារធ្វើ។
ចុះផ្សាយនៅថ្ងៃ៖
ស្តាប់ - ០២:៤០
នៅទីក្រុងCali ភាគខាងលិចប្រទេសកូឡុំប៊ី ការប៉ះទង្គិច ដ៏ហិង្សា រវាង ប៉ូលិស និង បាតុករ ដែលមានលាយឡំដោយជនស៊ីវិលប្រដាប់អាវុធ បានសម្លាប់មនុស្ស យ៉ាងតិច ១៣នាក់ ដែលនៅក្នុងនោះ ២នាក់ ជាប៉ូលិស កូឡុំប៊ី។ នៅថ្ងៃសុក្រ អ្នកស៊ើបអង្កេតរបស់អយ្យការកូឡុំប៊ីម្នាក់ បានបាញ់សម្លាប់បាតុករ ២នាក់ មុននឹងត្រូវក្រុមបាតុករ សង្រ្គប់វាយសម្លាប់វិញ។
ប្រឈមនឹងអសន្តិសុខ និងអំពើហិង្សាសម្លាប់មនុស្ស នៅក្នុងបាតុកម្មប្រឆាំងរដ្ឋាភិបាល លោកប្រធានាធិបតី អ៊ីវ៉ាន់ ឌុកេ បានចេញក្រឹត្យ កាលពីថ្ងៃសុក្រ ដើម្បីបញ្ជាឲ្យដាក់ពង្រាយកងទ័ព ជាង ១ពាន់នាក់ នៅទីក្រុងCali ឬ ៧ពាន់នាក់ សម្រាប់ទូទាំងប្រទេស។
នៅមួយខែមកនេះ កូឡុំប៊ីរងរញ្ជួយដោយបាតុកម្មប្រឆាំងរដ្ឋាភិបាលសឹងតែរាល់ថ្ងៃ។ ដំបូងឡើយ មហាបាតុកម្មប្រឆាំងរដ្ឋាភិបាល បានផ្ទុះឡើង នៅចុងខែមេសា ដើម្បីប្រឆាំងគម្រោងការរបស់រដ្ឋាភិបាលដែលចង់ ដំឡើងពន្ធលើតម្លៃបន្ថែម TVA ក្នុងគោលដៅ បានប្រាក់ចំណូល សម្រាប់ទប់ទល់សេដ្ឋកិច្ច ដែលត្រូវដើរអូសជើងដោយសារវិបត្តិកូវីដ។ ដោយសារ ប្រជាជនធ្វើបាតុកម្មប្រឆាំង ខ្លាំងក្លា រដ្ឋាភិបាលរបស់លោកអ៊ីវ៉ាន់ ឌុកេ បានលុបចោលវិធានការនោះវិញ ប៉ុន្តែ វាមិនបានទៅបំបាត់កំហឹង តវ៉ារបស់ប្រជាជនកូឡុំប៊ីនោះទេ។ នៅកូឡុំប៊ីជាទី ដែលប្រជាជនប្រមាណ ៤៥% នៃប្រជាជនសរុប ៥០លាននាក់ រស់នៅក្នុងភាពក្រីក្រ ប្រជាជនកូឡុំប៊ី ចុះថ្នល់ធ្វើបាតុកម្ម សឹងជារៀងរាល់ថ្ងៃ ដើម្បីទាមទារឲ្យរដ្ឋាភិបាលបង្កើតការងារធ្វើ ការសិក្សាឥតគិតថ្លៃ។
នៅមួយខែមកនេះ ចលនាបាតុកម្ម កម្លាំងងើបតវ៉ារបស់ប្រជាជន ដែលពេលខ្លះ ឈានដល់ការប្រើប្រាស់អំពើហិង្សា បានសម្លាប់ មនុស្ស យ៉ាងតិច ៥៩នាក់ របួស ២៣០០នាក់ និងបាត់ខ្លួន ១២៣នាក់។ ទោះមានការចរចា សម្របសម្រួលជាមួយ គណៈកម្មាធិការបាតុកម្មជាតិ រដ្ឋាភិបាលនៅតែមិនអាច ដោះស្រាយ បន្ថយកំហឹងតវ៉ារបស់ប្រជាជន។
សម្រាប់អ្នកវិភាគចលនាបាតុកម្មផ្ទុះខ្លាំងឡើង នៅពេលនេះ សបញ្ជាក់ពីកំហឹងរបស់យុវជន កូឡុំប៊ី ដែលត្រូវគេផាត់ចេញពីពិភពនយោបាយ គ្មានការងារធ្វើ គ្មានការសិក្សា និងធ្លាក់ខ្លួនកាន់តែក្រីក្រ ដោយសារវិបត្តិកូវីដ។ នៅពេល ១ភាគ៣នៃយុវជនកូឡុំប៊ី អាយុចន្លោះ ១៤ និង២៨ឆ្នាំ គ្មានការងាធ្វើ និងមិនបានចូលសាលា អ្នកជំនាញបានព្រមានថា កូឡុំប៊ី ដែលនៅតែជាប់ដៃប្រយុទ្ធជាមួយក្រុមឧទ្ទាមក្នុងស្រុក នឹងអាចធ្លាក់ខ្លួនជាប្រទេសដែលមានជម្លោះប្រដាប់អាវុធ ក្នុងក្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ