បាក់អគារនៅហ្វ្លរីដា៖ អ្នកជំនាញធ្លាប់បានព្រមានពីបញ្ហាគ្រោងអគារមុនហេតុការណ៍បាក់រលំ
ខណៈក្រុមអ្នកជួយសង្គ្រោះកំពុងខ្នះខ្នែងស្វែងរកអ្នកបាត់ខ្លួនប្រមាណ ១៥៩នាក់ របាយការណ៍ថ្មីមួយបានចេញផ្សាយនៅថ្ងៃសៅរ៍ ២៦ មិថុនាថាវិស្វករជំនាញមួយរូបធ្លាប់បានព្រមានកាលពី៣ ឆ្នាំមុន អំពីបញ្ហាធំៗរបស់អគារនៅរដ្ឋហ្វ្លរីដានៃសហរដ្ឋអាមេរិកមុនដួលរលំ។ តើបញ្ហាទាំងនោះមានអ្វីខ្លះ?
ចុះផ្សាយនៅថ្ងៃ៖
ស្តាប់ - ០២:២២
របាយការណ៍វិភាគសំណង់អគារដែលរៀបរៀងឡើងកាលពីខែតុលា ឆ្នាំ ២០១៨ បានរំលេចពីបញ្ហាដ៏ចំបងនៅក្នុងប្លុកអគារ Champlain Towers ដែលមានកម្ពស់ ១២ ជាន់ និងដែលបានបាក់រលំក្នុងជាយក្រុងម៉ៃអាមីរដ្ឋហ្វ្លរីដាកាលពីថ្ងៃព្រហស្បត៍ ទី២៤ មិថុនា។
អាជ្ញាធរ និងក្រុមអ្នកជំនាញអាមេរិកនៅមិនទាន់រកឃើញ មូលហេតុនៅពីក្រោយការដួលរលំអគារនៅឡើយទេ ហើយថាពួកគេត្រូវការពេលវេលាបន្ថែមទៀតដើម្បីស៊ើបអង្កេត។ ប៉ុន្តែ ដោយសារមានសំណួរចោទសួរកាន់តែច្រើនៗ កាសែតញូវយ៉កថែមស៍បានចុះផ្សាយរបាយការណ៍មួយដែលថាវិស្វករជំនាញម្នាក់បានរកចំណុចខូចខាតសំខាន់ៗមួយចំនួនដូចជា ការខូចខាតបន្ទះបេតុងនៅខាងក្រោមអាងហែលទឹក និងស្នាមប្រេះជាច្រើននៅចំណតរថយន្តក្រោមដីនៃអគារ។
វិស្វករជំនាញលោក Frank Morabito បានសរសេរនៅក្នុងរបាយការណ៍កាលពីឆ្នាំ ២០១៨ ថា ទោះបីជាការខូចខាតមួយចំនួនមានទ្រង់ទ្រាយតូចក៏ដោយ ក៏ភាគច្រើននៃបេតុងដែលសភាពចាស់ទ្រុឌទ្រោមត្រូវការជួសជុលឲ្យទាន់ពេលវេលា។
យោងតាមកាសែតញូវយ៉កថែមស៍ដដែល ការខូចខាតភាគច្រើនគឺទំនងជាបណ្តាលមកពីការប៉ះទង្គិចនឹងខ្យល់នៅតាមបណ្តោយឆ្នេរភាគខាងត្បូងរដ្ឋហ្វ្លរីដាដែលមានជាតិអំបិល ។ ខ្យល់ដែលមានជាតិអំបិលនេះអាចធ្វើឲ្យផ្នែកខ្លះនៃសំណង់អគារងាយនឹងច្រេះរបេះចេញបន្តិចម្តងៗ។
យ៉ាងណាក៏ដោយ នៅក្នុងរបាយការណ៍ខាងលើ គេមិនឃើញមានខ្លឹមសារណាដែលថាវិស្វករប្រឹក្សាជំនាញទាញសញ្ញាប្រាប់ថា អគារដែលមានអាយុ ៤០ ឆ្នាំនេះ អាចប្រឈមនឹងគ្រោះថ្នាក់ដួលរលំនោះទេ។ ប៉ុន្តែគេត្រូវការជួសជុលដើម្បីរក្សាភាពរឹងមាំរបស់អគារ។
គួរជ្រាបថា គិតត្រឹមយប់ថ្ងៃសៅរ៍ ទី២៦ មិថុនា គ្រោះបាក់រលំអគារ Champlain Towers នៅទីក្រុងម៉ៃអាមីរដ្ឋហ្វ្លរីដា បានសម្លាប់មនុស្សចំនួន ៤ នាក់ ហើយមនុស្សរាប់សិបនាក់ផ្សេងទៀត ត្រូវបានរាយការណ៍ថាបាត់ខ្លួននៅក្រោមគំនរអគារបាក់បែក។ ការណ៍នេះជំរុញមានការបារម្ភអំពីការកើនឡើងនូវចំនួនអ្នកស្លាប់ ចំណែកបងប្អូនជនរងគ្រោះវិញ មានអារម្មណ៍កាន់តែតានតឹង និងភ័យព្រួយទ្វេដងក្នុងការរងចាំដំណឹងពីសាច់ញាតិរបស់ពួកគេដែលបាត់ខ្លួនទៅជាង ២ ថ្ងៃមកហើយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ