ក្រុមហ៊ុនអាជីវកម្មអាមេរិកប្រមាណ២០០រងគ្រោះពីការវាយប្រហារតាមអ៊ីនធ័រនែត
ក្រុមហ៊ុនព័ត៌មានវិទ្យាអាមេរិកមួយ កាលពីថ្ងៃសុក្រ ទី២ កក្កដាម្សិលមិញ បានជំរុញឲ្យអតិថិជនបិទម៉ាស៊ីនមេ (servers) របស់ពួកគេបន្ទាប់ពីក្រុមចោរវាយប្រហារតាមអ៊ីនធ័រនែត បានចូលទៅរារាំងការចូលប្រើប្រព័ន្ធកុំព្យូទ័រ លើបណ្តាញវេទិការបស់ក្រុមហ៊ុន។ យោងតាមសេចក្តីរាយការណ៍ មានក្រុមហ៊ុនអាមេរិករហូតដល់ប្រមាណ ២០០ បានរងគ្រោះពីការវាយប្រហារតាមចុងក្រោយនេះ។
ចុះផ្សាយនៅថ្ងៃ៖
កាសេយ៉ា (Kaseya) ដែលជាក្រុមហ៊ុនផ្តល់សេវាកម្មគ្រប់គ្រងព័ត៌មានវិទ្យា និងសន្តិសុខអ៊ីនធ័រនែតឈានមុខគេដល់អាជីវកម្មខ្នាតតូចនិងមធ្យមបាននិយាយថា ខ្លួនបានខិតខំការពារមិនឲ្យអតិថិនច្រើននោះទេរងគ្រោះពីការវាយប្រហារតាមអ៊ីនធ័រនែត។ អតិថិជនរងគ្រោះគឺជាអ្នកប្រើកម្មវិធី VSA ដែលមានភ្ជាប់ហត្ថលេខា។
ទាក់ទងរឿងនេះ ក្រុមហ៊ុនការពារសន្តិសុខអ៊ីនធ័រនែត Huntress Labs បាននិយាយថាខ្លួន កំពុងធ្វើការជាមួយក្រុមហ៊ុនដៃគូនានាដែលជាគោលដៅក្នុងការវាយប្រហារចុងក្រោយនេះ ហើយមានអាជីវកម្មចំនួនរហូតដល់ប្រមាណជា ២០០ ត្រូវបានគេ បំប្លែង (ព័ត៌មាន ឬ ទិន្នន័យ) ទៅជាលេខកូដពិសេសដើម្បីររាំងការចូលប្រើដោយគ្មានការអនុញ្ញាត។
គួរជ្រាបថា ការវាយប្រហារលើក្រុមហ៊ុនអាមេរិកធ្វើឡើងតាមកម្មវិធី Ransomware ដែលជាធម្មតាទាក់ទងនឹងការចាក់សោទិន្នន័យនៅក្នុងប្រព័ន្ធដោយប្រើកម្មវិធីរារាំងផ្សេងៗ។ ពួកចោរអ៊ីនធ័រនែតបានទាមទារឲ្យក្រុមហ៊ុនបង់បង់ប្រាក់ដើម្បីទទួលបានសិទ្ធិចូលប្រើរបស់ខ្លួនមកវិញ។
ភ្លាមៗក្រោយរងការវាយប្រហារ កាសេយ៉ា បានជូនដំណឹងដល់បណ្តាក្រុមហ៊ុនដែលអតិថិជនរបស់ខ្លួនឲ្យបិទម៉ាស៊ីនមេ VSA របស់ពួកគេដើម្បីការពារខ្លួនពីការវាយប្រហារ។ ទីភ្នាក់ងារសន្តិសុខអ៊ីនធ័រនែតអាមេរិកបានអំពាវនាវឲ្យក្រុមហ៊ុននានាធ្វើតាមសេចក្តីណែនាំរបស់ក្រុមហ៊ុនកាសេយ៉ាដើម្បីសុវត្ថិភាព។ ក្រៅពីនេះ ទីភ្នាក់ងារសន្តិសុខអ៊ីនធ័រនែតអាមេរិកក៏បាននិយាយដែរថា ខ្លួនកំពុងចាត់វិធានការដើម្បីស្វែងយល់និងដោះស្រាយបញ្ហាដែលកំពុងកើតឡើង។
យោងទៅតាមក្រុមការងារពិសេសដែលធ្វើការឆ្លើយតបលើបញ្ហាផ្នែកប្រព័ន្ធកុំព្យូទ័ររបស់រដ្ឋាភិបាលនូវែលសេឡង់ អ្នកវាយប្រហារអ៊ីនធ័រណែតថ្មីៗនេះ គឺមកពីក្រុមដែលគេស្គាល់ថា រ៉េវីល (REvil)។ ក្រុមចោរអ៊ីនធ័រណែត REvil នេះ ក៏ជាអ្នកនៅពីក្រោយ ការវាយប្រហារកាលពីខែមុនលើក្រុមហ៊ុន JBS ដែលជាអ្នកកែច្នៃសាច់ដ៏ធំបំផុតមួយនៅលើពិភពលោក។ នៅក្នុងការវាយប្រហារកាលណោះ ក្រុមហ៊ុនដែលមានមូលដ្ឋាននៅប្រេស៊ីលនេះ បានចំណាយប្រាក់ bitcoin ក្នុងតម្លៃចំនួនប្រមាណ ១១ លានដុល្លារទៅឲ្យចោរអ៊ីនធ័រនែត។ នេះតាមទីភ្នាកងារអាមេរិក FBI។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ