លោកបៃដិនកំណត់បង្កើនការលក់រថយន្តអគ្គិសនីដើម្បីបុព្វហេតុអាកាសធាតុ
ប្រធានាធិបតីអាមេរិកលោក ចូ បៃដិន នៅថ្ងៃព្រហស្បតិ៍ ៥ សីហា បានចាប់កំណត់គោលដៅ បង្កើនការលក់រថយន្តអគ្គិសនី។ ក្នុងចំណោមរថយន្តទាំងអស់ដែលលក់បានក្នុងសហរដ្ឋអាមេរិក ចាប់ពីពេលនេះរហូតដល់ឆ្នាំ ២០៣០ លោកបៃដិន ចង់ឲ្យមានពាក់កណ្តាលជាប្រភេទយានយន្តដែលមិនបំភាយផ្សែងពុលនិងឧស្ម័នកាបូនិក។
ចុះផ្សាយនៅថ្ងៃ៖
ស្តាប់
គម្រោងរបស់លោកចូ បៃដិននេះ ធ្លាក់មកនៅបន្ទាប់ពីផែនការយុទ្ធសាស្រ្តដើម្បីបុព្វហេតុអាកាសធាតុត្រូវបានព្រងើយកន្តើយយ៉ាងខ្លាំងក្នុងសម័យគ្រប់គ្រងប្រទេសរបស់លោកអតីតប្រធានាធិបតីអាមេរិកដូណាល់ ត្រាំ។
តាមរយៈសេចក្តីថ្លែងការណ៍មួយ សេតវិមានអាមេរិកបានប្រកាសឲ្យដឹងថាលោកបៃដិនគ្រោងចុះហត្ថលេខាលើក្រឹត្យមួយនៅថ្ងៃព្រហស្បតិ៍ទី ៥ សីហា ឆ្នាំ២០២១។ កម្មវត្ថុនៃក្រឹត្យនេះគឺបង្កើនការលក់រថយន្តថ្មីដែលមិនបំភាយផ្សែងពុលនិងឧស្ម័នកាបូនិកឲ្យបានពាក់កណ្តាលក្នុងចំណោមចំនួនរថយន្តដែលលក់បានទាំងអស់ចាប់ពីពេលនេះរហូតដល់ឆ្នាំ ២០៣០។ រថយន្តគោលដៅដែលត្រូវលក់ទាំងនោះរួមមាន ឡានអគ្គិសនី ឡាន Hybrides ដែលដោតសាកបាន និងឡានប្រើថាមពលអ៊ីដ្រូសែន។
ក្រោយបទបញ្ជាខាងលើចូលជាធរមាន បម្រើបម្រាស់ឡានអគ្គិសនីរបស់អាមេរិកនឹងចូលរួមចំណែកជួយដោះស្រាយវិបត្តិអាកាសធាតុដែលជាបញ្ហាប្រឈមដ៏ធំបំផុតមួយរបស់ពិភពលោក។ នេះបើតាមសេតវិមានដដែល។
ក្រុមហ៊ុនផលិតរថយន្តធំៗរបស់អាមេរិក បានគាំទ្រចំពោះគម្រោងផែនការបស់លោកប្រធានាធិបតីចូ បៃដិន។ ក្រុមហ៊ុនចំនួនបីរួមមាន ក្រុមហ៊ុន Ford, General Motors និងក្រុមហ៊ុន Stellantis បានសម្តែងនូវការតាំងចិត្តរបស់ពួកគេដើម្បីសម្រេចគោលដៅលក់រថយន្តអគ្គិសនីឲ្យបានចន្លោះពី ៤០-៥០% នៅត្រឹមឆ្នាំ ២០៣០ខាងមុខ។
គួរជ្រាបថា សហរដ្ឋអាមេរិកគឺជាទីតាំងកកើតរបស់ក្រុមហ៊ុន Tesla ដែលជាក្រុមហ៊ុននាំមុខគេលើពិភពលោកក្នុងការផលិតរថយន្តអគ្គិសនី។ ប៉ុន្តែអាមេរិក មានភាពយឺតយ៉ាវក្នុងការប្រើប្រាស់យានយន្តប្រភេទនេះ ជាពិសេសបើប្រៀបធៀបជាមួយប្រទេសចិនឬអឺរ៉ុប។
ខណៈដែលការលក់រថយន្តអគ្គិសនីនៅអឺរ៉ុបមានចំនួនប្រមាណ ១០ % នៅអាមេរិកវិញមានចំនួនតិចជាង ២ % ប៉ុណ្ណោះ។ ដើម្បីជំរុញដល់ការលក់រថយន្តអគ្គិសនីក្នុងស្រុក លោកចូ បៃដិន ធ្លាប់បានអំពាវនាវឲ្យចំណាយកញ្ចប់ថវិការដ្ឋាភិបាលក្នុងចំនួនប្រមាណ ១៧៤ ពាន់លានដុល្លារ រួមទាំងប្រាក់លើកទឹកចិត្តអតិថិជនផងចំនួន ១០០ ពាន់លានដុល្លារផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ