សហរដ្ឋអាមេរិក រំឮកខួប២០ឆ្នាំ នៃព្រឹត្តិការណ៍ភេរវកម្ម ១១ កញ្ញា ២០២១
ព្រឹត្តិការណ៍ភេរវកម្ម ១១ កញ្ញា ឆ្នាំ២០០១ ជាអំពើភេរវកម្ម ដែលមានទ្រង់ទ្រាយធំ និងធ្ងន់ធ្ងរបំផុត ក្នុងប្រវត្តិសាស្រ្តមនុស្សជាតិ។ ភេរវជន ដែលជាសមាជិកបណ្តាញអាល់កៃដា បានប្លន់យន្តហោះចំនួន៤គ្រឿង ២គ្រឿងបានហោះទៅបុក អាគារភ្លោះ World Trad Center ទីក្រុងញូយ៉ក មួយគ្រឿងហោះទៅបុកអាគារមន្ទីរបញ្ចកោណ ក្រសួងការពារជាតិអាមេរិក និង មួយគ្រឿងទៀតដែលភេរវជនមានគម្រោង បង្ហោះទៅបុកវិមានកាពីតូល នៅក្រុងវ៉ាស៊ីនតោន តែត្រូវបានអ្នកដំណើរក្នុងយន្តហោះ រារាំង រហូតទាល់តែធ្លាក់នៅក្នុងរដ្ឋភែនស៊ីលវ៉ានី។ គឺនៅក្រោយហេតុការណ៍ដ៏តក់ស្លុតនេះហើយ ទើបអាមេរិក បានប្រកាសសង្រ្គាមប្រឆាំងភេរវកម្ម និងបានលើកទ័ពចូលទៅអាហ្វហ្កានីស្ថាន ដើម្បីកំទេចបណ្តាញអាល់កៃដា។ នៅក្នុងឱកាសខួប២០ឆ្នាំនេះ ក៏ជាទិវាពិសេសផងដែរ ព្រោះសហរដ្ឋអាមេរិក ទើបតែបានដកទ័ពចេញទាំងស្រុង ពីអាហ្វហ្កានីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥១
នៅវេលាម៉ោង ៨និង៣០នាទីព្រឹក ម៉ោងនៅទីក្រុងញូយ៉ក ដែលត្រូវនឹងម៉ោង ៧និង៣០នាទីយប់ម៉ោងនៅភ្នំពេញ លោកប្រធានាធិបតី ចូ បៃដិន ធ្វើដំណើរទៅដល់ អតីត ទីតាំងអាគារភ្លោះ World Trad Center ទីក្រុងញូយ៉ក ដែលបច្ចុប្បន្ន បានក្លាយទៅជាសារៈមន្ទីរ និងជាទីបូជនីយដ្ឋាន រំលឹកវិញ្ញាណក្ខន្ធដល់ជនរងគ្រោះ។
ពិធីរំលឹកវិញ្ញាណក្ខន្ធ នឹងចាប់ផ្តើម ដោយការស្មឹងស្មាតចំនួននាទី នៅវេលាម៉ោង ៨និង៤៦នាទី ជាម៉ោងដែលយន្តហោះទីមួយ ត្រូវបានភេរវជនបង្ហោះបំបុកអាគារ World Trad Center ខាងជើង។ នាទីទាំង៦ គឺជានិម្មិតរូបនៃហេតុការណ៍ដែលកើតឡើង នៅថ្ងៃទី១១ កញ្ញា យន្តហោះហោះបុកអាគារ World Trad Centerទាំង២ យន្តហោះហោះបុកអាគារមន្ទីរបញ្ចកោណ យន្តហោះធ្លាក់នៅក្បែរក្រុង Shanksville និង នៅពេលអាគារភ្លោះទាំង២ បានបាក់រលំបាត់រូបរាង។
បន្ទាប់ពីការស្មឹងស្មាត នឹងមានកម្មវិធីប្រគុំតន្ត្រី រហូតដល់ម៉ោង ១២និង៣០នាទី ដើម្បីឧទ្ទិសដល់វិញ្ញាណក្ខន្ធជនរងគ្រោះ ដែលបានស្លាប់ ក្នុងព្រឹត្តិការណ៍ វាយប្រហារភេរវកម្ម ១១ កញ្ញា ២០០១។ ដូចឆ្នាំមុនៗ ឈ្មោះជនរងគ្រោះទាំង ២៩៧៧នាក់ នឹងត្រូវហៅ រំលឹក នៅក្នុងឱកាសនេះ។ នៅឯទីតាំង Time Square បេះដូងកណ្តាលក្រុងញូយ៉ក ក៏នឹងមានកម្មវិធីជួបជុំ ដើម្បីរំលឹកវិញ្ញាណក្ខន្ធជនរងគ្រោះផងដែរ។
ចេញពីក្រុងញូយ៉ក លោកប្រធានាធិបតី ចូ បៃដិន នឹងបន្តដំណើរទៅ ជាយក្រុង Shanksville ក្នុងរដ្ឋ Pennsylvanie ជាទីដែលយន្តហោះ ជើងហោះហើរ United Airline 93 បានធ្លាក់ បណ្តាលឲ្យស្លាប់អ្នកដំណើរទាំង៤៤នាក់។ វីរៈភាព របស់អ្នកដំណើរលើយន្តហោះនេះ បានរារាំងភេរវជន មិនឲ្យបង្ហោះយន្តហោះឆ្ពោះទៅកាន់វិមានកាពីតូលក្រុងវ៉ាស៊ីនតោន។ កម្មវិធីរំលឹកខួប២០ឆ្នាំ នៅថ្ងៃនេះ នឹងត្រូវបិទបញ្ចប់ ដោយដំណើរទៅកាន់វិមានបញ្ចកោណ និម្មិតរូបនៃអំណាចយោធាអាមេរិក ដែលត្រូវបានភេរវជន ប្រើយន្តហោះបុកកំទេចមួយផ្នែក នៅថ្ងៃទី១១កញ្ញា ២០០១។
មិនខុសពី ព្រឹត្តិការណ៍វាយប្រហារ ដោយកងទ័ពជប៉ុន ទៅលើមូលដ្ឋានទ័ពជើងទឹកអាមេរិក នៅកោះPearl Harbor ក្នុងសម័យសង្រ្គាមលោកលើកទី២ និងហេតុការណ៍បាញ់សម្លាប់លោកប្រធានាធិបតី កេណឺឌី ព្រឹត្តិការណ៍ភេរវកម្ម ថ្ងៃទី១១ កញ្ញា ២០០១ បានចារ ស្ថិតក្នុងការចងចាំរួម របស់ប្រជាជនអាមេរិក។ សម្រាប់ពិភពលោកយើងទាំងមូល ទំព័រសករាជថ្មីបានចាប់បើកឡើង នៅក្រោយថ្ងៃទី១១ កញ្ញា ២០០១ ជាមួយនឹងសង្រ្គាមប្រឆាំងចលនាភេរវកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ