Global Witness ៖ ក្នុងឆ្នាំ២០២០ មានសកម្មជនបរិស្ថានចំនួន ២២៧នាក់ ត្រូវគេធ្វើឃាត
ឆ្នាំ២០២០ គឺជាឆ្នាំដែលមានចំនួនករណីឃាតកម្ម សម្លាប់សកម្មជនការពារបរិស្ថាន ដ៏ច្រើនបំផុតមិនធ្លាប់មាន។ យោងតាមរបាយការណ៍មួយ របស់អង្គការ Global Witness ដែលទើបតែចេញផ្សាយនៅថ្ងៃចន្ទនេះ គឺក្នុងឆ្នាំ២០២០ មានសកម្មជនការពារបរិស្ថាន ចំនួន២២៧នាក់ ដែលត្រូវបានគេធ្វើឃាត នៅទូទាំងពិភពលោក ហើយដែលភាគច្រើនបំផុត គឺស្ថិតនៅ តំបន់អាមេរិកឡាទីន។
ចុះផ្សាយនៅថ្ងៃ៖
ស្តាប់ - ០២:៤៥
នេះជាឆ្នាំទី២ហើយ ដែលកូឡុំប៊ី ស្ថិតនៅជួរមុខគេ បើនិយាយពីចំនួនករណីឃាតកម្ម ទៅលើសកម្មជនបរិស្ថាន និងអ្នកដឹកនាំសហគមមូលដ្ឋាន។ ឆ្នាំ២០២០ នៅកូឡុំប៊ី មានមនុស្សចំនួន៦៥នាក់ ត្រូវបានគេសម្លាប់ ដោយសារតែពួកគេ បានធ្វើសកម្មក្នុងការការពារបរិស្ថាន និងធនធានធម្មជាតិ។
បន្ទាប់ពីកូឡុំប៊ី ករណីឃាតកម្ម ទៅលើសកម្មជនបរិស្ថាន គឺមានភាគច្រើននៅ មិចស៊ិក ៣០ករណី ហ្វ៊ីលីពីន ២៩ករណី ប្រេស៊ីល ២០ករណី ហុងឌូរ៉ាស់ ១៧ករណី និងនៅតាមប្រទេសចំនួនជាង១០ប្រទេសផ្សេងទៀត។
សរុបក្នុងឆ្នាំ២០២០ ករណីឃាតកម្មទៅលើសកម្មជនបរិស្ថាន មានចំនួន ២២៧ករណី។ យោងតាមរបាយការណ៍ របស់អង្គការ Global Witness ២ភាគ៣ នៃករណីឃាតកម្មទាំងនេះ គឺកើតឡើងនៅតំបន់អាមេរិកកណ្តាល និងអាមេរិកខាងត្បូង។ ជនរងគ្រោះទាំងអស់ គឺមានលក្ខណៈរួមដូចគ្នា ពោលគឺ ៧០% នៃជនរងគ្រោះ គឺសុទ្ធតែជាអ្នកធ្វើការ ប្រយុទ្ធប្រឆាំងនឹងការកាប់បំផ្លាញព្រៃឈើ ហើយ១ភាគ៣ គឺសុទ្ធតែជាប្រជាជន ជនជាតិភាគតិចម្ចាស់ស្រុក។
លោកស្រី Celia Umenza សកម្មជនបរិស្ថាន តំណាងសហគមន៍ជនជាតិភាគតិច Nasa នៅកូឡុំប៊ី ហើយដែលធ្លាប់រងនូវការប៉ុនប៉ងសម្លាប់ ចំនួន៣ដងនោះ បានថ្លែងប្រាប់អ្នកយកព័ត៌មានបារាំងថា ជនជាតិភាគតិចម្ចាស់ស្រុក យល់ដឹងច្បាស់ណាស់ អំពីសារៈសំខាន់ នៃបរិស្ថាន និងធនធានធម្មជាតិ ដែលជាប្រភពនៃជីវិត។ ដូច្នេះហើយបានជាជនជាតិភាគតិចម្ចាស់ស្រុក ហ៊ានពលីជីវិត ដើម្បីតវ៉ាប្រឆាំងនឹងការបំផ្លាញព្រៃឈើ ការដាំដំណាំតែមួយមុខ ដែលបានបំផ្លាញរុក្ខជាតិនិងទម្រង់ជីវិតឯទៀត ព្រមទាំងការគាស់កកាយជីករ៉ែ ដោយខុសច្បាប់ជាដើម។
គួរបញ្ជាក់ថា អង្គការ Global Witness បានចាប់ផ្តើមប្រមូលទិន្នន័យស្តីពីការធ្វើឃាត សម្លាប់សកម្មជនបរិស្ថាន ចាប់ពីឆ្នាំ២០១២មក។ យោងតាមអង្គការនេះ ករណីឃាតកម្មរបៀបនេះ បានកើនឡើងខ្លាំង នៅរវាង៣ឆ្នាំចុងក្រោយនេះ ពោលគឺ ឆ្នាំ២០១៨ មាន១៦៧ករណី និង ២០១៩ ២១២ករណី។
នៅក្នុងរបាយការណ៍ប្រចាំឆ្នាំ២០២០ អង្គការ Global Witness មានបំណងពញាក់មតិសាធារណៈ ក៏ដូចជាថ្នាក់ដឹកនាំ ឲ្យយល់អំពីវិបត្តិអាកាសធាតុ ព្រមទាំងការបំផ្លិចបំផ្លាញធម្មជាតិ ដែលបង្កឡើងដោយក្រុមហ៊ុនឧស្សាហកម្ម កសិកម្មធំៗ។ ការកាប់បំផ្លាញព្រៃឈើ ការសាងសង់ទំនប់ កសិឧស្សាហកម្ម និងការជីកគាស់យករ៉ែ វិស័យទាំងនេះហើយដែលភាគច្រើន នៅពីក្រោយការបញ្ជា ឲ្យមានអំពើឃាតកម្មទៅលើសកម្មជនបរិស្ថាន។ Global Witness ក៏បានអំពាវនាវផងដែរ ដល់អង្គការសហប្រជាជាតិ ត្រូវតែទទួលស្គាល់ « សិទ្ធិក្នុងការទទួលបានបរិស្ថានស្អាតស្អំ » ថាគឺជាសិទ្ធិជាមូលដ្ឋាន នៅក្នុងទ្រឹស្តីសិទ្ធិមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ