SpaceX ៖ អ្នកដំណើរទៅលេងអវកាសទាំង៤នាក់ បានធ្វើដំណើរមកដល់ផែនដីវិញដោយសុវត្ថិភាព
អ្នកទេសចរណ៍អវកាស ទាំង៤នាក់ ដែលបានធ្វើដំណើរឡើងទៅលើអវកាស រយៈពេល៣ថ្ងៃ ជាមួយនឹងយាន SpaceX បានចុះមកដល់ផែនដីវិញ ដោយសុវត្ថិភាព នៅថ្ងៃអាទិត្យ ទី១៩កញ្ញានេះ។ នេះគឺជាការធ្វើដំណើរទៅកាន់អវកាស ជាលើកទី១ ដោយគ្មានវត្តមានអវកាសយានិកជំនាញនៅក្នុងយាន។ ភាពជោគជ័យនេះ របស់ក្រុមហ៊ុន SpaceX នឹងបើកទំព័រសករាជថ្មី សម្រាប់វិស័យទេសចរណ៍អវកាស។
ចុះផ្សាយនៅថ្ងៃ៖
ស្តាប់ - ០២:១៣
យាន SpaceX Crew Dragon បានចុះមកដល់ ផ្ទៃសមុទ្រអាត្លង់ទិក រដ្ឋហ្លូរីដា ម៉ោង៧ និង៦វិនាទី យប់ថ្ងៃសៅរ៍ ទី១៨កញ្ញា។ អ្នកដំណើរទាំង៤នាក់ បានចេញម្នាក់ម្តងៗ ពីយាននោះ ឡើងលើនាវាមួយទៀត ដែលគេសំចតចាំ ដើម្បីដឹកពួកគេ ទៅកាន់មជ្ឈមណ្ឌលអវកាស Kennedy Cap Canaveral ។
នៅក្នុងសន្និសីទកាសែត តាមទូរស័ព្ទ បន្ទាប់ពីការត្រលប់មកដល់ របស់អ្នកទេសចរណ៍អវកាស លោក Todd Ericson អគ្គនាយកក្រុមហ៊ុន Inspiration4 ដែលជាអ្នកទទួលបន្ទុកចាត់ចែងប្រតិបត្តិការធ្វើដំណើរ របស់អ្នកទេសចរណ៍អវកាសនេះ បានថ្លែងថា « សូមស្វាគមន៍ មកកាន់ ទំព័រទី២ នៃវិស័យអវកាស »។ ទំព័រទី២ ដែលជាទំព័រ នៃទេសចរណ៍អវកាស។
គួរបញ្ជាក់ថា នេះគឺលើកទី១ហើយ ដែលយានអវកាស បានដឹកមនុស្សឡើងទៅលើខ្សែគន្លងផែនដី ដោយគ្មានវត្តមានអ្នកអវកាសយានិក ទៅជាមួយ។ យាន SpaceX បានចេកចេញពីផែនដី នាំយកអ្នកទេសចរណ៍ទាំង៤នាក់ កាលពីថ្ងៃពុធទី១៥កញ្ញា វេលាម៉ោង៨យប់។ អ្នកដំណើរទាំង៤នាក់ ដែលក្នុងនោះ មានមហាសេដ្ឋី Jared Isaacman សុទ្ធតែជាមនុស្សសាមញ្ញ មិនមានជំនាញអវកាសទេ។ តែមុននឹងឡើងទៅ អ្នកដំណើរទាំង៤នាក់ ត្រូវបានទទួលការហ្វឹកហាត់សម រយៈពេល៥ខែ ដើម្បីឲ្យស៊ាំជាមួយជីវិតលើអវកាស និងអាចដោះស្រាយបញ្ហាបន្ទាន់នានា នៅក្នុងយាននោះ។
គួរកត់សំគាល់ថា ទំព័រសករាជថ្មីនៃវិស័យអវកាស បានចាប់ផ្តើមបើកហើយ ជាមួយនឹងការហោះធ្វើដំណើរ ដឹកយកអ្នកទេសចរណ៍ឡើងទៅ។ កាលពីខែកក្កដាកន្លងទៅ យានរបស់ក្រុមហ៊ុន Virgin Galactic និងយានមួយទៀត របស់ក្រុមហ៊ុន Blue Origin ក៏បាននាំយកអ្នកទេសចរណ៍ ឡើងទៅលើអវកាសដែរ តែមានរយៈពេលតែប៉ុន្មាននាទីតែប៉ុណ្ណោះ។
មានតែយានរបស់ក្រុមហ៊ុន SpaceX ទេ ដែលបានអនុញ្ញាតឲ្យអ្នកទេសចរណ៍ ស្ថិតនៅច្រើនថ្ងៃ នៅលើអវកាស។ ក្រុមហ៊ុន SpaceX បានអះអាងថា ជាមួយនឹងជោគជ័យនេះ មានមនុស្សកាន់តែច្រើន បានទាក់ទង ចង់ទិញសំបុត្រឡើងទៅអវកាស។ ជើងហោះហើរលើកក្រោយ ត្រូវគេគ្រោងធ្វើនៅខែមករា ដើមឆ្នាំ២០២២ ដោយក្នុងនោះមានអ្នកដំណើរ សេដ្ឋីអ្នកជំនួញចំនួន៣នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ