WHO/OMS អនុញ្ញាតវិធីព្យាបាលកូវីដ១៩ មួយទៀត ដោយការចាក់បញ្ចូលអង់ទីក័រសិប្បនិម្មិត
អង្គការសុខភាពពិភពលោក បានសម្រេចអនុញ្ញាតជាផ្លូវការ នូវវិធីសាស្ត្រព្យាបាលជំងឺកូវីដ១៩ មួយមុខទៀត ដោយការចាក់បញ្ចូលអង់ទីក័រសិប្បនិម្មិត ផលិតដោយមន្ទីរពិសោធន៍ Regeneron។ តែយ៉ាងណា វិធីព្យាបាលដែលមានតម្លៃថ្លៃខ្លាំងនេះ ត្រូវបានអ្នកជំនាញអង្គការសុខភាពពិភពលោក ផ្តល់អនុសាសន៍ ថាអាចប្រើបាន តែក្នុងករណីមួយចំនួនតូចតែប៉ុណ្ណោះ មិនមែនសម្រាប់អ្នកជំងឺកូវីដ១៩ ទូទៅគ្រប់គ្នានោះទេ។
ចុះផ្សាយនៅថ្ងៃ៖
ស្តាប់ - ០២:៤៩
យោងតាមការចុះផ្សាយរបស់ទស្សនាវត្តីវេជ្ជសាស្ត្រ The BMJ អ្នកជំនាញរបស់អង្គការសុខភាពពិភពលោក បានផ្តល់អនុសាសន៍ថា ការប្រើវិធីព្យាបាលដោយចាក់បញ្ចូលអង់ទីក័រសិប្បនិម្មិត អាចធ្វើទៅបានតែក្នុង២ករណីទេ។ ករណីទី១ គឺសម្រាប់អ្នកជំងឺ ទោះបីមានអាការៈមិនធ្ងន់ធ្ងរខ្លាំង តែជាមនុស្សងាយប្រឈមបំផុត និងការសង្គ្រោះបន្ទាន់នៅមន្ទីរពេទ្យ ឧទាហរណ៍ ដូចជាមនុស្សចាស់ជរា ដែមានប្រព័ន្ធអង់ទីក័រការពារខ្លួន ចុះខ្សោយខ្លាំង នៅក្រោយការវះកាត់ជាដើម។ ចំណែក ករណីទី២ គឺសម្រាប់អ្នកជំងឺមួយចំនួន ដែលមានអាការៈឈឺធ្ងន់ធ្ងរ ក្រោយឆ្លងកូវីដ៩ ក៏ប៉ុន្តែប្រព័ន្ធសរីរាង្គកាយ នៅតែមិនកម្រើកផលិតចេញជាអង់ទីក័រ។ ដោយឡែក សម្រាប់អ្នកជំងឺកូវីដ១៩ ទូទៅផ្សេងទៀត អ្នកជំនាញអះអាងថា ការព្យាបាលដោយការចាក់អង់ទីក័រសិប្បនិម្មិតបែបនេះ គឺមិនមានប្រយោជន៍ទេ។
ការសម្រេចរបស់អង្គការសុខភាពពិភពលោក គឺដោយផ្អែកលើលទ្ធផលសិក្សាសាកល្បង ទ្រង់ទ្រាយធំមួយចំនួន ជាក់ស្តែង ការសិក្សាអង្កេត Recovery នៅប្រទេសអង់គ្លេស ដែលបង្ហាញថា អង់ទីក័រសិប្បនិម្មិតនេះ អាចជួយសង្គ្រោះជីវិត អ្នកជំងឺកូវីដ ដែលឈឺធ្ងន់ខ្លាំង ហើយដែលសរីរាង្គ មិនបានផលិតអង់ទីករ័ទាល់តែសោះ។
សូមបញ្ជាក់ថា អង់ទីក័រសិប្បនិម្មិត ស្រាវជ្រាវផលិតដោយមន្ទីរពិសោធន៍ Regeneron នេះ គឺផ្សំដោយអង់ទីក័រ២ គឺ casirivimab និង imdevimab។ ចាក់បញ្ចូលទៅក្នុងសរសៃឈាម របស់អ្នកជំងឺកូវីដ១៩ អង់ទីក័រនេះអាចទៅជួយជ្រោមជ្រែង ប្រព័ន្ធសរីរាង្គការពារខ្លួន ឲ្យទប់ទល់ជាមួយមេរោគ Sars-CoV-2។ គឺអង់ទីក័រនេះហើយ ដែលគេបានចាក់សាកល្បង ទៅឲ្យលោកដូណាល់ត្រាំ កាលពីពេលលោកឆ្លងកូវីដ១៩ នៅខែកញ្ញា ឆ្នាំ២០២០។
ចែកចាយដោយមន្ទីរពិសោធន៍ Roche ដោយដាក់ឈ្មោះថា Ronapreve អង់ទីក័រសិប្បនិម្មិតនេះ មានតម្លៃប្រមាណជា ២០០០ដុល្លារក្នុងមួយដូស។ ពោលគឺជាតម្លៃដ៏ថ្លៃ ហើយដែលត្រូវអង្គការមួយចំនួនរិះគន់ ព្រោះប្រជាជននៅតាមប្រទេសក្រីក្រ ដែលគ្មានប្រព័ន្ធសុខាភិបាលរឹងមាំ នឹងគ្មានលទ្ធភាព បានវាមកព្យាបាលទេ។ ដោយហេតុនេះហើយ អង្គការសុខភាពពិភពលោក សហការជាមួយ ទីភ្នាក់ងារជាវឱសថអន្តរជាតិ Unitaid កំពុងតែចរចាជាមួយមន្ទីរពិសោធន៍ Roche ដើម្បីចរចាបញ្ចុះតម្លៃ។ អង្គការសុខភាពពិភពលោក ក៏បានស្នើសុំផងដែរ ឲ្យមន្ទីរពិសោធន៍នេះ ផ្ទេរបច្ចេកវិទ្យា ដើម្បីអនុញ្ញាតឲ្យគេអាចផលិត អង់ទីក័រប្រភេទនេះ ឲ្យបានច្រើន។
សូមរំលឹកថា វិធីព្យាបាលកូវីដ១៩ ដោយការចាក់បញ្ចូលអង់ទីក័រសិប្បនិម្មិតនេះ គឺជាវិធីព្យាបាលទី៣ហើយ ដែលអង្គការសុខភាពពិភពលោកអនុញ្ញាតជាផ្លូវការ។ វិធីទីមួយ គឺជាប្រភេទថ្នាំ Corticoïdes និងទី២ គឺជាការផ្សំរវាងថ្នាំ Antagonistes de l'interleukine 6 ជាមួយនឹងថ្នាំ Corticoïdes៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ