Zalmay Khalilzad ប្រេសិតអាេមរិកក្នុងកិច្ចការអាហ្វហ្កានីស្ថាន លាឈប់ពីតំណែង ក្រោយបរាជ័យដ៏អាម៉ាស
លោក Zalmay Khalilzad ប្រេសិតតំណាងសហរដ្ឋអាេមរិក ក្នុងការចរចាសន្តិភាព នៅអាហ្វហ្កានីស្ថាន បានសម្រេចចិត្តលាឈប់ពីមុខងារនេះហើយ។ នេះបើយោងតាមការបញ្ជាក់ ពីលោករដ្ឋមន្ត្រីការបរទេសអាមេរិក កាលពីថ្ងៃចន្ទ ទី១៨តុលា ម្សិលមិញ។ លោក Zalmay Khalilzad គឺជាអ្នកដឹកនាំការចរចា ឈានទៅសម្រេចកិច្ចព្រមព្រៀងសន្តិភាព ជាមួយក្រុមតាលីបង់ កាលពីខែកុម្ភៈ ឆ្នាំ២០២០ តែទីបំផុតក្រុមតាលីបង់បានឈានមកកាន់អំណាចវិញដោយផ្តាច់មុខ រីឯអាមេរិក ត្រូវដកទ័ព និងជម្លៀសមនុស្សយ៉ាងតក់ក្រហល់បំផុត កាលពីចុងខែសីហាកន្លងទៅ។
ចុះផ្សាយនៅថ្ងៃ៖
ស្តាប់ - ០២:៣៨
ចាប់ពីពេលនេះទៅ មុខងារប្រេសិតពិសេសតំណាងរដ្ឋាភិបាលអាមេរិក ក្នុងកិច្ចការអាហ្វហ្កានីស្ថាន នឹងត្រូវប្រគល់ទៅឲ្យលោក Thomas West ដែលធ្លាប់ជាអតីតទីប្រឹក្សាសេតវិមាន កាលពីក្នុងអាណត្តិលោកអូបាម៉ា។ នេះបើតាមការបញ្ជាក់ ក្នុងលិខិតប្រកាសដ៏ខ្លី របស់លោក អង់តូនី ប្លីងកិន ប្រមុខការបរទេសអាមេរិក។
នៅក្នុងលិខិតលាឈប់ លោក Zalmay Khalilzad បានលើកឡើងការពារអ្វីដែលសម្រេចបាន នៅក្នុងបេសកកម្មកន្លងមក ក្នុងសំណុំរឿងអាហ្វហ្កានីស្ថាន តែលោកក៏បានទទួលស្គាល់ផងដែរអំពីបរាជ័យ។ លោកបានសរសេរថា៖ « កិច្ចព្រមព្រៀងសន្តិភាពជាមួយក្រុមតាលីបង់ មិនបានប្រព្រឹត្តិធ្វើទៅ ដូចអ្វីដែលបានគ្រោងទុកទេ។ វាបណ្តាលមកពី ហេតុផលស្មុគស្មាញច្រើនណាស់ ដែលខ្ញុំនឹងជំរាបឲ្យដឹង ពីការយល់ឃើញ របស់ខ្ញុំនៅពេលក្រោយ »។
សូមបញ្ជាក់ថា លោក Zalmay Khalilzad ដែលមានដើមកំណើតអាហ្វហ្កានីស្ថាន បច្ចុប្បន្នអាយុ៧០ឆ្នាំ ត្រូវបានគេស្គាល់ថា ជាអ្នកការទូតដ៏ឆ្នើមម្នាក់ តាំងពីជំនាន់អាណត្តិលោក George W. Bush។ លោកធ្លាប់ជាអគ្គរដ្ឋទូតអាេមរិក ប្រចាំអាហ្វហ្កានីស្ថាន រវាងឆ្នាំ២០០៣-២០០៥។ នៅឆ្នាំ២០១៨ លោកដូណាល់ ត្រាំ បានតែងតាំងលោកឲ្យធ្វើជាប្រេសិតពិសេស ដឹកនាំការចរចាសន្តិភាពជាមួយក្រុមតាលីបង់ដោយផ្ទាល់តែម្តង។
ថ្ងៃទី២៩ កុម្ភៈ ២០២០ នៅទីក្រុងដូហា អាមេរិកបានចុះកិច្ចព្រមព្រៀងសន្តិភាព ជាមួយក្រុមតាលីបង់ ដោយអាេមរិកសន្យាដកទ័ពចេញ ចុងខែឧសភាឆ្នាំ២០២១ រីឯក្រុមតាលីបង់វិញសន្យាមិនវាយប្រហារអាមេរិក និងសម្ព័ន្ធមិត្ត ហើយផ្តាច់ទំនាក់ទំនងជាមួយក្រុមភេរវកម្មទាំងអស់ រាប់ទាំងក្រុមអាល់កៃដា និងក្រុមជីហាតអង្គការរដ្ឋអ៊ីស្លាម។ លោក Zalmay Khalilzad តែងតែបានអះអាងជានិច្ច ថាក្រុមតាលីបង់ នឹងគោរពការសន្យា ហើយព្រមធ្វើសម្បទាន ដើម្បីរៀបចំសន្តិភាពនៅអាហ្វហ្កានីស្ថាន។ តែទីបំផុត ការពិតជាក់ស្តែង គឺក្រុមតាលីបង់ បានត្រលប់មកកាន់អំណាចវិញ ដោយដាច់មុខតែម្នាក់ឯង និងដោយមិនគោរពការសន្យាទាំងឡាយ នៅក្នុងកិច្ចព្រមព្រៀងក្រុងដូហា។ រូបភាពនៃការដកទ័ព ជម្លៀសមនុស្សយ៉ាកតក់ក្រហល់ ចេញពីក្រុងកាប៊ុល កាលពីចុងខែសីហា បានក្លាយជាភាពអាម៉ាសដ៏ជូរចត់របស់អាមេរិក ក្នុងរយៈពេល២០ឆ្នាំនៃសង្គ្រាមអាហ្វហ្កានីស្ថាន។
គួរកត់សំគាល់ដែរថា អំណេះតទៅ សំណុំរឿងអាហ្វហ្កានីស្ថាន ហាក់កំពុងតែធ្លាក់ទៅក្នុងដៃរុស្ស៊ី និង ចិនហើយ។ នៅថ្ងៃអង្គារទី១៩តុលានេះ នៅក្រុងម៉ូស្គូ រុស្ស៊ីនឹងចាប់ផ្តើមបើកការប្រជុំចរចា លើសំណុំរឿងអាហ្វហ្កានីស្ថាន ដោយមាន ចិន និងប៉ាគីស្ថានចូលរួមដែរ។ លោក Ned Price អ្នកនាំពាក្យក្រសួងការបរទេសអាេមរិក បានបញ្ជាក់ថា អាមេរិកនឹងមិនចូលរួមក្នុងកិច្ចប្រជុំនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ