កូវីដ១៩ ៖ អាមេរិកអនុញ្ញាតឱ្យចាក់វ៉ាក់សាំង Pfizer-BioNTech លើកុមារអាយុពី ៥ ទៅ ១១ឆ្នាំ
គណៈកម្មការជំនាញអាមេរិក បានផ្តល់ការអនុញ្ញាតនៅថ្ងៃអង្គារទី ២៦តុលា ឱ្យប្រើវ៉ាក់សាំងប្រឆាំងជំងឺកូវីដ១៩ របស់ក្រុមហ៊ុន Pfizer សម្រាប់ចាក់លើកុមារអាយុពី ៥-១១ឆ្នាំ។ ជាមួយសេចក្តីអនុញ្ញាតនេះ យុទ្ធនាការចាក់ថ្នាំបង្ការកូវីដលើកុមារនៅអាមេរិក អាចនឹងចាប់ផ្តើម ពីដើមខែវិច្ឆិកានេះទៅតែម្តង។ កុមារនឹងត្រូវចាក់វ៉ាក់សាំងចំនួនពីរដូស ដោយឃ្លាតគ្នាចំនួនបីសប្តាហ៍ ហើយក្នុងមួយដូសៗមានបរិមាណតិចជាងដូសរបស់មនុស្សធំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ប្រជុំដោយគ្រូពេទ្យជំនាញរោគសាស្ត្រ ជំងឺឆ្លង ឬជំងឺកុមារ គណៈកម្មការឯករាជ្យអាមេរិក បានពិនិត្យវិភាគទិន្នន័យរបស់អាជ្ញាធរសុខាភិបាលជាតិនិងក្រុមហ៊ុនផលិតវ៉ាក់សាំងPfizer/BioNtech ដោយមានផ្សាយបន្តផ្ទាល់តាមអ៊ីនធ័រនែត និងប្រកាសទទួលស្គាល់ថាថ្នាំបង្ការពិតជាបានផ្តល់ផលល្អដល់ក្មេងអាយុពី៥-១១ឆ្នាំ ច្រើនជាងផ្តល់ផលរំខានឆ្ងាយណាស់។
បើតាមគណៈកម្មការ ក្មេងមិនប្រាកដជារួចខ្លួនយកឈ្នះកូវីដ១៩បានទេ។ នៅអាមេរិកកុមារ ជាង១,៩លាននាក់បានធ្លាក់ខ្លួនឈឺកូវីដ ក្នុងនោះជាង៨៣០០នាក់ឈឺធ្ងន់ត្រូវចូលសម្រាកព្យាបាលនៅមន្ទីរពេទ្យ និងជាងមួយរយនាក់បានស្លាប់។ ថ្វីបើក្មេងភាគច្រើន គ្មានរោគសញ្ញាកូវីដមែន តែក្មេងជាភ្នាក់ងារចម្លងជំងឺទៅមនុស្សធំ និង នៅពេលបានឆ្លងវីរុសកូវីដ ក្មេងអាចមានជំងឺរលាកផ្ទៃនៃសរសៃឈាម syndrome inflammatoire multi-systémique pédiatrique (MIS-C)ឬមានជំងឺកូវីដរ៉ាំរ៉ៃ (អស់មេរោគកូវីដហើយ បន្តឈឺរយៈពេលវែង)។ នេះជាការលម្អិតរបស់គណៈកម្មការ។
បើតាមលទ្ធផលសាកល្បងរបស់ក្រុមហ៊ុន ថ្នាំបង្ការ Pfizer មានប្រសិទ្ធភាពអាចការពារកុមារអាយុ៥-១១ឆ្នាំ មិនឱ្យឆ្លងមានរោគសញ្ញាកូវីដ បានដល់ទៅ ៩០,៧%។ ចំណែកហានិភ័យឬផលរំខានរបស់ថ្នាំបង្ការ បង្កឱ្យមានជំងឺរលាកសាច់ដុំបេះដូង ដែលគេសង្កេតឃើញមានកើតរួចមកហើយលើក្មេងជំទង់ និងក្មេងពេញវ័យ (ភាគច្រើនភេទប្រុស) ក្រោយការចាក់វ៉ាក់សាំងPfizer និង Moderna ត្រូវបានលើកមកជជែកយ៉ាងលម្អិត។ ប៉ុន្តែនៅក្នុងការសាកល្បងលើកុមារជាង៣០០០នាក់ គ្មាននរណាម្នាក់មានសញ្ញារោគរលាកសាច់ដុំបេះដូងទេ។ អ្នកជំនាញគិតថាផលរំខានកម្រកើតមានលើកុមារណាស់ ព្រោះផលរំខាននេះមានពាក់ព័ន្ធនឹងកំរិតអ័រមូនTesterone ដែលក្មេងជំទង់និងទើបពេញវ័យឡើងខ្លាំង។ ហានិភ័យសូន្យគ្មានទេ តែថ្នាំបង្ការពិតជាផ្តល់ផលល្អខ្លាំងជាងច្រើន។
កុមារក៏ដូចជាមនុស្សធំ នឹងត្រូវចាក់វ៉ាក់សាំងចំនួនពីរដូស ដោយឃ្លាតគ្នាចំនួនបីសប្តាហ៍ ហើយក្នុងមួយដូសៗមានបរិមាណតែ១០មីក្រូក្រាម មិនមែន៣០មីក្រូក្រាមដូចមនុស្សធំទេ។ ប៉ុន្តែ តើនឹងមានកុមារអាមេរិកប៉ុន្មាននាក់ព្រមទៅចាក់ ? បើតាមការស្ទង់មតិ ឪពុកម្តាយចំនួនមួយភាគបីប្រកាសត្រៀមនាំកូនទៅចាក់ភ្លាម មួយភាគបី កំពុងពិចារណា និងមួយភាគបីទៀត មិនឱ្យកូនចាក់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ