Nasa បង្ហោះយាន ទៅសាកល្បងបង្វែរទិសដុំអាចម៌ផ្កាយមួយ ឲ្យចៀសឆ្ងាយកុំឲ្យហោះមកបុកផែនដី
កាលពីយប់ថ្ងៃអង្គារ ទី២៣វិច្ឆិកា ទីភ្នាក់ងារអវកាសNasa អាមេរិក បានបាញ់បង្ហោះយានមួយ ដែលយាននេះ នឹងមានតួនាទី ហោះទៅបុកដុំអាចម៌ផ្កាយមួយ ស្ថិតនៅចម្ងាយ ប្រមាន១១លានគីឡូម៉ែត្រ ពីផែនដី។ នេះគឺជាការធ្វើតេស្តសាកល្បង ដើម្បីបង្វែរទិសដៅហោះ របស់ដុំអាចម៌ផ្កាយ កុំឲ្យវាហោះមកបុកនឹងផែនដី នៅថ្ងៃខាងមុខ។
ចុះផ្សាយនៅថ្ងៃ៖
ស្តាប់ - ០២:៤៨
ម៉ោង១០ និង២១នាទីយប់ ថ្ងៃអង្គារទី២៣វិច្ឆិកា យាន Dart (Double Asteroid Redirection Test) ត្រូវបានបាញ់បង្ហោះ ឡើងទៅលើ ចេញពីស្ថានីយ៍អវកាស Vandenberg ក្នុងរដ្ឋកាលីហ្វ័រញ៉ា។ យានដែលមានទំហំ ប៉ុនកូនឡាននេះ ត្រូវបានបាញ់បង្ហោះ ដោយយានទម្រ Falcon 9 របស់ក្រុមហ៊ុនSpaceX មុននឹងផ្តាច់ខ្លួនចេញ នៅប៉ុន្មាននាទីក្រោយមក។
យាន Dart នឹងបន្តដំណើរ ក្នុងរយៈចំងាយប្រមាណ ១១លានគីឡូមែត្រ ដោយត្រូវចំណាយពេល ចំនួន១០ខែ ដើម្បីទៅជួបនឹងដុំអាចម៌ផ្កាយមួយ ឈ្មោះ Dimorphos ដែលមានអង្កត់ផ្តិច ប្រវែងប្រមាណជា១៦០ម៉ែត្រ។ ក្នុងល្បឿន ២៤០០០គីឡូម៉ែត្រ ក្នុងមួយម៉ោង យានDart នឹងបោះទៅបុក Dimorphos ដើម្បីបង្វែរទិសខ្សែគន្លងហោះ របស់ដុំអាចម៌ផ្កាយនេះ។ Dimorphos គឺជាដុំអាចម៌ផ្កាយមួយ រណបនឹងអាចម៌ផ្កាយធំមួយទៀត ឈ្មោះ Didymos ដែលមានអង្កត់ផ្ចិតប្រមាណជា ៧៨០ម៉ែត្រ។
យោងតាមអ្នកជំនាញ Dimorphos មានខ្សែគន្លងហោះជុំវិញ Didymos ដោយប្រើរយៈពេល ១១ម៉ោង និង៥៥នាទី។ ជាមួយនឹងកម្លាំងបុករបស់ យាន Dart គេរំពឹងថា នឹងអាចប្តូរខ្សែគន្លងនេះ ដោយកាត់បន្ថយចំនួន ១០នាទី។ លោក Tom Statler អ្នកជំនាញនៅ Nasa អះអាងថា ១០នាទីតិចមែន តែវាអាចគ្រប់គ្រាន់ ដើម្បីបញ្ចៀសបង្វែខ្សែគន្លងរបស់ដុំអាចម៌ផ្កាយមួយ កុំឲ្យវាហោះមកបុកនឹងផែនដី។ តែយ៉ាងណា លទ្ធផលសាកល្បងបានល្អកម្រិតណា គឺវាអាស្រ័យទៅលើធាតុផ្សំនៃម៉ាសរបស់ដុំអាចម៌ផ្កាយនោះដែរ ថាតើវាដុំថ្មរឹង ឬក៏ជាថ្មផុយ ងាយបែកជាកំទេចតូចៗ នៅពេលណាមានអ្វីមួយហោះទៅបុក។
យោងតាម ទីភ្នាក់ងារអវកាស Nasa ខ្សែគន្លងហោះរបស់ដុំអាចម៌ផ្កាយ Dimorphos មិនបង្កគ្រោះថ្នាក់អ្វីដល់ផែនដីនោះទេ។ តែគេបានជ្រើសរើសវា ដើម្បីធ្វើការសាកល្បង។ Nasa អះអាងថាបើបានជោគជ័យ បច្ចេកទេសទេសនេះ នឹងអាចការពារភពផែនដី ព្រមទាំងអាយុជីវិតមនុស្សជាតិ ពីការហោះបុករបស់ដុំអាចម៌ផ្កាយនានា នៅក្នុងពេលអនាគត។
លោក Thomas Zurbuchen ប្រធានផ្នែកវិទ្យាសាស្ត្រនៃបេសកកម្ម តម្លៃ៣០០លានដុល្លារនេះ បានលើកឡើងថា បច្ចុប្បន្ន Nasa បានស្រង់ទិន្នន័យ ស្គាល់ចំនួនអាចម៌ផ្កាយ ប្រមាណជាង ២៧៥០០ដុំ ក្នុងទំហំធំតូចខុសៗគ្នា ដែលនៅក្បែរផែនដី តែអាចម៌ផ្កាយទាំងនេះ មិនបង្កគ្រោះថ្នាក់អ្វីមកលើផែនដីទេ។ ក៏ប៉ុន្តែ អ្នកជំនាញរូបនេះអះអាងថា អ្នកវិទ្យាសាស្រ្តស្គាល់តែ៤០% នៃចំនួនអាចម៌ផ្កាយ ដែលមានទំហំ ចាប់ពី១៤០ម៉ែត្រទៅតែប៉ុណ្ណោះ។ ដូច្នេះ វានៅមានអាចម៌ផ្កាយដ៏ច្រើនសន្ធឹកសន្ធាប់ផ្សេងទៀត ដែលគេត្រូវស្រាវជ្រាវបន្ថែមទៀត ដើម្បីធ្វើយ៉ាងណា អភិវឌ្ឍន៍បច្ចេកទេស ការពារផែនដី កុំឲ្យមានដុំអាចម៌ផ្កាយហោះមកបុក ទៅថ្ងៃអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ