អាហ្សងទីនចុះកិច្ចព្រមព្រៀងជាមួយចិន ចូលរួមក្នុងគម្រោងផ្លូវមួយខ្សែក្រវ៉ាត់មួយ
កាលពីថ្ងៃទី៦កុម្ភៈ អាហ្សង់ទីន បានចុះកិច្ចព្រមព្រៀងជាមួយចិន ដើម្បីចូលរួមក្នុងគម្រោងផ្លូវសូត្រថ្មី ឬហៅថាផ្លូវមួយខ្សែក្រវ៉ាត់មួយ។ ការចុះកិច្ចព្រមព្រៀងនេះ ត្រូវបានធ្វើឡើង ដោយលោកប្រធានាធិបតីអាហ្សង់ទីន ជាមួយនិងលោកស៊ី ជីនពីង ក្នុងពេលដែលលោក បានទៅចូលរួមកម្មវិធីសម្ពោធកីឡាអូឡាំពិករដូវរងារ នៅទីក្រុងប៉េកាំង។
ចុះផ្សាយនៅថ្ងៃ៖
យោងតាមការផ្សាយរបស់ទូរទស្សន៍ចិន CCTV កាលពីថ្ងៃអាទិត្យទី៦កុម្ភៈ លោក Alberto Fernandez ប្រធានាធិបតីអាហ្សង់ទីន បានចុះហត្ថលេខាជាមួយលោកប្រធានាធិបតីចិន ស៊ី ជីនពីង នៅទីក្រុងប៉េកាំង លើកិច្ចព្រមព្រៀង រួមសហការគ្នាលើកកំពស់មហាគម្រោង ផ្លូវមួយខ្សែក្រវ៉ាត់មួយ។ ចាប់ពីពេលនេះទៅ អាហ្សង់ទីន នឹងចូលរួមជាផ្លូវការនៅក្នុងគម្រោងផ្លូវសូត្រថ្មីរបស់ចិន។
គួររំលឹកថា គម្រោងផ្លូវសូត្រថ្មី ឬហៅថាគម្រោងផ្លូវមួយខ្សែក្រវ៉ាត់មួយរបស់ចិន គឺជាគម្រោងដ៏ធំមហាសាល ដែលចិនមានបំណងតភ្ជាប់ ខ្សែបណ្តាញ ហេដ្ឋារចនាសម្ព័ន្ធនៅគ្រប់ទ្វីបទាំងអស់។ តាមរយៈការសាងសង់ផ្លូវថ្នល់ ស្ពាន កំពង់ផែ ព្រលានយន្តហោះ និងសួនឧស្សាហកម្មធំៗ នៅតាមប្រទេសនានាដែលចូលរួម គម្រោងនេះនឹងបើកផ្លូវ តភ្ជាប់បណ្តាញពាណិជ្ជកម្ម និងទីផ្សារដ៏ធំទូលាយសម្រាប់សេដ្ឋកិច្ចចិន។
យោងតាមតួលេខផ្លូវការ គិតមកត្រឹមពេលនេះ ចិនបានចុះកិច្ចព្រមព្រៀងជាមួយប្រទេសចំនួន ១៥០ប្រទេសហើយ។ ក្រសួងពាណិជ្ជកម្មចិនអះអាងថា ក្នុងឆ្នាំ២០២១កន្លងទៅ ក្រុមហ៊ុនចិនបានវិនិយោគចំនួន ប្រមាណ២ម៉ឺនលានដុល្លារ នៅក្នុងផែនការនានា ស្ថិតក្នុងគម្រោងផ្លូវមួយខ្សែក្រវ៉ាត់មួយនេះ។
តែយ៉ាងណាក៏ដោយ យោងតាមអ្នកជំនាញមួយចំនួន គម្រោងផ្លូវមួយខ្សែក្រវ៉ាត់មួយរបស់ចិន បានតម្រូវឲ្យមានវិនិយោគសាងសង់ដ៏ច្រើនសន្ធឹកសន្ធាប់ តាមរយៈថវិកាកម្ចីដែលប្រទេសសាម៉ី ត្រូវចុះកិច្ចសន្យាជាមួយចិន ឬក្រុមហ៊ុនចិន។ សំណង់ហេដ្ឋារចនាសម្ព័ន្ធខ្លះ មិនបានផ្តល់ផលប្រយោជន៍ជាក់ស្តែង ទៅឲ្យប្រជាជនម្ចាស់ស្រុកទេ។ សម្រាប់ប្រទេសក្រីក្រមួយចំនួន ផែនការវិនិយោគរបស់ចិន អាចជាអន្ទាក់បំណុល ដែលទីបំផុត ចិនអាចប្រមូលក្តោបក្តាប់ គ្រប់គ្រងហេដ្ឋារចនាសម្ព័ន្ធយុទ្ធសាស្ត្រតែម្តង។ ជាក់ស្តែងដូចករណីនៅស្រីលង្ការ ដែលក្រោយពេលគ្មានប្រាក់សងការប្រាក់ រដ្ឋស្រីលង្ការត្រូវបង្ខំចិត្តប្រគល់កំពង់ផែដ៏ធំរបស់ខ្លួន ឲ្យចិនគ្រប់គ្រង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ