លោកបៃដិនត្រូវថ្លែងសុន្ទរកថាប្រចាំឆ្នាំនៅមុខសភាពេញអង្គក្នុងបរិបទនៃវិបត្តិជុំទិស
នៅថ្ងៃអង្គារ ទី១ មីនា ឆ្នាំ២០២២នេះ ប្រធានាធិបតីអាមេរិកលោក ចូ បៃដិន នឹងត្រូវថ្លែងសុន្ទរកថាប្រចាំឆ្នាំនៅចំពោះមុខសភាពេញអង្គ។ ប្លែកជាងសព្វដង សុន្ទរកថារបស់លោកបៃដិននៅពេលនេះធ្វើឡើងនៅក្នុងបរិបទនៃវិបត្តិជុំទិសរួមមានទាំងសង្រ្គាមអ៊ុយក្រែន និងបញ្ហានយោបាយក្នុងសហរដ្ឋអាមេរិកផង។
ចុះផ្សាយនៅថ្ងៃ៖
ស្តាប់ - ០២:០៥
ឡើងគ្រប់គ្រងប្រទេសអាមេរិករយៈពេលមួយឆ្នាំមកនេះ លោកចូ បៃដិនបានជួបប្រឈមបញ្ហាជាច្រើនមានតាំងពីវិបត្តិនយោបាយនៅក្នុងប្រទេស ការសម្រេចដកកងទ័ពចេញពីអាហ្វហ្កានីស្ថាន វិបត្តិកូវីដ១៩ ហើយថ្មីចុងក្រោយបង្អស់គេនេះគឺការវាយប្រហាររបស់រុស្ស៊ីលើអ៊ុយក្រែន។ សង្គ្រាមនៅអ៊ុយក្រែនដែលបានរុញច្រានឲ្យទំនាក់ទំនងអាមេរិក-រុស្ស៊ីធ្លាក់ចុះខ្លាំងហៅលែងឮរាប់ចាប់តាំពីសម័យចាប់តាំងពីសង្គ្រាមត្រជាក់មក។
ទោះជាបែបនេះក្តី គេរំពឹងថានៅពេលថ្លែងនៅមុខសភាពេញអង្គនាថ្ងៃអង្គារនេះ លោកប្រធានាធិបតីអាមេរិកបៃដិននឹងនិយាយសង្កត់ធ្ងន់ពីភាពវិជ្ជមានដោយជំរុញស្ដារសុទិដ្ឋិនិយម ក្នុងចំណោមពលរដ្ឋអាមេរិកឡើងវិញ។
ជាកស្តែង នៅពេលដែលត្រូវបានអ្នកសារព័ត៌មាន ABC News សួរថាតើអ្វីជាចំណុចសំខាន់ដែលនឹងមាននៅសុន្ទរកថារបស់លោកប្រធានាធិបតីអាមេរិកវ័យ ៧៩ឆ្នាំ? អ្នកនាំពាក្យសេតវិមានអ្នកស្រី ជែន សាគី ឆ្លើយតបវិញថាគឺជំនឿរបស់លោកលើភាពខ្លាំងធន់របស់ពលរដ្ឋអាមេរិកនិងកម្លាំងរបស់ពលរដ្ឋអាមេរិក។
គួរជ្រាបថា ក្រៅតែវិបត្តិខាងក្រៅប្រទេស នៅក្នុងសហរដ្ឋអាមេរិកផ្ទាល់ក៏មានបញ្ហានយោបាយ បញ្ហាលទ្ធិប្រជាធិបតេយ្យអាមេរិកដែលរងការគំរាមកំហែង ចំណែកការការបែកបាក់គ្នាក្នុងចំណោមប្រជាជនអាមេរិកាំងនៅតែមានដែរចាប់តាំងពីហេតុការណ៍ចូលលុកលុយវិមានកាពីតូលកាលពីខែមករា ឆ្នាំ ២០២១មក។
ម្ចាស់សេតវិមានអាមេរិកលោក បៃដិន អះអាងថារដ្ឋបាលរបស់លោកកំពុងបំពេញពាក្យសន្យាដ៏ធំរួមមានតាំងពីការបង្រួបបង្រួមជាតិ បញ្ចប់វិបត្តិកូវីដ និងការស្ដារកិត្យានុភាពអាមេរិកនៅលើពិភពលោក។
នៅក្នុងបទសម្ភាសន៍មួយកាលពីចុងសប្តាហ៍កន្លងទៅនេះ លោកចូ បៃដិន បានលើកឡើងពីមតិរបស់លោកដែលថាសហរដ្ឋអាមេរិកកំពុងដើរចេញពីបញ្ហាមួយចំនួនបើទោះបីជាវាមានដំណើរយឺតក៏ដោយចុះ តែវាដើរឆ្ពោះទៅមុខសន្សឹមៗហើយ។ ក៏ប៉ុន្តែពលរដ្ឋអាមេរិកមិនយល់ស្របឡើយទៅនឹងការលើកឡើងរបស់លោកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ