វ៉េណេស៊ុយអេឡា ដោះលែងអ្នកទោសជនជាតិអាមេរិក២នាក់ ក្រោយប្រេសិតអាមេរិកទៅជួបលោកម៉ាឌូរ៉ូ
នៅថ្ងៃពុធទី៩មីនា ក្រសួងការបរទេសអាមេរិក បានបញ្ជាក់ឲ្យដឹងថា វេណេស៊ុយអេឡា បានដោះលែងអ្នកទោស ជនជាតិអាមេរិក ចំនួន២នាក់។ នេះគឺជាការបោះជំហានថ្មី ក្នុងការស្តារទំនាក់ទំនង រវាងវ៉េណេស៊ុយអេឡា និងសហរដ្ឋអាមេរិក បន្ទាប់ពីប្រេសិត តំណាងលោកចូ បៃដិន បានទៅជួបលោក នីកូឡា ម៉ាឌូរ៉ូ កាលពីថ្ងៃចន្ទដើមសប្ដាហ៍នេះ។ វាជាអាចមធ្យោបាយមួយសម្រាប់អាមេរិក ដើម្បីចាប់ផ្តើមនាំចូលប្រេងពីវ៉េណេស៊ុយអេឡាឡើងវិញ ខណៈដែលខ្លួន ទើបតែបានសម្រេចឈប់នាំចូលប្រេងរបស់រុស្ស៊ី។
ចុះផ្សាយនៅថ្ងៃ៖
ស្តាប់ - ០២:៥៧
យោងតាមលិខិតប្រកាសរបស់លោកអង់តូនី ប្លីងកិន អ្នកទោសជនជាតិអាមេរិក ចំនួន២នាក់ត្រូវបានអាជ្ញាធរវ៉េណេស៊ុយអេឡា ដោះលែង និងបានធ្វើដំណើរមកដល់សហរដ្ឋវិញហើយ នៅថ្ងៃពុធទី៩មីនា។ អ្នកទោសទាំង២នាក់នោះ គឺ ឈ្មោះ Gustavo Cardenas និង Jorge Alberto Fernandez។ លោក អង់តូនី ប្លីងកិន បានសម្ដែងការអបអរ និងបានអំពាវនាវ ឲ្យវ៉េណេស៊ុយអេឡា ដោះលែងអ្នកទោសអាមេរិកទាំងអស់ ដែលវ៉េណេស៊ុយអេឡា បានចាប់បង្ឃាំងដោយអយុត្តិធម៌។
គួរបញ្ជាក់ថា លោក Gustavo Cardenas គឺជាអតីតនាយកសាខាក្រុមហ៊ុនប្រេងជាតិវ៉េណេស៊ុយអេឡា PDVSA ប្រចាំនៅសហរដ្ឋអាមេរិក។ លោកត្រូវបានតុលាការវ៉េណេស៊ុយអេឡា ផ្តន្ទាទោសឲ្យជាប់ពន្ធនាគារ ដោយចោទពីបទពុករលួយ កាលពីឆ្នាំ២០១៧ ជាមួយនឹងមនុស្ស៥នាក់ផ្សេងទៀត ក្នុងនោះជនជាតិអាមេរិក ដើមកំណើតវ៉េណេស៊ុយអេឡា ៤នាក់ និងជនជាតិវ៉េណេស៊ុយអេឡា កាន់បណ្ណស្នាក់នៅអចិន្ត្រៃយ៍អាមេរិក១នាក់ផងដែរ។ អង្គការសិទ្ធិមនុស្សមួយឈ្មោះ Foro Penal បានចាត់ទុកអ្នកទោសទាំង៦នាក់នេះ ជាអ្នកទោសនយោបាយ ក្នុងចំណោមអ្នកទោសនយោបាយទាំងអស់ ២៥១នាក់ ដែលរបបផ្តាច់ការរបស់លោកម៉ាឌូរ៉ូ បានចាប់បង្ឃាំងដោយអយុត្តិធម៌ ដើម្បីបំបិតមាត់បក្សប្រឆាំង។
ចំណែកលោក Jorge Alberto Fernandez គឺជាជនជាតិអាមេរិកដើមកំណើតគុយបា ត្រូវបានអាជ្ញាធរវ៉េណេស៊ុយអេឡា ចាប់ខ្លួននៅដើមឆ្នាំ២០២១ ដោយចោទពីបទភេរវកម្ម។
គួររំលឹកថា ទំនាក់ទំនងរវាងអាមេរិក និងវ៉េណេស៊ុយអេឡា បានជួបភាពរកាំរកូសខ្លាំងបំផុត បន្ទាប់ពីអាមេរិក បានបដិសេធមិនទទួលស្គាល់លទ្ធផលបោះឆ្នោត នៅឆ្នាំ២០១៨ ហើយបានដាក់ទណ្ឌកម្មសេដ្ឋកិច្ច លើរបបផ្តាច់ការរបស់លោកម៉ាឌូរ៉ូ។ មុននឹងការផ្តាច់ចំណងនេះ អាមេរិកធ្លាប់ជាអតិថិជនទិញប្រេង ដ៏ធំបំផុត របស់វ៉េណេស៊ុយអេឡា។ ៩០%នៃចំណូលរបស់ប្រទេសនេះ គឺបានមកពីការលក់ប្រេង។
ថ្មីៗនេះ គេសង្កេតឃើញ រដ្ឋាភិបាលលោកចូ បៃដិន បានព្យាយាមបោះដៃចាប់របបរបស់លោកម៉ាឌូរ៉ូវិញ។ ជាក់ស្ដែង កាលពីថ្ងៃចន្ទកន្លងទៅ ប្រេសិតពិសេសតំណាងលោកចូ បៃដិន បានទៅជួបជាមួយលោកម៉ាឌូរ៉ូ ដល់ទីក្រុងការ៉ាកាស។ ជាជំនួបដែលលោកប្រធានាធិបតីវ៉េណេស៊ុយអេឡា អះអាងថា បានធ្វើឡើងដោយការគោរពគ្នា ក្នុងន័យការទូត តែដោយមិនបញ្ជាក់លំអិតអំពីខ្លឹមសារនៃការនិយាយគ្នាទេ។ ដោយឡែក លោកស្រី ជែន សាគី អ្នកនាំពាក្យសេតវិមាន បានអះអាងថា ប្រេសិតរបស់អាមេរិក បាននិយាយច្រើនរឿងណាស់ ជាមួយលោកម៉ាឌូរ៉ូ ហើយក្នុងនោះក៏មានសំណុំរឿងថាមពលដែរ។
គួរបញ្ជាក់ថា កាលពីថ្ងៃអង្គារ រដ្ឋាភិបាលលោកចូ បៃដិន បានប្រកាសឈប់ទិញប្រេងរបស់រុស្ស៊ី ដើម្បីជាការបន្ថែមទណ្ឌកម្មសំពងលើលោកពូទីន ដែលបានធ្វើសង្គ្រាមនៅអ៊ុយក្រែន។ ជាមធ្យម អាមេរិកនាំចូលប្រេងពីរុស្ស៊ីប្រមាណជា៨% នៃតម្រូវការក្នុងស្រុក។ ការងាកទៅចាប់ដៃជាមួយវ៉េណេស៊ុយអេឡា ឡើងវិញនេះ អាចជាមធ្យោបាយ ដើម្បីបានទិញប្រេងពីប្រទេសនេះ មកបំពេញតម្រូវការរបស់អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ