អាមេរិកចោទប្រកាន់រុស្ស៊ីបួននាក់ពីបទវាយប្រហារអ៊ីនធ័រនែត ក្នុងវិស័យថាមពល
នៅថ្ងៃព្រហស្បតិ៍ទី ២៤មីនា២០២២ សហរដ្ឋអាមេរិកបានទម្លាយឱ្យដឹងអំពីការចោទប្រកាន់ជាផ្លូវការលើ ជនជាតិរុស្ស៊ីចំនួន បួននាក់ ពីបទវាយប្រហារអ៊ីនធ័រនែត បំរើការឱ្យរដ្ឋាភិបាលរុស្ស៊ី។ បើតាមតុលាការអាមេរិក ចោរអ៊ីនធ័រនែតនោះបានធ្វើសកម្មភាពនៅរវាងពី ឆ្នាំ២០១២ ដល់ឆ្នាំ២០១៨ ប្រឆាំងនឹងក្រុមហ៊ុនថាមពលជាច្រើននៅលើពិភពលោក និងនៅសហរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០២:១៣
ការចោទប្រកាន់ពលរដ្ឋរុស្ស៊ីបួននាក់ពីបទវាយប្រហារអ៊ីនធ័រនែត ដែលតុលាការអាមេរិកបង្ហើបបង្ហាញជាសាធារណៈនៅថ្ងៃនេះ ជាសំណុំរឿងពីរ ដែលកើតឡើងមុនសង្គ្រាមនៅអ៊ុយក្រែនទេ។
សំណុំរឿងទីមួយ ជាបទចោទប្រកាន់សម្រេចឡើងកាលពីខែមិថុនា ២០២១ ប្រឆាំងនឹងវិស្វករជំនាញខាងបង្កើតកម្មវិធី Evgueni Gladkikh អាយុ៣៦ឆ្នាំ ធ្វើការឱ្យក្រសួងការពារជាតិរុស្ស៊ី។ ចោរអ៊ីនធ័រនែតរុស្ស៊ីរូបនេះ ជាប់ចោទពីបទបានចូលរួមវាយប្រហាររោងចក្រចម្រាញ់ប្រេង នៅក្នុងប្រទេសផ្សេងមួយ កាលពីឆ្នាំ២០១៧ ដោយប្រើកម្មវិធី Triton។ តុលាការអាមេរិកមិនបញ្ជាក់ថាជាប្រទេសណាទេ ប៉ុន្តែនៅឆ្នាំ២០១៧នោះក្រុមហ៊ុនប្រេងអារ៉ាប៊ីសាអូឌីតធ្លាប់រងការវាយប្រហារប្រភេទនេះ។ បន្ទាប់មកចោរអ៊ីនធ័រនែតនិងអ្នកផ្សំគំនិតបានប៉ុនប៉ងវាយប្រហាររចនាសម្ព័ន្ធប្រេងអាមេរិកដែរ តែមិនបានសម្រេច។ នេះបើតាមប្រភពដដែល។
បទចោទប្រកាន់ទីពីរ សម្រេចឡើងនៅខែសីហា២០២១ដែរ ប្រឆាំងនឹងជនជាតិរុស្ស៊ីបីនាក់ Pavel Akoulov, Mikhail Gavrilov និងMarat Tioukov ដែលគេសង្ស័យថាជាភ្នាក់ងារសន្តិសុខរុស្ស៊ី (FSB) ពីបទបានដឹកនាំវាយប្រហារទ្រង់ទ្រង់ធំលើបណ្តាញព័ត៌មានវិទ្យាក្នុងវិស័យថាមពលពិភពលោក នៅរវាងពីឆ្នាំ២០១២ដល់ឆ្នាំ ២០១៧។ ដំបូង ក្រុមចោរបានប្រើកម្មវិធី Draconfly លបចូលក្នុងម៉ាស៊ីនចំនួន១៧០០០គ្រឿង និងបន្ទាប់មក ពួកគេបានសាកល្បងប្រើកម្មវិធីជំរិត Draconfly 2.0 ចំនួន ៣៣០០ដង លើក្រុមហ៊ុនចំនួនជាង៥០០ រាប់ទាំងភ្នាក់ងារគ្រប់គ្រងនុយក្លេអ៊ែរអាមេរិក នៅKansasផង។
គ្មានជនរុស្ស៊ីណាម្នាក់ក្នុងចំណោមជាប់ចោទទាំងបួននាក់ត្រូវចាប់ខ្លួនបានទេ។ សហរដ្ឋអាមេរិកសន្យាផ្តល់រង្វាន់ដល់១០លានដុល្លារដល់អ្នកដែលអាចផ្តល់ព័ត៌មានទាក់ទងនឹងជនជាប់ចោទនេះ។
ចោរអ៊ីនធ័រនែត មានពាក់ព័ន្ធនឹងរដ្ឋរុស្ស៊ី ជាតំណាងការគំរាមកំហែងរចនាសម្ព័ន្ធសំខាន់ៗរបស់អាមេរិកនិងពិភពលោក យ៉ាងធ្ងន់ធ្ងរ និងឥតដាច់។ នេះបើតាមប្រសាសន៍របស់លោកស្រីអនុរដ្ឋមន្ត្រីក្រសួងយុត្តិធម៌អាមេរិក លីហ្សា ម៉ូណាកូ Lisa Monaco នៅក្នុងសេចក្តីថ្លែងការណ៍ ដោយបន្ថែមទៀតថា នេះជាបទចោទប្រកាន់លើសកម្មភាពវាយប្រហារអ៊ីនធ័រនែតរបស់ចោរអ៊ីព័ត៌មានវិទ្យារុស្ស៊ីដែលកន្លងរួចទៅហើយទេ ប៉ុន្តែក្រុមហ៊ុនអាមេរិកត្រូវតែប្រុងប្រយ័ត្នខ្លាំង និងពង្រឹងប្រព័ន្ធការពាររបស់ខ្លួន។ កាលពីថ្ងៃចន្ទ លោកប្រធានាធិបតីអាមេរិកចូបៃដិន បានអំពាវនាវឱ្យក្រុមហ៊ុនអាមេរិកត្រូវមានកាតព្វកិច្ចស្នេហាជាតិ ការពារខ្លួនពីការវាយប្រហារតាមអ៊ីនធ័រនែតមកពីខាងរុស្ស៊ី ដែលអាចនឹងសងសឹកតាមវិធីនេះ ក្រោយពីរងទណ្ឌកម្មរបស់ក្រុមបស្ចិមលោកពីបទចូលឈ្លានពានអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ