លោក Elon Musk ស្នើទិញយក Twitter ទាំងស្រុង
ម្ចាស់ក្រុមហ៊ុន Tesla និង Space X លោក Elon Musk បានស្នើទិញយកបណ្តាញ Twitter ទាំងស្រុងមកគ្រប់គ្រង។ ការស្នើទិញយកភាគហ៊ុន១០០%នេះ គឺបន្ទាប់ពីមហាសេដ្ឋីកំពូលរូបនេះ បានទិញភាគហ៊ុនមួយផ្នែក របស់ Twitter កាលពីដើមសប្ដាហ៍មុន។ លោក អេឡុម ម៉ាសក៏ បានអះអាងថា លោកមានបំណងធ្វើកំណែទម្រង់ជាច្រើន សម្រាប់ Twitter ដើម្បីពង្រឹងតួនាទីរបស់បណ្តាញសង្គមមួយនេះ ជាទីកន្លែង ធានាសិទ្ធិសេរីភាព នៃបញ្ចេញមតិ។
ចុះផ្សាយនៅថ្ងៃ៖
ស្តាប់ - ០២:៣៦
នៅក្នុងលិខិតមួយ ផ្ញើទៅកាន់លោក Bret Taylor ប្រធានក្រុមប្រឹក្សារដ្ឋបាលរបស់ក្រុមហ៊ុន Twitter លោក Elon Musk បានសរសេរថា លោកសូមស្នើទិញ ប្រមូលយកភាគហ៊ុនទាំងអស់របស់Twitter ក្នុងតម្លៃ ៥៤,២០ដុល្លារ ក្នុងមួយភាគហ៊ុន។
យោងតាមលិខិតនេះ តម្លៃសរុបរបស់ Twitter នឹងមានចំនួន ៤៣,៤ពាន់លានដុល្លារ ខណៈដែលតម្លៃបច្ចុប្បន្ន មានត្រឹមតែ ៣៧ពាន់លានដុល្លារ។ ក្រោយដំណឹងថា លោក Elon Musk ចង់ទិញ Twitter ទាំងស្រុងនេះ ភាគហ៊ុនរបស់ Twitter នៅ Wall street បានឡើងថ្លៃចំនួន ៧% ពោលគឺស្មើនឹង ៤៩ដុល្លារ ក្នុងមួយហ៊ុន។
លោក Elon Musk បានបញ្ជាក់ថា នេះគឺសំណើដ៏ខ្ពស់ និងចុងក្រោយបំផុត របស់លោកហើយ។ ប្រសិនបើក្រុមប្រឹក្សារដ្ឋបាលរបស់ Twitter នៅតែបដិសេធ មិនព្រមលក់មកឲ្យលោក គឺលោកនឹងពិចារណាឡើងវិញ ទាក់ទិនតួនាទីលោកក្នុងនាមជាម្ចាស់ភាគហ៊ុនម្នាក់ របស់ Twitter។
សូមបញ្ជាក់ថា យោងតាមទស្សនាវត្តី Forbes លោក Elon Musk ម្ចាស់ក្រុមហ៊ុន Tesla និង Space X មានទ្រព្យសម្បត្តិតម្លៃ ២៧៤ពាន់លានដុល្លារ ពោលគឺជាមហាសេដ្ឋីដែលមានទ្រព្យលើសគេ លើពិភពលោក។ កាលពីដើមសប្តាហ៍មុននេះ លោកបានទិញភាគហ៊ុនរបស់ Twitter ចំនួន ៧៣,៥លានហ៊ុន។ លោក Elon Musk បានអះអាងថាលោកបានចំណាយប្រាក់វិនិយោគជាមួយ Twitter ក៏ព្រោះតែលោកឃើញថាបណ្តាញនេះ មានតួនាទីសំខាន់ណាស់ នៅក្នុងសិទិ្ធសេរីភាពបញ្ចេញមតិ និងជាភាពចាំបាច់នៃសង្គម ក៏ដូចជាលទ្ធិប្រជាធិបតេយ្យ។
ក្រោយក្លាយជាម្ចាស់ហ៊ុនមួយផ្នែក របស់Twitter មហាសេដ្ឋីរូបនេះ បានសរសេរសារលើទំព័រ Twitter របស់ខ្លួន ថាចង់ស្នើឲ្យមានការផ្លាស់ប្តូរសំខាន់ៗចំនួន តួយ៉ាងដូចជាការបង្កើតឲ្យមានប៊ូតុង Edit ។ លោកក៏អះអាងថា ចង់ពង្រឹងប្រព័ន្ធ Twitter ឲ្យក្លាយជាទីកន្លែងបញ្ចេញមតិដោយសេរី តាមរយៈការដកចេញខ្លះ នូវប្រព័ន្ធរិតបន្តឹងដោយស្វ័យប្រវត្តិរបស់បណ្តាញមនេះ។
ដោយឡែក លោក Elon Musk បានបដិសេធ មិនចូលរួមធ្វើជាសមជិកក្រុមប្រឹក្សារដ្ឋបាលរបស់ Twitter ទេ។ អ្នកវិភាគយល់ថា នេះជាយុទ្ធសាស្ត្រមួយរបស់លោក Elon Musk ដើម្បីមិនឲ្យដៃជាប់ចំណង ហើយអាចមានឱកាស និងលទ្ធភាពកាន់តែច្រើន ក្នុងការស្នើការធ្វើកំណែទម្រង់នានា នៅក្នុងTwitter ។ អ្នកជំនាញនៅ Wedbush Securities បានលើកឡើងថា តាមការស្មានគឺ ក្រុមប្រឹក្សារដ្ឋបាល Twitter ប្រហែលជាគ្មានជំរើសអ្វីផ្សេង ក្រៅពីយល់ព្រមលក់ ភាគហ៊ុនទាំងអស់របស់ Twitter ទៅឲ្យលោក Elon Musk នោះឡើយ ព្រោះថាមិនអាចរកអ្នកទិញណាផ្សេង ដែលហ៊ានឲ្យតម្លៃខ្ពស់ម្លឹងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ