អាមេរិក ប្រកាសបង្កើនជំនួយ ៨០០លានដុល្លារ ដល់អ៊ុយក្រែន
ថ្ងៃព្រហស្បតិ៍ ទី២១មេសា ប្រធានាធិបតីអាមេរិក ចូ បៃដិន បានប្រកាសផ្តល់ជំនួយយោធាចំនួន៨០០លានដុល្លារបន្ថែមទៀត សម្រាប់ជួយដល់អ៊ុយក្រែន។ អ៊ុយក្រែនដែលរងការឈ្លានពានពីរុស្ស៊ី។ សេតវិមានអាមេរិក បានបញ្ជាក់ថា ជំនួយបន្ថែមនេះ មានជាអាវុធ កាំភ្លើងធំ កាំភ្លើងផ្លោង គ្រាប់ជិត១៤៤ ០០០ម៉ឺនគ្រាប់ ហើយថែមទាំងយន្តហោះដ្រូន ទៀតផង។ ជាសរុប ចាប់តាំងពីផ្ទុះសង្គ្រាមរុស្ស៊ី-អ៊ុយក្រែនមក, អាមេរិកបានផ្តល់ជំនួយ ២,៦ ពាន់លានដុល្លារ។ នៅផ្នែកមនុស្សធម៌វិញ លោក ចូ បៃដិន ជំរុញឲ្យពលរដ្ឋអាមេរិកជួយជនភៀសខ្លួនអ៊ុយក្រែន ក្នុងការស្នាក់នៅ។
ចុះផ្សាយនៅថ្ងៃ៖
ស្តាប់ - ០១:៤៣
ចំណែកទិដ្ឋភាពនៅសមរភូមិវិញ លោក ចូ បៃដិន សង្កត់ធ្ងន់ថា គ្មានទាល់មានភស្តុតាងណា ដែលអាចបញ្ជាក់ថា រុស្ស៊ីបានគ្រប់គ្រងតំបន់ Marioupol ទាំងស្រុងនោះទេ។ ហើយបើតាមលោក បៃដិន, គឺលោក ពូទីន គ្មានថ្ងៃឈ្នះសង្គ្រាម ហើយអាចត្រួតត្រាលើអ៊ុយក្រែនបានទេ។
លោកប្រធានាធិបតីអាមេរិក ចូ បៃដិន ប្រសាសន៍ ៖
“លោក ពូទីន មិនអាចសម្រេចមហិច្ឆិតារបស់ខ្លួននៅសមរភូមិប្រយុទ្ធបានទេ។ ជាច្រើនសប្តាហ៍ បន្ទាប់ពីបានវាយប្រហារបំផ្លោងគ្រាប់បែកនៅក្រុងកៀវ តែរដ្ឋធានីអ៊ុយក្រែននៅតែឈររឹងមាំដដែល។ ប្រធានាធិបតី Zelensky និងរដ្ឋាភិបាលរបស់គាត់ដែលកើតចេញពីការបោះឆ្នោតដោយប្រជាធិតេយ្យ គឺនៅតែបន្តកាន់អំណាចដដែល។
កម្លាំងយោធាអ៊ុយក្រែន ដែលចូលរួមដ៏សកម្មនិងដ៏អង់អាចក្លាហានពីប្រជាជនស៊ីវិលអ៊ុយក្រែនផង បានប្រយុទ្ធការពារប្រទេសជាតិរបស់ពួកគេប្រឆាំងនឹងរុស្ស៊ី។ ពួកគេប្រមូលផ្តុំកម្លាំង ពួតដៃគ្នា តាំងតែពីដំបូងដៃមកម្ល៉េះ ហើយក៏ត្រូវបំពាក់អាវុធ ផ្តល់គ្រាប់កាំភ្លើង និងជួយជ្រោមជ្រែងបច្ចេកទេសនិងផ្តល់ព័ត៌មានយោធា ពីបណ្តាប្រទេសសេរី ដែលដឹកនាំដោយសហរដ្ឋអាមេរិកយើង។
បើទោះបីជា រុស្ស៊ីនៅតែបន្តប្រតិបត្តិការយោធានិងបន្តសកម្មភាពព្រៃផ្សៃរបស់ខ្លួនទៅលើអ៊ុយក្រែនក្តី ប៉ុន្តែ លោក ពូទីន បានយល់ខុស។ យល់ខុសដែលគិតថា អង្គការសម្ព័ន្ធមិត្តអូតង់ សហភាពអឺរ៉ុប និងសម្ព័ន្ធមិត្តយើងនៅអាស៊ី កំពុងតែបែកបាក់គ្នា និងចែកជើងចែកផ្លូវគ្នាដើរ។ ពូទីនគិតថា សម្ព័ន្ធមិត្តយើងប្រេះឆាគ្នា ហើយនិងគាត់តែបន្តយល់ខុសបែបនេះ។ ជាថ្មីម្តងទៀត យើងនឹងបង្ហាញ ពូទីន ថាគាត់យល់ច្រឡំហើយ។
យើងមិនដែលភ្លេចឡើយ ពីការសម្តែងឆន្ទៈប្តេជ្ញាដើម្បីការពារសេរីភាព ហើយយើងប្រឆាំងដាច់ខាត់នឹងរបបផ្តាច់ការឃោរឃៅព្រៃផ្សៃ។ ”
ជាមួយនឹងគ្នានេះ លោកប្រធានាធិបតី ចូ បៃដិន បញ្ជាក់ថាលោកគ្រោងនឹងសុំជំនួយជាបន្ថែមទៀត ពីសភាអាមេរិកCongres ។ បន្ថែមលើសនេះទៀត សហរដ្ឋអាមេរិកមានចេតនាផ្តល់ជំនួយសេដ្ឋកិច្ច ចំនួន៥០០លានដុល្លារបន្ថែមទៀត ទៅដល់រដ្ឋាភិបាលអ៊ុយក្រែន។ មិនតែប៉ុណ្ណោះ លោកថា សហរដ្ឋអាមេរិកនិងសម្ព័ន្ធមិត្ត នឹងចេញសកម្មភាពជួយឲ្យទាន់សភាពការណ៍ ហើយនិងបន្តជួយអាវុធដល់អ៊ុយក្រែនតាមសេចក្តីតម្រូវការ។ ផ្ទុយពីនេះ រដ្ឋាភិបាលអាមេរិក បានដាក់ទណ្ឌកម្មសេដ្ឋកិច្ចលើរុស្ស៊ី។ រាល់នាវារុស្ស៊ី គឺត្រូវហាមដាច់ខាត មិនឲ្យចុះចតលើកំពង់ផែរបស់អាមេរិកឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ