លោកអគ្គនាយកអង្គការសុខភាពពិភពលោក អំពាវនាវឲ្យការពារសិទ្ធិរំលូតកូនរបស់ស្ត្រី
នៅលើទំព័រ Twitter កាលពីថ្ងៃពុធទី៤ឧសភា លោកអគ្គនាយកអង្គការសុខភាពពិភពលោក បានសរសេរសារ អំពាវនាវ ឲ្យពិភពលោករួមគ្នាការពារសិទ្ធិរបស់ស្ត្រី ក្នុងការរំលូតកូន។ ដោយមិនបញ្ចេញឈ្មោះ សាររបស់លោក អគ្គនាយកអង្គការសុខភាពពិភពលោកនេះ ហាក់បានសំដៅទៅសហរដ្ឋអាមេរិក ខណៈដែលអំឡុងពេលនេះ កំពុងតែមានការជជែកតវ៉ាយ៉ាងខ្លាំង នៅមុខតុលាការកំពូលអាមេរិក ដែលចង់លប់ចោលច្បាប់បើកសិទ្ធិឲ្យស្ត្រី អាចរំលូតកូនបាន។
ចុះផ្សាយនៅថ្ងៃ៖
ស្តាប់ - ០២:៥៥
“ការចេញច្បាប់ ហាមឃាត់ស្ត្រីមិនឲ្យរំលូតកូន នឹងមិនអាចបញ្ឈប់ករណីរំលូតកូនបានទេ។ ផ្ទុយទៅវិញ ស្ត្រីនឹងងាកទៅស្វែងរកសេវារំលូតកូន ក្រៅប្រព័ន្ធសុខាភិបាល ដែលអាចបង្កគ្រោះថ្នាក់ដល់ជីវិត” ។ នេះគឺជាសាររបស់លោក Tedros Adhanom Ghebreyesus អគ្គនាយកអង្គការសុខភាពពិភពលោក បង្ហោះលើទំព័រ Twitter។ លោកបានបន្តថា ការទទួលបានសេវារំលូតកូន ដែលត្រឹមត្រូវតាមក្បួនពេទ្យ គឺវាអាចជួយសង្រ្គោះជីវិតស្ត្រីពពោះ។ លើសពីនេះ លោកអគ្គនាយកអង្គការសុខភាពពិភពលោក បានលើកឡើងថា ស្ត្រីគ្រប់រូបត្រូវតែមានសិទ្ធិពេញលេញ នៅពេលណាវាទាក់ទងទៅនឹងរូបរាងកាយ ព្រមទាំងសុខភាពរបស់ពួកគេ។
គួរបញ្ជាក់ថា សាររបស់លោកអគ្គនាយកអង្គការសុខភាពពិភពលោក គឺវាជួនចំពេល ដែលមានការជជែកតវ៉ាជាខ្លាំង នៅសហរដ្ឋអាមេរិក ទាក់ទិននឹងសិទ្ធិរំលូតកូនរបស់ស្ត្រី។ ទោះមិនបញ្ចេញឈ្មោះឲ្យចំ តែគេអាចស្មានបានថា វាជាប្រតិកម្មរបស់លោកអគ្គនាយកអង្គការសុខភាពពិភពលោក ចំពោះដំណឹងដែលថា ចៅក្រមនៃតុលាការកំពូលអាមេរិក ចង់លុបច្បាប់ ដែលធានាការពារសិទ្ធិរំលូតកូនរបស់ស្ត្រី។
សូមរំលឹកដែរថា អង្គការសុខភាពពិភពលោក បានចេញផ្សាយកាលពីចុងខែមីនា នូវបន្ទាត់គោលនយោបាយធំៗ ទាក់ទិននឹងវិធានាការសុខាភិបាល ដើម្បីការពារ ព្យាបាល សង្គ្រោះស្ត្រីក្នុងករណីរំលូតកូន។ បន្ទាត់គោលនយោបាយទាំងនោះ គឺជាមានអនុសាសន៍ចំនុន៥០ចំណុច ដោយរាប់បញ្ចូលទាំង ចំណាត់ការអនុវត្តផ្នែកវេជ្ជសាស្ត្រ សេវាសុខភាព អន្តរាគមន៍ផ្នែកច្បាប់ ព្រមទាំងផ្នែកនយោបាយផងដែរ ដើម្បីធ្វើយ៉ាងណា ផ្តល់ជូនដល់ស្ត្រីនូវសេវារំលូតកូនដែលមានគុណភាព មានសុវត្ថិភាព។
យោងតាមតួលេខរបស់អង្គការសុខភាពពិភពលោក បច្ចុប្បន្ននេះ មានករណីរំលូតកូនដោយគ្មានសុវត្ថិភាពសុខភិបាល ចំនួយយ៉ាងហោច២៥លានករណី ជារៀងរាល់ឆ្នាំ។ ការរំលូតកូន ដោយលួចលាក់ ក្រៅប្រព័ន្ធសុខាភិបាល គឺជាប្រភពបណ្តាលឲ្យស្លាប់ស្ត្រី និងក្មេងស្រីជំទង់ ប្រមាណ៣៩០០០នាក់ ជារៀងរាល់ឆ្នាំ ព្រមទាំងបានបណ្តាលឲ្យមានករណីឈឺធ្ងន់ធ្ងរ បញ្ជូនទៅមន្ទីរពេទ្យជាច្រើនលានករណីទៀត។ ភាគច្រើននៃករណីរំលូតកូន ក្រៅប្រព័ន្ធសុខាភិបាល គឺមាននៅតាមប្រទេសក្រីក្រ ដូចជា ៦០%នៅអាហ្វ្រិក និង ៣០% នៅតាមប្រទេសអាស៊ី។
តួលេខបានបង្ហាញថា ការរិតបន្តឹងច្បាប់ ហាមឃាត់ការរំលូតកូន គឺវាគ្មានប្រសិទ្ធភាពអ្វីទៅរារាំងស្ត្រីមិនឲ្យរំលូតកូននោះទេ គឺមានតែរុញស្ត្រីឲ្យស្វែងរកសេវារំលូតកូនដោយលួចលាក់។ នៅតាមប្រទេសដែលមានច្បាប់ហាមការរំលូតកូន មានតែ១ភាគ៤ប៉ុណ្ណោះ ដែលជាករណីរំលូតកូនប្រកបដោយសុវត្ថិភាព។ ដោយឡែកសម្រាប់នៅតាមប្រទេសដែលបើកសិទ្ធិសេរីភាពរំលូតកូន គឺ៩០%សុទ្ធតែជាករណីរំលូតតាមក្បួនច្បាប់សុខភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ