ប៊ូអ៊ីងបញ្ចប់ការធ្វើតេស្តដោយជោគជ័យក្នុងការបញ្ជូនយានទៅស្ថានីយ៍អវកាសអន្តរជាតិ
យានអវកាស ឈ្មោះ Starliner បានវិលត្រឡប់ពីស្ថានីយ៍អវកាសអន្តរជាតិ មកដល់ដីវិញ កាលពីថ្ងៃពុធ ២៥ឧសភា ហើយបិទបញ្ចប់ដោយជោគជ័យនូវបេសកកម្មសាកល្បង ដែលជាផ្នែកមួយនៃកិច្ចសន្យា រវាងក្រុមហ៊ុនប៊ូអ៊ីង ជាមួយនឹងទីភ្នាក់ងារណាសា។ ជោគជ័យនេះ គឺជាជំហានដ៏សំខាន់មួយ ដែលនឹងអាចបើកផ្លូវទៅជំហានបន្ទាប់ ដើម្បីឲ្យក្រុមហ៊ុនប៊ូអ៊ីងអាចទទួលការអនុញ្ញាតពីណាសា ក្នុងការដឹកជញ្ជូនអវកាសយានិកទៅកាន់ស្ថានីយ៍អវកាសអន្តរជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
Starliner គឺជាគម្រោងមួយរបស់ក្រុមហ៊ុនប៊ូអ៊ីង ដែលទទួលបានកិច្ចសន្យាពីទីភ្នាក់ងារណាសា ក្នុងពេលទន្ទឹមគ្នាជាមួយនឹងក្រុមហ៊ុន SpaceX កាលពីឆ្នាំ២០១៤កន្លងទៅ ដើម្បីធ្វើជាដៃគូពាណិជ្ជកម្មឯកជន ទទួលបន្ទុកដឹកជញ្ជូនសម្ភារៈ និងអវកាសយានិក ទៅកាន់ស្ថានីយ៍អវកាសអន្តរជាតិ។
ក៏ប៉ុន្តែ នៅក្នុងពេលដែលយាន Dragon របស់ក្រុមហ៊ុន SpaceX បានបញ្ចប់ការធ្វើតេស្តដោយជោគជ័យ តាំងពីឆ្នាំ២០២០ ហើយបានបំពេញបេសកកម្មដឹកជញ្ជូនឲ្យណាសាជាច្រើនលើករួចមកហើយនោះ យាន Starliner របស់ក្រុមហ៊ុនប៊ូអ៊ីងវិញ តែងតែជួបនឹងបញ្ហា នាំឲ្យមានការពន្យារពេលម្តងហើយម្តងទៀត រហូតមកទល់នឹងពេលបច្ចុប្បន្ននេះ។
បេសកកម្មសាកល្បង ដែល Starliner ទើបនឹងបានបញ្ចប់ដោយជោគជ័យ កាលពីថ្ងៃពុធម្សិលមិញនេះ ត្រូវបានគេឲ្យឈ្មោះថា Orbital Flight Test-2 ឬហៅកាត់ថា OFT-2 ត្រូវបានបាញ់បង្ហោះ កាលពីថ្ងៃព្រហស្បតិ៍ ១៩ឧសភាកន្លងទៅ ដោយប្រើរ៉ុកកែតធុន Atlas V របស់ក្រុមហ៊ុន United Launch Alliance ដែលជាក្រុមហ៊ុនវិនិយោគរួម រវាងប៊ូអ៊ីង និងក្រុមហ៊ុន Lockheed Martin។
Starliner ដែលនៅក្នុងបេសកកម្មនេះ មានតែតួយានទទេ ដោយគ្មានអវកាសយានិក បានធ្វើដំណើរទៅតភ្ជាប់ដោយជោគជ័យជាមួយនឹងស្ថានីយ៍អវកាសអន្តរជាតិ នៅថ្ងៃសុក្រ ២០ឧសភា បន្ទាប់មក ស្ថិតនៅទីនោះរយៈពេល ៥ថ្ងៃ មុននឹងផ្តាច់ខ្លួនចេញពីស្ថានីយ៍អវកាស រួចហើយវិលត្រឡប់មកចុះចតលើដីវិញដោយជោគជ័យ កាលពីថ្ងៃពុធម្សិលមិញ។
ជោគជ័យនេះ គឺជាដំណាក់កាលដ៏សំខាន់មួយ ដែលអាចនឹងបើកផ្លូវឲ្យប៊ូអ៊ីងឈានទៅបើកធ្វើបេសកកម្មបន្ទាប់ គឺការបញ្ជូនយានដោយមានដឹកអវកាសយានិកទៅកាន់ស្ថានីយ៍អវកាសអន្តរជាតិ ដែលគេគ្រោងធ្វើ នៅចុងឆ្នាំ២០២២នេះ ហើយជាបេសកកម្មសាកល្បងដំណាក់កាលចុងក្រោយ មុននឹងអាចឲ្យ Starliner ទទួលការអនុញ្ញាតពីទីភ្នាក់ងារណាសា ឲ្យចាប់ផ្តើមបេសកកម្មដឹកជញ្ជូនទៅមក រវាងស្ថានីយ៍អវកាសអន្តរជាតិ ជាលក្ខណៈទៀងទាត់ ដូចអ្វីដែលក្រុមហ៊ុន SpaceX កំពុងធ្វើ នៅក្នុងពេលបច្ចុប្បន្ននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ