អាមេរិក៖លោកចូ បៃដិនអំពាវនាវមានការរឹតបន្តឹងលើការទិញ លក់អាវុធនៅក្នុងស្រុក
នៅថ្ងៃព្រហស្បតិ៍ ទិ២ មិថុនា ប្រធានាធិបតីអាមេរិកលោកចូ បៃដិនបានអំពាវនាវឲ្យសភា និងព្រឹទ្ធសភាស្វែងរកកុងសង់ស៊ុសមួយដើម្បីរឹតបន្តឹងការទិញ លក់អាវុធនៅក្នុងស្រុក។ អ្វីដែលលោកបៃដិនចង់បានសម្រាប់អាមេរិក គឺការហាមលក់អាវុធវែង ការហាមមិនឲ្យប្រើបង់កាំភ្លើងដែលដាក់គ្រាប់ច្រើន ដំឡើងអាយុអ្នកមានសិទ្ធិទិញកាំភ្លើងពី ១៨ឆ្នាំទៅ ២១ឆ្នាំ រួមទាំងវិធានការបង្ការជាច្រើនទៀត។ លោកបៃដិនបានថ្លែងយ៉ាងដូចនេះពីសេតវិមាន និងបានធ្វើឡើង ជិត១០ថ្ងៃក្រោយពីមានការបាញ់រះនៅក្នុងសាលារៀនមួយក្នុងរដ្ឋតិចសាស់ដោយបានបណ្តាលឲ្យស្លាប់មនុស្សចំនួន ២១នាក់ ក្នុងនោះមានក្មេងអាយុក្រោម ១០ឆ្នាំចំនួន ១៩នាក់។ ព្រឹទ្ធសភា និងក្រុមអ្នកសាធារណរដ្ឋជាផ្ទាំងស៊ីបនៃការអំពាវនាវរបស់ប្រធានាធិបតីមកពីគណបក្សប្រជាធិបតេយ្យរូបនេះ។
ចុះផ្សាយនៅថ្ងៃ៖
ស្តាប់ - ០១:៥៧
« វាល្មមដល់ពេលសម្រាប់ព្រឹទ្ធសភាដែលត្រូវធ្វើអ្វីមួយហើយ។ តែដូចដែលយើងបានដឹងរួចហើយថា ដើម្បីអាចឲ្យព្រឹទ្ធសភាអនុម័តលើច្បាប់មួយស្តីពីអាវុធបាន គេត្រូវការឲ្យមានសំឡេងគាំទ្រយ៉ាងតិចចំនួន ១០សំឡេងពីក្រុមសមាជិកព្រឹទ្ធសភាមកពីគណបក្សសាធារណរដ្ឋ។ ខ្ញុំគាំទ្រលើកិច្ចខិតខំប្រឹងប្រែងរបស់សមាជិកព្រឹទ្ធសភាមកពីគណបក្សប្រជាធិបតេយ្យ និងគណបក្សសាធារណរដ្ឋមួយក្រុមតូចដែលព្យាយាមស្វែងរកដំណោះស្រាយមួយ។
ក៏ប៉ុន្តែព្រះជាម្ចាស់អើយ ការដែលសមាជិកព្រឹទ្ធសភាសាធារណរដ្ឋភាគច្រើនមិនចង់ឲ្យមាន និងមិនចង់ឲ្យលើកយកសំណើច្បាប់ណាមួយទៅជជែកដេញដោល ឬដាក់ឲ្យបោះឆ្នោតនោះ ខ្ញុំគិតថា កិច្ចខិតខំប្រឹងប្រែងរបស់សមាជិកព្រឹទ្ធសភាប្រជាធិបតេយ្យ និងសាធារណរដ្ឋមួយក្រុមតូចនេះគ្មានន័យអ្វីទាំងអស់។ យើងមិនអាចធ្វើឲ្យពលរដ្ឋអាមេរិកខកចិត្តជាថ្មីទៀតបានទេ។ តាំងពីព្រឹត្តិការណ៍បាញ់រះនៅក្នុងសាលារៀនមួយក្នុងរដ្ឋតិចសាស់កាលពីជាង ១សប្តាហ៍មក មានការបាញ់រះទ្រង់ទ្រាយធំសរុបចំនួន ២០ដងនៅអាមេរិក។
អស់ពេលជាយូរមកហើយដែលខ្ញុំបានតស៊ូដើម្បីទប់ស្កាត់នឹងព្រឹត្តិការណ៍មួយនេះ។ ខ្ញុំដឹងថាវាលំបាកណាស់។ តែគ្មានថ្ងៃដែលនឹងបោះបង់វាចោលទេ។ ប្រសិនបើសភាទាំងពីរបរាជ័យនៅក្នុងរឿងនេះ ខ្ញុំគិតថាពលរដ្ឋអាមេរិកភាគច្រើនក៏នឹងមិនបោះបង់ចោលដែរ។ ខ្ញុំជឿជាក់ថា ភាគច្រើនក្នុងចំណោមអស់ លោកនឹងបញ្ចេញប្រតិកម្មតាមរយៈសន្លឹកឆ្នោតរបស់អស់លោក។ ល្មមហើយ ល្មមហើយ ល្មមហើយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ